اشعابادتا قوس جۇلدە بۇيىردى

قازاقستان اۋىر اتلەتيكاسىنىڭ ورلەۋ كەزەڭى 2005 جىلى باستالعانىن جانكۇيەرلەر جاقسى بىلەدى. ناقتى دەرەكتەرگە سۇيەنسەك, 2005-2015 جىلدار ارالىعىندا الەم چەمپيوناتىنىڭ جالاۋى 9 مارتە جەلبىرەدى. سول باسەكەلەردىڭ تەك بىرەۋىنەن عانا جۇلدەسىز ورالدىق. ول – 2007 جىلى چيانگمايدا وتكەن سايىس. ال وزگە جارىستاردىڭ بارلىعىندا تاماشا ونەر كورسەتكەن وتانداستارىمىز ءوز جانكۇيەرلەرىن قۋانىش پەن شاتتىققا بولەدى. ماسەلەن, 2009 جىلى گويانگ پەن 2014 جىلى الماتىدا ۇيىمداستىرىلعان ءدۇبىرلى دودانىڭ كوماندالىق ەسەبىندە ەكىنشى ورىندى ولجالادىق. 2010 جىلى انتاليادا, 2011 جىلى پاريجدە جانە 2015 جىلى حيۋستوندا ءۇشىنشى تۇعىرعا تابان تىرەدىك. 2005 جىلى دوحادا جانە 2006 جىلى سانتو-دومينگودا ءتورتىنشى ساتىعا جايعاستىق. 2013 جىلى ۆروتسلاۆتا جەتىنشى ورىندى قاناعات تۇتتىق.

قازاقستاننىڭ وسىنداي دەڭگەيگە جەتۋى ءبىراز الپاۋىت مەملەكەتتەر مەن ءتۇرلى حالىقارالىق ۇيىمداردىڭ قىتىعىنا تيسە كەرەك, ىلىك ىزدەگەن ولار سوڭىمىزعا شام الىپ ءتۇستى. اقىرىندا «دوپينگ قولداندى» دەگەن ايىپپەن تالاي ساڭلاقتارىمىزدى اتاعىنان ايىرىپ, ءتۇرلى مەرزىمگە ۇلكەن سپورتتان شەتتەتتى. سونىڭ سالدارىنان ۇلتتىق كوماندامىز 2017 جىلى اقش-تىڭ اناحايم قالاسىندا وتكەن الەم چەمپيوناتىنا بارمادى. 

ءبىر جىلعا سوزىلعان ۇزىلىستەن كەيىن قايتا قاتارعا قوسىلدىق. اشعابادتا وتكەن جارىستا تەك قوس لەگيونەر – ارلي چونتەي مەن نادەجدا ليحاچەۆا عانا جەڭىس تۇعىرىنا كوتەرىلدى. چونتەيدىڭ – قىتايدان, ليحاچەۆانىڭ رەسەيدەن كەلگەنىن سپورتسۇيەر قاۋىم جاقسى بىلەدى. وكىنىشتىسى, ءار جىلدارى وليمپيا ويىندارى مەن الەم چەمپيوناتتارىندا اتوي سالعان ءزۇلفيا چينشانلو, فارحاد حاركي, نيجات راحيموۆ, كارينا گوريچەۆا, دەنيس ۋلانوۆ جانە الەكساندر زايچيكوۆ سىندى جۇلدىزدارىمىز جىلدىڭ باس­تى دوداسىندا قالىڭ توپتىڭ اراسىندا قالىپ قويدى. ءوز ارىپتەستەرىمەن بىرگە تۇرىكمەنستانعا ساپار شەككەن داڭقتى زىلتەمىرشى يليا يلين سوڭعى ساتتە جارىس جولىنا شىعۋدان باس تارتتى. تاعى ءبىر ايتا كەتەرلىك جايت, قوسسايىستىڭ قورىتىندىسى بويىنشا جەڭىس تۇعىرىنا كوتەرىلە الماعان كارينا گوريچەۆا, نيجات راحيموۆ جانە راۋشان مەشىتحانوۆا جەكەلەگەن جاتتىعۋلاردا جۇلدە الدى. ول دا كوڭىلگە مەدەت. 

بيىلعى الەم چەمپيوناتىنىڭ كو­ماندالىق سايىسىندا ادەتتەگىدەي قىتاي قۇراماسى جەكە-دارا كوش باستادى. بۇل جولى قىتاي ەلىنىڭ وكىلدەرى 19 (7 التىن+8 كۇمىس+4 قولا) جۇلدەگە قول جەتكىزدى. ەكىنشى ورىندا – تايلاند. ولار 3 التىن مەن 3 قولانى قورجىنعا سالدى. ءۇشىنشى ساتىعا يران تابان تىرەدى. پارسى ەلىنىڭ ورەندەرى 2 التىن مەن 1 قولانى يەلەندى. سونداي-اق رەسەي (2+0+0), سولتۇستىك كورەيا (1+3+0), ارمەنيا (1+1+0), گرۋزيا (1+0+1), تايپەي (1+0+0), يسپانيا (1+0+0) جانە يندونەزيا (1+0+0) قۇرامالارى ۇزدىك ون كوماندانىڭ قاتارىنا قوسىلدى. 

عالىم سۇلەيمەن,

«ەگەمەن قازاقستان»

الماتى