وتكەن اپتانىڭ سوڭىندا XXI «شابىت» حالىقارالىق شىعارماشىل جاستار فەستيۆالىنىڭ جابىلۋ سالتاناتى ءوتتى. كەشتە بەس نەگىزگى اتالىم بويىنشا سىنعا تۇسكەن ۇمىتكەرلەر اراسىنان گران-پري جانە پرەزيدەنت كۋبوگىن يەلەنگەن تالانتتى جاستار ماراپاتتالدى.
ەلوردامىزدىڭ 20 جىلدىعىنا ارنالعان فەستيۆالدىڭ جابىلۋ سالتاناتى بەيبىتشىلىك جانە كەلىسىم سارايىندا ءوتتى.
ونەر الەمىندەگى دارىندى جاستار ءۇشىن ۇلكەن ساحناعا جول اشاتىن – «شابىت» فەستيۆالى بيىل كلاسسيكالىق مۋزىكا, حالىق مۋزىكاسى, ەسترادالىق ۆوكال, حورەوگرافيا جانە جۋرناليستيكا بويىنشا ۇزدىكتەردى تاڭداعان بولاتىن.
«جۋرناليستيكا» اتالىمى بويىنشا تەلەجۋرناليست نارتاي ارالباي ۇلى باس جۇلدەگە يە بولدى. اقيقاتتىڭ اق-قاراسىن ساپالى ساراپتاپ, وزىندىك ستيلىمەن دە, ءسوز ساپتاۋ مانەرىمەن دە كورەرمەننىڭ ىستىق ىقىلاسىنا بولەنگەن جۇرگىزۋشى كوپشىلىككە «ماسەلە» باعدارلاماسىمەن تانىمال.
ايتا كەتەيىك, «جۋرناليستيكا» اتالىمى 6 جىلعى ۇزىلىستەن كەيىن قايتا قوسىلىپ وتىر.
«حالىق مۋزىكاسى» اتالىمى بيىل 3 سەكتسياعا ءبولىندى. «ۇزدىك قىلقوبىزشى» – شولپان شاراپاتوۆا اتانسا, «شەرتەر, باس شەرتەر» بويىنشا ءادىلجان گودجانوۆ, «پريما-قوبىز» بويىنشا ايىم مەيىرحانوۆا گران-پري يەلەندى.
«حورەوگرافيا» اتالىمى بويىنشا ەلىمىزدى الەمدىك ارەنادا تانىتىپ جۇرگەن «ناز» مەملەكەتتىك بي تەاترى جەڭىسكە جەتتى.
مەيىرجان كەڭەسباەۆ, ايا عابباسوۆا, لەونيد مىسوۆسكي جانە باعجان ەسىركەپتىڭ شەكتى كۆارتەتى – «كلاسسيكالىق مۋزىكا» اتالىمىنىڭ «ۇزدىك «كامەرالىق ءانسامبلى» بولىپ تانىلسا, «سوقپالى اسپاپتار» بويىنشا گران-پري ارىستان ابىلدينگە بۇيىردى.
«ەسترادالىق ۆوكال» اتالىمى بويىنشا استانالىق احمەت سۇلتانعا تەڭ كەلەر ءانشى بولمادى.
XXI «شابىت» حالىقارالىق شىعارماشىل جاستار فەستيۆالىنىڭ ەڭ باستى جۇلدەسى – پرەزيدەنت كۋبوگىنا گوبويشى يسلام اليەۆ يە بولدى. سونىمەن قاتار ول «كلاسسيكالىق مۋزىكا: اعاش ۇرمەلى اسپاپتار» اتالىمىندا ۇزدىك دەپ تانىلعان بولاتىن.
پرەزيدەنت كۋبوگىن تابىستاعان استانا قالاسى اكىمىنىڭ ورىنباسارى ەرمەك امانشاەۆ: «بۇل فەستيۆالدىڭ ساپاسى جىلدان-جىلعا ارتىپ, ەلىمىزدەگى مادەني برەندكە اينالىپ جاتىر. بيىل الەمنىڭ 10 ەلىنىڭ تالانتتى جاستارى ەلوردادا باس قوستى. قازىلار القاسىنىڭ قۇرامىندا 15 ەلدەن كەلگەن كورنەكتى مادەنيەت وكىلدەرى بار. بارلىق قولداۋ كورسەتۋشىلەرگە العىس بىلدىرەمىن», دەدى.
حالىقارالىق ونەر بايقاۋىنىڭ جەڭىمپازدارى اقشالاي سىيلىقتارمەن جانە «شابىت» فەستيۆالىنىڭ ديپلومدارىمەن ماراپاتتالدى.
قارلىعاش قۇرامىس,
«ەگەمەن قازاقستان»