قازاقستان مەن برازيليانىڭ قارىم-قاتىناستارىنىڭ تاريحىندا تۇڭعىش رەت ەلىمىزگە وسى مەملەكەتتىڭ سىرتقى ىستەر ءمينيسترى رەسمي ساپارمەن كەلدى.
ساپار اياسىندا قازاقستاننىڭ سىرتقى ىستەر ءمينيسترى قايرات ءابدىراحمانوۆ وڭتۇستىك امەريكا قۇرلىعىنان كەلگەن ارىپتەسى الويزيو نۋنەس فەررەيرامەن رەسمي كەزدەسۋ وتكىزدى.
كەزدەسۋ بارىسىندا ق.ءابدىراحمانوۆ ا.فەررەيرانى وتكەن جەكسەنبى كۇنى برازيلياداعى پرەزيدەنت سايلاۋىنىڭ وتۋىمەن قۇتتىقتادى.
– برازيليا ءبىزدىڭ وڭتۇستىك امەريكا مەن لاتىن امەريكاسىنداعى جانە حالىقارالىق ارەناداعى باستى سەرىكتەسىمىز. ەكى ەل گەوگرافيالىق تۇرعىدا الشاق جاتقانىمەن, ءبىزدى دوستىق پەن ىنتىماقتاستىق, ءوزارا سىيلاستىق, ءارى قارايعى ءتيىمدى قارىم-قاتىناستارعا مۇددەلىلىك بايلانىستىرادى, – دەدى ق.ءابدىراحمانوۆ.
مينيسترلەر ەكى مەملەكەتتىڭ ساۋدا-ەكونوميكالىق, ينۆەستيتسيالىق باعىتتاردا ءوزارا بايلانىسىن نىعايتا ءتۇسۋ قاجەت دەگەن توقتامعا كەلدى. وتكەن جىلى مەملەكەتتەر اراسىنداعى ساۋدا اينالىمى 135 ملن اقش دوللارىنا جەتكەن.
ال برازيليانىڭ اۋىل شارۋاشىلىعى سالاسىندا الەمدەگى كوشباسشىلاردىڭ ءبىرى بولۋى دا ىنتىماقتاستىقتىڭ جاڭا قىرلارىن اشۋعا سەپتىگىن تيگىزبەك.
وعان قوسا, 2016 جىلدان باستاپ قازاقستان مەن برازيليا اراسىندا ۆيزاسىز رەجىم ەنگىزىلگەن.
ال بيىل ەلىمىز العاش رەت برازيلياعا ۋران تاسىمالداي باستادى. اتاپ ايتقاندا, «قازاتومپروم» ۇاك» اق برازيليانىڭ «INB» كاسىپورنىنىڭ حالىقارالىق تەندەرىن جەڭىپ العان بولاتىن.
– قازاقستان ءوز تاراپىنان برازيليامەن جاسىل تەحنولوگيالار, ەنەرگەتيكا, اسكەري-تەحنيكالىق, عارىش جانە تۋريزم سالاسىندا بايلانىستاردى جانداندىرۋعا مۇددەلى, – دەدى ق.ءابدىراحمانوۆ.
ال كوپجاقتى قارىم-قاتىناستارعا كەلەر بولساق, قازاقستان مەن برازيليانىڭ حالىقارالىق بەيبىتشىلىك جانە قاۋىپسىزدىك ماسەلەلەرىنە بايلانىستى كوزقاراستارى ۇقساس.
سونىمەن قاتار مەملەكەت باسشىسى نۇرسۇلتان نازارباەۆتىڭ «تاۋەلسىزدىك ءداۋىرى» اتتى كىتابى الداعى جىلى برازيليادا پورتۋگال تىلىندە جارىققا شىعاتىندىعى ايتىلدى. وسى ارقىلى قازاقستان پرەزيدەنتى باستاماشىلىق ەتكەن «رۋحاني جاڭعىرۋ» باعدارلاماسى وڭتۇستىكامەريكالىق قۇرلىقتا دا تاجىريبە جۇزىندە ىسكە اسىرىلماق.
كەزدەسۋ بارىسىندا ءوزارا قارىم-قاتىناستاردىڭ باسىم باعىتتارى بەلگىلەندى.
سەرىك ابدىبەك,
«ەگەمەن قازاقستان»