الماتىدا باتىرحان شۇكەنوۆ اتىنداعى مۋزىكالىق بايقاۋ وتەدى

بايقاۋدا بەس نوميناتسيا بار: فلەيتا, گوبوي, كلارنەت, فاگوت جانە ساكسوفون. ءىس-شارانى «باتىرحان شۇكەنوۆ اتىنداعى قور» «بولات وتەمۇراتوۆ قورىنىڭ» قولداۋىمەن ۇيىمداستىرىپ وتىر. ەسكە سالا كەتسەك, «باتىرحان شۇكەنوۆ اتىنداعى قور» قوعامدىق قورى 2015 جىلى قۇرىلعان, 2018 جىلدان باستاپ قوردى مۋزىكانتتىڭ وتباسى باسقارادى. قامقورشىلىق كەڭەسكە ءانشىنىڭ باۋىرى باۋىرجان شۇكەنوۆ جەتەكشىلىك ەتسە, قوردىڭ ديرەكتورى بولىپ   نارگيز شۇكەنوۆا بەكىتىلگەن. قور مادەنيەت پەن ونەرگە بايلانىستى جوبالاردى جۇزەگە اسىرادى, سونداي-اق الماتى قالاسىنىڭ زياتكەرلىك ورتاسىن كەڭەيتىپ, كوركەيتۋگە باعىتتالعان.

سونىمەن بيىلعى بايقاۋعا تورەلىك ەتەتىن قازىلار القاسىنىڭ قۇرامى دا انىقتالدى. ولار: نيكولاس كراۋزە – «جاڭا ەۋروپا» وركەسترىنىڭ باس ديريجەرى جانە كوركەمدىك جەتەكشىسى, فرانتسيا; كريستيان ەلين – ساكسوفونشى جانە كومپوزيتور, گەرمانيا; نيكولاي پوپوۆ – فلەيتاشى, حالىقارالىق بايقاۋلاردىڭ لاۋرەاتى, پ. ي. چايكوۆسكي اتىنداعى ۇلكەن سيمفونيالىق وركەستردىڭ ورىنداۋشىسى, رەسەي; اكيم مۋحاتجانوۆ – استانا قالاسى اكىمدىگى مەملەكەتتىك اكادەميالىق فيلورمونياسىنىڭ ۇرمەلى وركەستىرىنىڭ باس ديريجەرى, قر ەڭبەك سىڭىرگەن قايراتكەرى; تاڭاتار نۇرالى – گوبوي كلاسى بويىنشا قۇرمانعازى اتىنداعى ۇلتتىق كونسەرۆاتوريانىڭ پروفەسسورى, كازاقستاننىڭ ەڭبەك سىڭىرگەن ءارتىسى جانە جانات ەرمانوۆ – كلارنەت كلاسى بويىنشا قۇرمانعازى اتىنداعى ۇلتىق كونسەرۆاتوريانىڭ پروفەسسورى, قازاقستاننىڭ  ەڭبەك سىڭىرگەن قايراتكەرى.

مۋزىكانتتاردى ىرىكتەۋ وڭايعا سوققان جوق. بايقاۋدىڭ ءبىرىنشى كەزەڭىندە 43 ۇمىتكەر باق سىنادى, ىرىكتەۋ سىنى ءۇشىن ورىنداۋشىلار الدىن-الا اسپاپتا ويناعان  بەينەجازبالارىن جىبەردى. 32 جاسقا دەيىنگى كاسىبي ورىنداۋشىلار, سونداي-اق كىشى جانە جوعارى دارەجەلى مۋزىكالىق وقۋ ورىندارىنىڭ ستۋدەنتتەرى قاتىسقان كەلەسى كەزەڭگە 28-ءى عانا جىبەرىلدى. قازىلار القاسىنىڭ مۇشەسى اكىم مۇحاتجانوۆ بايقاۋدىڭ كاسىبي دەڭگەيى تۋرالى: «قاتىسۋشىلاردىڭ قۇرامى وتە كۇشتى, مەنىڭ ويىمشا, بايقاۋعا ءوز كاسىبىنىڭ ەڭ ۇزدىك وكىلدەرى قاتىسىپ وتىر. الدا ءالى ەكى  كەزەڭ بار, بۇل مۋزىكانتتاردىڭ وزدەرىن كورسەتۋ, ارتىستىك, انسامبلدە جانە سولودا ويناۋ قابىلەتتەرىن تانىتۋ ءۇشىن تاماشا مۇمكىندىك», – دەپ ءتۇسىندىردى.

بايقاۋدىڭ ماقساتى – ۇلتتىق ۇرمەلى اسپاپتاردىڭ ورىنداۋشىلىعىنا نازار اۋدارتۋ. ونىڭ ماڭىزدىلىعىن جانات ەرمانوۆ تا اتاپ ءوتتى: «وكىنىشكە قاراي, سوناۋ 1990 جىلدارى قايتا قۇرۋ باستالعاننان بەرى ونەردەگى كوپتەگەن جارىستار جويىلىپ كەتتى. بۇگىندە استانادا ءبىر عانا بايقاۋ بار, ال قازاقستاننىڭ ۇرمەلى مەكتەبىنىڭ 50 جىلدىق تاريحى بار ەكەنىن ەسكەرسەك جانە ستۋدەنتتەر مەن جاس ورىنداۋشىلار سانىنىڭ جەتكىلىكتى ەكەنىن ەسكە الساق, بۇل, ارينە, تىم ماردىمسىز. سول سەبەپتى باتىرحان شۇكەنوۆ اتىنداعى كونكۋرس داستۇرگە اينالسا, مۋزىكانتتارعا وزدەرىن كورسەتىپ قانا قويماي, جاڭا كوكجيەكتەن كورىنۋگە, كورنەكتى ورىنداۋشىلاردىڭ الدىندا ونەر كورسەتىپ, باعاسىن الۋعا  مۇمكىندىك تۋاتىن ەدى» دەيدى.

بايقاۋ باعدارلاماسى ءتورت كۇنگە جوسپارلانعان.  العاشقى كۇنى, 26 قاراشادا, قۇرمانعازى اتىنداعى قازاق ۇلتتىق كونسەرۆاتورياسىنىڭ ۇلكەن زالىنىڭ ساحناسىندا بايقاۋعا قاتىسۋشىلاردىڭ ونەر كورسەتۋ ءتارتىبى انىقتالادى.

ەكىنشى اينالىمدا, 27 جانە 28 قاراشا كۇندەرى قاتىسۋشىلار ءانسامبلدىڭ (كۆارتەتتىڭ / كۆينتەتتىڭ) ءبىر بولىگى رەتىندە جانە  جەكە ورىنداۋدا ونەر كورسەتۋگە ءتيىس. بۇل كەزەڭنىڭ العىشارتتارىنىڭ ءبىرى – قازاقستان كومپوزيتورلارىنىڭ شىعارمالارىن ورىنداۋ.

فينالدا مۋزىكانتتار موتسارتتىڭ نەمەسە گلازۋنوۆتىڭ كونتسەرتىن ويناۋعا ءتيىس, ولاردى «كامەراتا قازاقستان» وركەسترى مەن وسى كەشتە ديريجەر رەتىندە ونەر كورسەتەتىن نيكولاي كراۋزە سۇيەمەلدەيدى. تانىمال وتاندىق توپ ەكى رەت – ءۇشىنشى كەزەڭدە جانە 30 قاراشاداعى جابىلۋ سالتاناتىنداعى گالا-كونتسەرتتە ساحناعا شاقىرىلاتىن بولادى.

ۇرمەلى اسپاپتار ورىنداۋشىلارىنىڭ ءبىرىنشى رەسپۋبليكالىق كونكۋرسى جەڭىمپازدارىنىڭ ەسىمدەرى 30 قاراشادا جاريالانادى. ءار نوميناتسيادا ءى, ءىى, ءىىى دارەجەلى جۇلدەلەر, سونداي-اق ديپلومانتتاردىڭ ديپلومدارى مەن ماراپاتتارى تابىستالىپ, «ۇزدىك سۇيەمەلدەۋشى» انىقتالادى. بايقاۋدىڭ جالپى جۇلدە قورى – 5 250 000 تەڭگەنى قۇرايدى.

ايگۇل احانبايقىزى,

«ەگەمەن قازاقستان»

الماتى