اتىراۋ قالاسى كۇن ساناپ كوركەيىپ كەلەدى. جاڭا عيماراتتار بوي تۇزەپ, ساياباقتارعا ءسان كىرىپ, الەۋمەتتىك نىساندار قاتارى ارتتى. كولىك كوبەيگەندىكتەن بۇرىنعى تار كوشەلەر قولايسىزدىق تۋعىزاتىن ەدى, ەندى بۇل ماسەلەنىڭ دە شەشىمى تابىلدى.
قالانىڭ ءۇش ورتالىق كوشەسىن قايتا جاڭعىرتۋ جانە كەڭەيتۋ جوباسى اياقتالدى. بايمۇحانوۆ, ۆلاديميرسكي, تايمانوۆ كوشەلەرى كەڭىپ, جۇرگىزۋشىگە دە, جولاۋشىعا دا جايلى جاعداي جاسالدى. «اتىراۋينجستروي» جشس جول جيەكتەرىن ورناتۋ, جاياۋ جۇرگىنشىلەر جولى مەن درەناج ناۋالارىن سالۋ, سۋارۋ قۇبىرلارىن جۇرگىزۋ, تۇراقتار جانە وڭ جاق باعىتتاعى وتەتىن جولدار سالۋ, ايالداما پاۆيلوندارىن ورناتۋ, كوشە جارىعىن اۋىستىرۋ مەن جول بەلگىلەرىن سالۋ سەكىلدى جۇمىستاردى ۋاقىتىندا جانە ساپالى ورىندادى.
– جوبانى ىسكە اسىرۋ جولداردا اۆتوموبيل قوزعالىسىنىڭ قارقىندى وسۋىمەن, سونداي-اق كولىك سانىنىڭ كوبەيۋىنەن تۋىندادى. ۇنەمى كولىك كەپتەلىسى بولاتىن, قوزعالىس كەزىندە قولايسىزدىقتار تۋىندايتىن كوشەلەردەگى قوزعالىستى جەڭىلدەتۋ ءۇشىن جولاقتاردى ۇلعايتۋ جۇرگىزىلدى, – دەيدى اتىراۋ قالاسى əكىمىنىڭ ورىنباسارى نۇرلان تاۋباەۆ.
ءبىر اتاپ وتەرلىگى, جول قۇرىلىسى كەزىندە جەرگىلىكتى اسفالتبەتون زاۋىتىنىڭ ءونىمى قولدانىلعان. بۇرىنعى درەناج ناۋالارى ساقتالىپ, جاڭالارى سالىندى. جاۋىن-شاشىن سۋى مەن ەرىگەن سۋدىڭ اعىپ كەتۋى ءۇشىن جولداردى بويلاي جيىرما تەكشە مەتر جەراستى سىيىمدىلىعى ورناتىلدى. جوندەلگەن كوشەلەردىڭ بويىندا جاڭا تۇراق الاڭدارى سالىندى. قازىر جوبا اياسىندا 23 ايالداما پاۆيلوندارىن ورناتۋ جانە كوشە جارىعىن اۋىستىرۋ جۇمىسى ءجۇرىپ جاتىر.
باقىتگۇل باباش,
«ەگەمەن قازاقستان»
اتىراۋ