ىستامبۇلدا « ۇلى دالانىڭ تاريحي-مادەني كەلبەتى» اتتى حالىقارالىق كورمە اشىلدى

قازاقستان رەسپۋبليكاسى مەملەكەتتىك ورتالىق مۋزەيىنىڭ باي كوللەكتسياسىن پاش ەتەتىن حالىقارالىق كورمەنىڭ اشىلۋ سالتاناتىنا ەكى ەلدىڭ مەملەكەت باسشىلارى, اتاپ ايتساق, دۇنيەجۇزى قازاقتارىنىڭ جانىنان قۇرىلعان «وتانداستار» قورىنىڭ پرەزيدەنتى نۇرتاي ابىقاەۆ, تۇركى تىلدەس ەلدەر ىنتىماقتاستىق كەڭەسىنىڭ باس حاتشىسى – باعدات امىرەەۆ, «تۇركسوي» تۇركى مادەنيەتىنىڭ حالىقارالىق ۇيىمىنىڭ باس حاتشىسى, پروفەسسور دۇيسەن قاسەيىنوۆ, تۇرىك رەسپۋبليكاسى پرەزيدەنتىنىڭ باس كەڭەسشىسى Haydar Ali Yildiz, قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى سىندى تانىمال تۇلعالار قاتىسىپ, كورمەنىڭ ەكى ەل اراسىنداعى مادەني بايلانىستىڭ ارى قاراي دامۋىنا, حالىقتار اراسىنداعى دوستىقتىڭ نىعايۋىنا قوسار ۇلەسى زور ەكەندىگىن اتاپ ءوتتى. ستامبۋل مادەنيەت جانە تۋريزم باسقارماسىنىڭ ديرەكتورى Coşkun Yılmaz, تۇرىك جانە يسلام ەسكەرتكىشتەرى مۋزەيىنىڭ ديرەكتورى سەراجەتدين شاحين  دە وزدەرىنىڭ جىلى لەبىزدەرىن ءبىلدىردى.

ورتالىق مۇراجاي ديرەكتورىنىڭ ورىنباسارى بيبىگۇل داندىقاراەۆانىڭ حابارلاعانىنداي,  ەجەلگى كوشپەلىلەر مادەنيەتى جانە قازاق حالقىنىڭ تاريحي-ەتنوگرافياسى دەپ اتالاتىن ەكى بولىمنەن تۇراتىن كورمەدە: بۇگىندە قازاقستاننىڭ ۇلتتىق يگىلىگىنە اينالعان, الەمدىك مادەنيەت جاۋھارلارىنىڭ ءبىرى – 1969 ج. ەسىك قورعانىنان تابىلعان التىن ادام جانە ەجەلگى كوشپەلى حالىقتىڭ التىن بۇيىمدارى (جالاۋلى كومبەسى ب.ز.د. IX-VII عع., شىلىكتى قورعانى ب.ز.د. VII-VI عع., قارعالى كومبەسى ب.ز.د. II –I عع.), جەتىسۋ وڭىرىنەن تابىلعان ساقتار مەن ۇيسىندەردىڭ عۇرىپتىق زاتتارى – شىراعداننىڭ ءۇش تاعاندى بولىگى, قازان, عۇرىپتىق ىدىستار, شىراعدان, تاريحي جانە كوركەمدىك قۇندىلىعى تەڭدەسىز جادىگەرلەر – XIX – XX عع. ءداستۇرلى كيىم ۇلگىلەرى مەن زەرگەرلىك ونەر تۋىندىلارى, تۇرمىستىق بۇيىمدار مەن ساندىك-قولدانبالى ونەر تۋىندىلارى ۇسىنىلىپ وتىر. كورمە بيىلعى جىلعى  9 جەلتوقسانىنا دەيىن جالعاسادى, وندا ۇلى دالانىڭ كوركەم دە اسپەتتى كوركەم بەينەسى كوز جاۋىن الادى.

ساپارباي پارمانقۇل,

«ەگەمەن قازاقستان»

الماتى