ورتالىق كوممۋنيكاتسيالار قىزمەتىندە اتىراۋ وبلىسىنىڭ بيىلعى 9 ايداعى الەۋمەتتىك-ەكونوميكالىق دامۋىنىڭ قورىتىندىلارىنا ارنالعان ءباسپاسوز ءماسليحاتى ءوتتى.
وبلىس اكىمى نۇرلان نوعاەۆ باق وكىلدەرىنە پرەزيدەنت جولداۋىندا ايتىلعان ماسەلەلەردىڭ اتىراۋ وبلىسىندا ىسكە اسىرىلۋى تۋرالى بايانداپ بەردى. ن.نوعاەۆتىڭ ايتۋىنشا, وبلىستا «7-20-25» مەملەكەتتىك باعدارلاماسى بويىنشا جەرگىلىكتى تۇرعىنداردان 131 ءوتىنىم قابىلدانىپ, ونىڭ 89-ى ماقۇلداندى.
– «7-20-25» مەملەكەتتىك باعدارلاماسى حالىق ءۇشىن تۇرعىن ءۇي ساتىپ الۋعا جاڭا مۇمكىندىكتەر بەرىپ وتىر. قازىرگى تاڭدا 1 553 ملن تەڭگەنىڭ 131 ءوتىنىمى قابىلداندى. 1084 ملن تەڭگەنىڭ 89 ءوتىنىمى ماقۇلداندى. 62 ءوتىنىش بەرۋشىگە تۇرعىن ءۇي ساتىپ الۋعا 783 ملن تەڭگە كولەمىندە قاراجات بەرىلدى, − دەدى ول.
قازىر ايماقتا تۇرعىن ءۇي سەكتورىن دامىتۋ ءۇشىن 3892 پاتەرلىك 44 كوپقاباتتى تۇرعىن ءۇيدىڭ قۇرىلىسى جۇرگىزىلۋدە. جىل سوڭىنا دەيىن بارلىعى 2164 پاتەرلىك 34 تۇرعىن ءۇيدىڭ قۇرىلىسى اياقتالۋعا ءتيىس.
وڭىردە الەۋمەتتىك سەكتوردى دامىتۋعا 93 ميلليارد تەڭگە باعىتتالعان. جىل سوڭىنا دەيىن 30 الەۋمەتتىك نىسان ىسكە قوسىلادى دەگەن جوسپار بار.
– 9 اي ىشىندە 724 ورىندىق 2 مەكتەپ, 1000 ورىندىق 5 بالاباقشا, 600 ادامعا ارنالعان 2 مادەنيەت ءۇيى, 1 دەنساۋلىق ساقتاۋ نىسانى, 500-دەي ادامعا ارنالعان 2 دەنەشىنىقتىرۋ سپورتتىق كەشەنى, ءبىر جاتاقحانا, بارلىعى 13 نىسان پايدالانۋعا بەرىلدى. جىل سوڭىنا دەيىن تاعى 1244 وقۋشىعا ارنالعان
6 مەكتەپ, 1960 بالانى قامتيتىن 10 بالاباقشا, 700 ادامعا ارنالعان 3 مادەنيەت ءۇيى, 4 دەنساۋلىق ساقتاۋ نىسانى, 2 دەنەشىنىقتىرۋ-ساۋىقتىرۋ كەشەنى, قالادان شىعا بەرىستەردە ورنالاساتىن 4 ستاتسيونارلىق پوليتسيا بەكەتى مەن 1 حالىققا قىزمەت كورسەتۋ ورتالىعى اشىلادى, – دەدى ن.نوعاەۆ. پرەزيدەنت جولداۋىندا ادامداردىڭ ەڭبەكاقىسىن كوتەرۋ حالىقتىڭ ءال-اۋقاتىن كوتەرۋگە ىقپال ەتەتىن باستى قادامداردىڭ ءبىرى رەتىندە اتال- عانى بەلگىلى. بۇل ورايدا, اتىراۋ وبلىسى بويىنشا 2019 جىلى 10 مىڭنان استام ادامنىڭ ەڭبەكاقىسىن كوتەرۋ جوسپارلانىپ وتىر ەكەن.
– مەملەكەت باسشىسىنىڭ جولداۋىن ىسكە اسىرۋ اياسىندا ايماقتا حالىقتىڭ الەۋمەتتىك جاعدايىن كوتەرۋ جۇمىستارى جۇرگىزىلىپ جاتىر. 2019 جىلدىڭ 1 قاڭتارىنان باستاپ 1720 مەكەمەدەگى ايلىعى 42 مىڭ تەڭگە بولاتىن 10 415 ادامنىڭ ەڭبەكاقىسى كوتەرىلەدى. قازىردىڭ وزىندە وڭىردەگى 21 مەكەمە قىزمەتكەرلەردىڭ ەڭبەكاقىلارىن كوتەرۋ شارالارىن باستاپ كەتتى. بۇل مەكەمەلەردە جالپى سانى 2 587 ادام جۇمىس ىستەيدى,– دەدى وبلىس اكىمى. بيىل ەكىنشى جارتىجىلدىقتا ايماقتا جاڭادان 26 494 جاڭا جۇمىس ورنى قۇرىلدى.
اتىراۋ وبلىسى ەلىمىزدەگى بالىق ءوندىرىسى جولعا قويىلعان ايماقتاردىڭ ءبىرى. وبلىس اكىمى وسى باعىتتاعى جەتىستىكتەر تۋرالى دا باياندادى. قازىرگى تاڭدا ەكى مەكەمە توعانداردا قىزىل بالىق تۇرلەرىن وسىرۋمەن اينالىسىپ جاتىر. كومپانيالاردىڭ ءبىرى جىلىنا 60 توننا بالىق پەن 1 تونناعا جۋىق قارا ۋىلدىرىق وندىرسە, ەكىنشى كاسىپورىن 100 توننا تاۋارلى بالىق ەتى مەن 1 تونناعا تارتا قارا ۋىلدىرىق وندىرەدى. – بىزگە بالىق اۋلاۋعا بەرىلگەن كۆوتانى قازىرگى تاڭدا بالىق سالاسىندا قىزمەت اتقارىپ جۇرگەن 17 مەكەمە تولىعىمەن قولدانۋدا. بۇل 17 كومپانيانىڭ 2-ۋىندە ەۋروكود بار, ياعني ولار ونىمدەرىن ەۋروپا ەلدەرىنە وتكىزە الادى, – دەدى ن.نوعاەۆ. وبلىستاعى قيعاش, جايىق وزەندەرىنىڭ ارناسىن تەرەڭدەتۋ جۇمىستارى جۇيەلى جۇرگىزىلگەندىكتەن, بالىق سانى دا كوبەيىپتى.
وبلىس اكىمىنىڭ ايتۋىنشا, دەنساۋلىق ساقتاۋ سالاسىندا كادر تاپشىلىعىن جويۋ ءۇشىن بىلتىر – 35, بيىل – 53 گرانت ءبولىنىپ, جەرگىلىكتى مەكتەپ تۇلەكتەرى استانا مەن قاراعاندىداعى مەديتسينالىق ۋنيۆەرسيتەتتەرگە ءبىلىم الۋعا جىبەرىلىپتى. ولار ءتيىستى ماماندىق الىپ شىققاننان كەيىن مىندەتتى تۇردە اتىراۋ وڭىرىنە بارىپ جۇمىس ىستەۋگە ءتيىس.
ارنۇر اسقار,
«ەگەمەن قازاقستان»