اپتا باسىندا قازاقستاندىق باق وكىلدەرى بوكسشى ادىلبەك نيازىمبەتوۆتىڭ بىلعارى قولعابىن شەگەگە ىلگەنى تۋرالى جارىسا جازدى.
بۇل اقپاراتتى ەڭ ءبىرىنشى بولىپ ەلگە جەتكىزگەن «ەگەمەن قازاقستان» ەدى. سونىمەن قاتار 91 كيلودا ازيا ويىندارىنىڭ جەڭىمپازى اتانعان انتون پينچۋك تا سپورتتىق عۇمىرىن اياقتاعانىن ايتتى.
قازاق فۋتبولىنىڭ قازىرگى ۋاقىتتاعى ۇزدىك شابۋىلشىسى (167 گول), اڭىزعا اينالعان فۋتبولشىسى نۇربول جۇماسقاليەۆ («توبىل») پەن فۋتبول الەمىنە كەڭىنەن تانىمال بولعان رەسەيلىك اندرەي ارشاۆين دە («قايرات») كارەراسىن اياقتادى. سونداي-اق قازاقستاندىق دزيۋدوشىلار ماكسيم راكوۆ پەن ازامات مۇقانوۆ تا تاتاميمەن قوشتاساتىندارىن مالىمدەدى. راكوۆتىڭ سپورتتىق عۇمىرىنداعى ەڭ ۇزدىك ناتيجەسى الەم جانە ازيا چەمپيونى اتانعانى بولسا, مۇقانوۆ ءۇشىن الەم چەمپيوناتىنىڭ كۇمىس جۇلدەسى ەڭ ۇزدىك كورسەتكىش سانالادى. سونىمەن قاتار ازامات 2010 جىلى سامبو سپورتىنان الەم چەمپيونى اتانعان.
ءالي بيتورە,
«ەگەمەن قازاقستان»