مەملەكەت باسشىسى ساۋد ارابياسى كورولدىگىنىڭ ىشكى ىستەر ءمينيسترى ابدەل ءازيز بەن ساۋد بەن نايفپەن كەزدەستى, دەپ حابارلايدى اقوردانىڭ ءباسپاسوز قىزمەتى.
كەزدەسۋ بارىسىندا تاراپتار قازاقستان مەن ساۋد ارابياسى اراسىنداعى ىنتىماقتاستىقتى كەڭەيتۋ ماسەلەلەرىن تالقىلادى.
قازاقستان پرەزيدەنتى ەكى ەل اراسىنداعى قارىم-قاتىناستى نىعايتۋعا ابدەل ءازيز بەن ساۋد بەن ءنايفتىڭ زور ۇلەس قوسقانىن اتاپ ءوتتى.
– ساۋد ارابياسى – يسلام الەمىندەگى ءبىزدىڭ ماڭىزدى ءارى سەنىمدى سەرىكتەسىمىز. ءبىز ەكى مەملەكەت اراسىنداعى ساياسي جانە ەكونوميكالىق بايلانىستاردى ودان ءارى تەرەڭدەتۋگە نيەتتىمىز. سوندىقتان مەن ساۋد ارابياسىنىڭ كورولى سالماندى جانە تاق مۇراگەرىن قازاقستانعا شاقىردىم, – دەدى نۇرسۇلتان نازارباەۆ.
ساۋد ارابياسى كورولدىگىنىڭ ىشكى ىستەر ءمينيسترى كەزدەسۋگە مۇمكىندىك العانى ءۇشىن مەملەكەت باسشىسىنا ريزاشىلىق ءبىلدىرىپ, قازاقستانعا ساۋد ارابياسىنىڭ جوعارى باسشىلىعىنىڭ تاپسىرماسى بويىنشا كەلگەنىن ايتتى.