ۇزاق جىلدار بويىنا ءوندىرىسى توقتاپ, تالان-تاراجعا ءتۇسىپ كەتۋگە شاق قالعان اقسۋ قانت زاۋىتىنا وسىدان 2 جىل بۇرىن قايتا كوڭىل ءبولىنىپ, جاڭعىرتۋ جۇمىستارى باستالعان بولاتىن. بيىل جوندەۋ جۇمىستارى اياقتالىپ, زاۋىت تولىق قۋاتىندا جۇمىس ىستەۋگە كوشتى.
جيىن-تەرىن ماۋسىمى باستالعالى بەرى جانسۇگىروۆ كەنتىندە ورنالاسقان قانت زاۋىتى 80 000 توننا قىزىلشا قابىلداپ ۇلگەرگەن ەكەن. زاۋىتقا نەگىزىنەن اقسۋ اۋدانىنىڭ شارۋالارى ونىمدەرىن وتكىزۋدە, ولاردان قازىرگە دەيىن قابىلدانعان ءتاتتى ءتۇبىر مولشەرى 45 000 تونناعا جەتكەن. مۇنان بولەك كورشىلەس سارقان, الاكول اۋداندارىنىڭ القابىندا وسكەن قانت قىزىلشاسى دا وسىندا تاسىمالدانىپ جاتىر.
نەگىزى اقسۋ قانت زاۋىتى بىلتىردان باستاپ ءونىم شىعارا باستادى. قۇرىلتايشىلار وبلىس اكىمدىگىنىڭ كومەگىمەن قايتا جاڭعىرتۋدىڭ العاشقى كەزەڭى اياقتالا بەرە, جەرگىلىكتى شارۋالار وسىرگەن قىزىلشانى ساتىپ الىپ, ۇزاق جىل بويىنا جۇمىسى ىستەمەي تۇرعان ءوندىرىستى ىسكە قوسقان. ءوندىرىس بارىسىنداعى كەمشىلىكتەر انىقتالىپ, جوندەۋ جۇمىستارى قايتا جالعاسقان. بيىل جاڭعىرتۋدىڭ ەكىنشى كەزەڭى تولىقتاي اياقتالىپ, زاۋىت ءوز قۋاتىندا شيكىزات قابىلداپ قانا قويماي, تازا ءونىم شىعارۋعا كىرىستى. ونىمدىلىك 30 پروتسەنتكە ارتادى دەگەن بولجام بار.
- اقسۋ قانت زاۋىتىنىڭ ىسكە قوسىلۋى ءبىز ءۇشىن ۇلكەن قۋانىش بولىپ وتىر. قانت قىزىلشاسى ءوڭىرىمىزدىڭ نەگىزگى داقىلى. بۇعان دەيىن جينالعان ءونىمدى كوكسۋعا تاسيتىنبىز. بۇل قوسىمشا شىعىن ەدى. ەندى ءوز اۋدانىمىزداعى وندىرىسكە تاسىمالدايمىز, - دەيدى «كۆيتكو» شارۋا قوجالىعىنىڭ باسشىسى الەكساندر كۆيتكو.
قالماحانبەت مۇقامەتقالي,
«ەگەمەن قازاقستان»
الماتى وبلىسى