اۋىلدان تاي-ق ۇلىنداي تەبىسىپ بىرگە وسكەن اقالاق دوس وسىنداعى قۇرداس پىقىپتىڭ الپىس جاس تويىنا كەلىپتى. مۇنى كۇتىپ الۋ مەنىڭ مەنشىگىمە جۇكتەلگەن. ەرتە كەلگەن ەكەن, قۇرداستى زەرىكپەسىن دەپ اتاقتى ءانشىنىڭ كونتسەرتىنە اپاردىم.
ءدان ريزا, كەلە جاتىپ:
– بۇرىنعىلار ءبىر-ەكى ءان ايتسا: ء«ان ايتساڭ دا جانىڭدى جەپ ايتاسىڭ» دەۋشى ەدى... مىناۋىڭ عاجاپ, ۇزبەي-جارماي ەكى ساعاتتان استام شىرقاسا دا بىلق ەتپەدى! نەعىلعان كۇش-قايرات, نەعىلعان ەرىك-جىگەر! – دەپ تامسانعانىندا:
– ە, ول فونوگراممانىڭ ارقاسى! تازا داۋىسىمەن ايتىپ كورسىنشى! – دەپ ەدىم, اقالاق ايتقانىڭدى تۇسىنبەدىم دەگەندەي باجىرايا قارادى. فونوگراممانىڭ دايىن دۇنيە ەكەنىن, تەك سوعان ىلەسىپ ايتقان بولساڭ بولدى دەپ تۇسىندىرگەن بولدىم.
– پالەكەت, باسە! – دەپ اقەكەڭدە ونى ءىلىپ الا قويدى.
پىقىپتىڭ تويىنداعى كىدىرىس-ءمۇدىرىسى جوق, كىلەڭ دانالىق سوزدەردەن قۇرالعان تىلەكتەرگە اقالاق اۋزىن اشىپ, كوزىن جۇمىپ تامسانۋمەن بولدى. ۇيگە كەلگەن سوڭ:
– قالاداعى سەندەردىڭ تىلەك سوزدەرىڭنىڭ جانىندا بىزدىكى ءجىپ ەسە المادى. ويپىر-اي, بىرىنەن-ءبىرى اسىپ توگىلگەن, نەعىلعان عاجاپ سوزدەر! – دەگەن سوڭ:
– ول دا دايىن پالەكەت... – دەپ مىڭگىرلەپ ەدىم:
– نە, سەن دە فونوگراممامەن سويلەدىڭ بە؟! – دەپ اجىرايا قارادى.
– زامان سولاي, تەحنولوگيانىڭ ەنبەگەن ەسىگى, كىرمەگەن تەسىگى قالمادى, – دەپ تومەنشىكتەنگەن بولدىم.
ەرتەسىندە پىقىپ الىس-جاقىننان كەلگەن قۇدا-جەكجاتتارىنىڭ باسىن قوسىپ داستارقان جايعان ەكەن, ۇلكەن اسقا باتا بەرۋدى مەنەن سۇراعان سوڭ, قىلتەمىرىمدى بايقاتپاي قۇلاعىما ءىلىپ, جانقالتامداعى اپپاراتىمنىڭ نۇكتەسىن لىپ ەتكىزىپ باسىپ سويلەپ كەپ بەردىم...
ارا-اراسىندا اقالاققا كوز تاستاپ ەدىم, پالەكەت ىرجيىپ «ۇيىپ تىڭداپ» قالىپتى.
بىتكەنىمدە الىستان كەلگەن قۇدا-جەكجاتتار:
– ءاي, بارەكەلدى, مىنە باتا! – دەپ ريزاشىلىقتارىن ءبىلدىردى.
بۇل «جەتىستىكتەرگە» اقالاق دوستىڭ ريزا بولعانى سونشالىق, كەتەرىندە ەكى-ءۇش كۇن كىدىرىپ, قوياردا قويماي الگى توست سوزىنەن باتانىڭ ەكى-ءۇش ۇلگىسىن جازدىرتىپ الىپ, ءتۇن بالاسى كوز ىلمەي مەنىڭ تاجىريبەمدى ۇيرەنىپ اۋىلىنا اسا ريزا كەيىپپەن اتتانىپ كەتتى...
...بىردە ءبىر جانازادا... جانازا وقىپ وتىرعان مولدەكەڭنىڭ قۇلاعىنان تانىس قىلتەمىردى كوزىم شالىپ... بەيىت باسىندا دا, كەلگەن سوڭعى وقىلۋدا دا مولدەكەڭ ساسپادى. مۇندايدا مولدەكەڭنىڭ اپپاراتىنىڭ باتارەيكاسى بىتپەي ابىرويمەن الىپ وتسە ەكەن دەپ تىلەيدى ەكەنسىڭ... بىزدىكىندە بولىپ تۇرادى, وندايدا قارابايىر سوزبەن ءىلىپ اكەتىپ, تەگى بولماسا ءسوزىمىزدى سول تۇستان بىتىرە سالامىز... ە, مولدەكەڭ دە سويتەر, نە نارسەنىڭ دە باسى مەن اياعىن تۇگەندەپ جۇرگەن كىم بار بۇل دۇنيەدە... سونىمەن ايتارىم – جاساسىن جاڭا زامان, جاساسىن جاڭا تەحنولوگيا, جاساسىن فونوگرامما!
دانيار جەڭىس
الماتى