الماتى قالاسىنداعى ورتالىق مەملەكەتتىك مۇراجايدا «ورتاق يراك اسپانىنىڭ استىندا: قازاقستاندىق جانە پولياك بىتىمگەرشىلەرى» كورمەسى ءوتتى. شارا الماتى قالاسىنداعى پولشا رەسپۋبليكاسىنىڭ باس كونسۋلدىعى, بىتىمگەرشىلىك ميسسياسىنىڭ ارداگەرلەرى وداعى, قازاقستان رەسپۋبليكاسىنىڭ ورتالىق مۋزەيى جانە قازاقستان رەسپۋبليكاسىنىڭ قورعانىس مينيسترلىگىنىڭ دەمەۋىمەن ۇيىمداستىرىلدى.
كورمە «قازبات» قازاقستاندىق باتالونىنىڭ بىتىمگەرشىلىك ميسسياسىنىڭ اياقتالۋىنىڭ ون جىلدىعىنا ورايلاستىرىلىپ, يراكتاعى قازاقستاندىق جانە پولياك بىتىمگەرشىلەرىنىڭ جالپى بەيبىتشىلىك ورناتۋداعى ميسسياسىن قامتىدى.
2003 جىلدىڭ ءساۋىر ايىندا ساددام حۋسەين رەجىمى قۇلاتىلعاننان كەيىن حالىقارالىق قوعامداستىق يراكتاعى جاعدايدى قالىپقا كەلتىرۋ شارالارىن قابىلدادى. وسى ماقساتقا جەتۋ ءۇشىن ءتورت تۇراقتاندىرۋ ايماعى قۇرىلدى. يراكتاعى پولياك اسكەري كونتينگەنتىنىڭ باسشىلىعىمەن ورتالىق-وڭتۇستىك كوپۇلتتى ديۆيزياسى وڭتۇستىك ورتالىق ايماقتى باقىلاۋعا الدى. ورتالىق-وڭتۇستىك كوپۇلتتى ديۆيزياسى 23 مەملەكەتتەن, ونىڭ ىشىندە 2500 پولياك جاۋىنگەرى مەن «قازباتتىڭ» بىتىمگەرشىلىك باتالونىنىڭ ينجەنەرلىك ساپەرلىك جاساعىنان تۇردى, ول 2003 جىلدىڭ 19 قىركۇيەگىندە يراكقا جىبەرىلدى. قازاقستاندىق بىتىمگەرشىلىك «قازبات» باتالونى 2000 جىلى پرەزيدەنت نۇرسۇلتان نازارباەۆتىڭ جارلىعىمەن قۇرىلدى. قازاقستاندىق جاساق ينجەنەرلىك ساپەرلىك توپتان, سۋمەن جابدىقتاۋ جانە جەتكىزۋ توبىنان قۇرالعان. «قازبات» ينجەنەرلىك ساپەرلىك توبىنىڭ مىندەتتەرىنە جارىلعىش زاتتاردى ىزدەۋ, ساقتاۋ جانە زالالسىزداندىرۋ كىرەدى.
كورمەگە «قازبات» بىتىمگەرشىلىك ميسسياسىنىڭ يراك رەسپۋبليكاسىنداعى بارلىق التى جىلدىق كەزەڭىن كورسەتەتىن 30 فوتوسۋرەت قويىلدى.سۋرەتتەردە يراكتاعى بەيبىت ءومىر ءۇشىن يىق تىرەستىرىپ بىرگە كۇرەسكەن قازاقستاندىق جانە پولشالىق بىتىمگەرشىلەردىڭ كۇندەلىكتى ءومىرىنىڭ ءتۇرلى ساتتەرى كورىنىس تاپقان.
ميسسيانى ورىنداۋ كەزىندە 22 پولياك اسكەريى جانە ءبىر قازاقستاندىق وفيتسەر, كاپيتان قايرات قۇداباەۆ قازا تاپتى, كورمەگە ونىڭ دا سۋرەتتەرى قويىلعان.
شاراعا پولشا رەسپۋبليكاسىنىڭ ارداگەر بىتىمگەرشىلەرى قاتىستى, ولار يراكتاعى بىتىمگەرشىلىك ميسسياسى اياقتالعاننان كەيىن قىزمەتتەرىمەن قايتا قاۋىشادى.
راسىمدە مەرەكەلىك باعدارلاما دايىنداعان قازاقستاندىق وركەستر ونەر كورسەتتى. قوناقتار ءۇشىن ەكى ەلدىڭ اسكەري مارشتارى ورىندالدى. كورمە حالىقارالىق ماڭىزعا يە جانە ەكى ەلدىڭ اراسىنداعى دوستىقتىڭ قاناتىن كەڭ جايعانىن كورسەتىپ وتىر. يراكتا بىتىمگەرشىلىك جولدا جۇرگەن جاۋىنگەرلەر ءۇشىن دە ارقاشان ءساتتى قادامدار تىلەيىك.
ساپارباي پارمانقۇل,
«ەگەمەن قازاقستان»
الماتى