وبلىس ورتالىعىندا جىلۋ-ەلەكتر ورتالىعىنىڭ قۇرىلىسى قولعا الىنباق. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە ايتىلدى.
جوبانى ء«دان» جاۋاپكەرشىلىگى شەكتەۋلى سەرىكتەستىگى مەملەكەتتىك-جەكەمەنشىك سەرىكتەستىك شەڭبەرىندە قولعا الماق. جوبانى جۇزەگە اسىرۋعا 4 ينۆەستيتسيالىق كومپانيا تىلەك بىلدىرگەن. تاڭداۋ ء«دان» سەرىكتەستىگىنە ءتۇسىپتى.
كومپانيا باسشىسى ناريمان بيتاكوۆتىڭ ايتۋىنا قاراعاندا, جىلۋ-ەلەكتر ورتالىعىندا ساعاتىنا 180 مۆت ەلەكتر قۋاتى جانە 450 گكال جىلۋ قۋاتى وندىرىلەتىن بولادى. ىسكە قوسىلعان كەزدە تۇرعىن ۇيلەر مەن ونەركاسىپ نىساندارىن ەلەكتر قۋاتى, جىلۋ جانە ىستىق سۋمەن قامتاماسىز ەتەدى. قۇرىلىس جۇمىستارى 2019 جىلى باستالىپ, 2023 جىلى تولىق اياقتالماق.
– وبلىس ورتالىعىندا جىلۋ-ەلەكتر ورتالىعىن سالۋ تۋرالى كەلىسىمشارت جاساۋ بىزگە مەملەكەت باسشىسى العا قويىپ وتىرعان مىندەتتى جۇزەگە اسىرۋعا مۇمكىندىك بەرەدى. بۇل جوبا بىرىنشىدەن, الەۋمەتتىك ماسەلەلەردى شەشۋگە سەپتىگىن تيگىزەدى. ورتالىقتا الەمنىڭ ەڭ ۇزدىك تەحنولوگياسى قولدانىلادى. وسى جاي ەكولوگياعا زيان تيگىزبەي, تيىمدىلىكتى ارتتىرۋعا مۇمكىندىك بەرەدى, – دەيدى ناريمان بيتاكوۆ.
قازىرگى كەزدە جەر تەلىمى ءبولىنىپ, بارلىق تەحنيكالىق شارتتار جاسالعان. ەكولوگيالىق جانە سانيتارلىق-ەپيدەميولوگيالىق ساراپتاما جۇرگىزىلىپ, قوعامدىق تىڭداۋلار وتكىزىلگەن. جىلۋ-ەلەكتر ورتالىعىن جوبالاۋ كەزىندە قازاقستاندىق ءوندىرىس ماتەريالدارىن مولىنان پايدالانۋ قاراستىرىلعان.
جىلۋ-ەلەكتر ورتالىعى قاتتى وتىنمەن عانا ەمەس, گازبەن دە جۇمىس ىستەيتىن بولادى. پايدالانۋ كەزىندە جىلىجاي كەشەنى مەن تەمىر-بەتون بۇيىمدارىن دايىندايتىن زاۋىت سالۋ سياقتى قوسىمشا جوبالاردى دا جۇزەگە اسىرۋ جوسپارلانۋدا.
كومپانيا باسشىلارى بۇل جوبانى سلوۆەنيانىڭ «لۋكا ينجينيرينگ» كومپانياسىمەن بىرلەسىپ, ينۆەستيتسيا تارتۋ ارقىلى جۇزەگە اسىرماق. جوبانىڭ قۇنى شامامەن 176 ميلليارد تەڭگە. قۇرىلىس جۇمىستارى كەزىندە 700-900 ادام, ال, پايدالانۋعا بەرىلگەننەن كەيىن 600 ادام تۇراقتى جۇمىسپەن قامتىلادى.
بايقال ءبايادىل,
«ەگەمەن قازاقستان»
اقمولا وبلىسى