اقتاۋ قالاسىندا قازاقستان رەسپۋبليكاسىنىڭ پارلامەنتى سەناتى مەن رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ىنتىماقتاستىق جونىندەگى كوميسسياسىنىڭ 13-ءشى وتىرىسى بولدى. قازاقستان مەن رەسەي سەناتورلارى كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ ماسەلەسىن تالقىلاعان وتىرىسقا يران دەلەگاتسياسى دا قاتىستى.
شارانى اشقان سەنات توراعاسىنىڭ ورىنباسارى سەرگەي گروموۆ كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلعان كاسپي ماڭى مەملەكەتتەرى باسشىلارىنىڭ اقتاۋ ءسامميتىنىڭ قورىتىندىلارىن استانا جوعارى باعالايتىنىن اتاپ ءوتتى.
قازاقستان پرەزيدەنتى نۇرسۇلتان نازارباەۆ اتاپ وتكەندەي, اتالعان كونۆەنتسيا تەڭىز سۋىن, ءتۇبىن, قويناۋىن, تابيعي رەسۋرستارى مەن اۋە كەڭىستىگىن قوسا العاندا وسى سۋ ايدىنىنا قاتىستى تاراپتاردىڭ بارلىق قۇقىقتارى مەن مىندەتتەمەلەرى ايقىندالعان جانە رەتتەلگەن «كاسپي تەڭىزىنىڭ كونستيتۋتسياسى» بولىپ تابىلادى. سونداي-اق بۇل قۇجات تەڭىزدەگى قۇقىقتار مەن ەگەمەندىكتىڭ اراجىگىن اجىراتۋعا, قويناۋىن پايدالانۋ, ترانزيت پەن تاسىمالداۋ قۇقىقتارىن جۇزەگە اسىرۋعا, سۋ استى قۇبىرلارى مەن جەلىلەردى جۇرگىزۋگە, تابيعي ورتا مەن بيولوگيالىق رەسۋرستاردى قورعاۋعا بايلانىستى اۋقىمدى ماسەلەلەردى قامتيدى.
س.گروموۆ ەرەكشە قۇجاتقا قول قويۋ جونىندەگى كەلىسىمگە كەلۋدەگى رەسەي مەن يراننىڭ ۇلەسىن جوعارى باعالادى. ول كونۆەنتسياعا قول قويىلۋى ەرەكشە سۋ ايدىنىنا ەكىجاقتى دەڭگەيدە دە, كوپتاراپتى سيپاتتا دا بەيبىتشىلىك پەن ءوزارا ءتيىمدى ىنتىماقتاستىق ايماعى مارتەبەسىن بەكىتۋگە مۇمكىندىك بەرەتىنىن اتاپ ءوتتى.
ءسوز العان رەسەي فەدەراتسياسى فەدەرالدىق جينالىسى فەدەراتسيا كەڭەسى اگرارلىق-ازىق-ت ۇلىك ساياساتى جانە تابيعاتتى پايدالانۋ كوميتەتى توراعاسىنىڭ ورىنباسارى سەرگەي بەلوۋسوۆ, يران يسلام رەسپۋبليكاسى كونسۋلتاتيۆتىك كەڭەسى توراعاسىنىڭ ءبىرىنشى ورىنباسارى ماسۋد پەزەشكيان كونۆەنتسيانى ۋاقىتىندا راتيفيكاتسيالاۋدىڭ ماڭىزى تۋرالى ايتتى.
وتىرىس بارىسىندا ەكى ەلدىڭ سەناتورلارى مەن وكىلدەرى ءبىرتۇتاس ەكونوميكالىق كەڭىستىك اياسىندا ماڭعىستاۋ وبلىسى مەن رەسەيدىڭ داعىستان رەسپۋبليكاسىن مىسال ەتە وتىرىپ, شەكارالىق ايماقتاردى دامىتۋدى, كاسپيدەگى تۋريزم, ەكولوگيا مەن بيورەسۋرستاردى قورعاۋ سالاسىنداعى ىنتىماقتاستىقتى دامىتۋ ماسەلەلەرىن تالقىلادى.
س.گروموۆ پەن م.پەزەشكياننىڭ كەزدەسۋىندە پارلامەنتارالىق ىنتىماقتاستىق جانە ەكىجاقتى قاتىناستاردى, ونىڭ ىشىندە پارلامەنتارالىق ۇنقاتىسۋلاردى ودان ءارى نىعايتۋ ماسەلەلەرى دە تالقىلاندى.
وتىرىسقا قازاقستاندىق سەناتورلار جەڭىس نۇرعاليەۆ, ولگا پەرەپەچينا, ميحايل بورتنيك, عۇمار دۇيسەمباەۆ جانە باقتىباي شەلپەكوۆ قاتىستى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى