«تۇرعىن ءۇي قۇرىلىس جيناق بانكى» «نۇرلى جول» مەملەكەتتىك تۇرعىن ءۇي باعدارلاماسى بويىنشا استانا قالاسىنداعى №227 كوشەسىندە بوي كوتەرگەن ءۇش تۇرعىن ءۇي كەشەنىندەگى پاتەرلەردى ساتىلىمعا شىعارماق. بۇل تۋرالى بانكتىڭ بۇكىلالەمدىك جيناق كۇنىنە وراي ۇيىمداستىرىلعان ءباسپاسوز تۋرىندا بەلگىلى بولدى.
ءباسپاسوز تۋرى بارىسىندا بانك قىزمەتكەرلەرى جاڭادان سالىنعان تۇرعىن ۇيلەردى جۋرناليستەرگە كورسەتىپ, ونىڭ قانداي جولمەن بەرىلەتىنىن ءتۇسىندىردى. جاڭا پاتەر يەلەرى كونكۋرس نەگىزىندە انىقتالماق. كونكۋرسقا اتالعان بانكتىڭ كەز كەلگەن سالىمشىسى قاتىسا الادى. پاتەردىڭ تولىق باعاسىنىڭ 20 %-نا تەڭ باستاپقى جارناسىن ءۇش جىل بويى جيناعان سالىمشىلاردىڭ 2018 جىلدىڭ 6 قاراشاسىنا دەيىن ءوتىنىش تاپسىرۋعا مۇمكىندىگى بار. كونكۋرس ناتيجەسى 7 قاراشادا بەلگىلى بولادى.
364 پاتەردىڭ جارتىسى «تۇرعىن ءۇي قۇرىلىس جيناق بانكىنىڭ» سالىمشىلارىنا بەرىلسە, قالعان جارتىسى استانا قالاسى اكىمدىگىندە كەزەكتە تۇرعان ازاماتتارعا تابىستالادى. تولىق ارلەنگەن پاتەرلەردىڭ 1 شارشى مەترىنىڭ قۇنى – 180 مىڭ تەڭگە. بۇل نارىقتىق باعادان ەكى ەسەدەي تومەن.
جاڭا كەشەن 37-40 شارشى مەتر بولاتىن 1 بولمەلى – 75 پاتەردەن, 2 بولمەلى – 168, 3 بولمەلى 121 پاتەردەن تۇرادى. ءار ءۇيدىڭ ءبىرىنشى قاباتىندا بالالارعا ارنالعان ورتالىقتار بار, كەشەن جانىنان مەكتەپ سالىنىپ جاتقانىن دا بايقادىق.
«تۇرعىن ءۇي قۇرىلىس جيناق بانكىنىڭ» ورتالىق فيليالىنىڭ ديرەكتورى جانسۇلتان ماتاەۆتىڭ ايتۋىنشا, جىل سايىن باعدارلاماعا قىزىعۋشىلىق تانىتۋشىلار قاتارى ءوسىپ كەلەدى.
– تۇرعىن ءۇي قۇرىلىس جيناق جۇيەسى قاتىسۋشىلارىنىڭ ۇلەسى 2015 جىلى 7,1% دەڭگەيىندە بولسا, قازىر 13,1%-دى قۇرايدى. قازىر تۇرعىن ءۇي قۇرىلىس جيناق جۇيەسىنىڭ قولدانۋشىلار سانى 1,2 ميلليونعا جەتتى. بانك ازاماتتارعا جىلدىق مولشەرلەمەسى 3,5-5% ارالىعىندا زايم الۋعا مۇمكىندىك بەرەدى. رەسپۋبليكا بويىنشا بانكتىڭ جالپى جيناق سوماسى 562,3 ميلليارد تەڭگەنى قۇرايدى. قولدانۋشىلار كورسەتكىشى بويىنشا استانا قالاسى الدا تۇر. ەلوردا تۇرعىندارىنا تيەسىلى «تۇرعىن ءۇي قۇرىلىس جيناق بانكى» دەپوزيتتەرىنىڭ سانى – 170 771, – دەيدى ول.
اتالعان بانك «نۇرلى جەر» مەملەكەتتىك تۇرعىن ءۇي باعدارلاماسى اياسىندا بۇعان دەيىن استانا قالاسى بويىنشا 620 پاتەر ساتقان. جىل سوڭىنا دەيىن بۇل كورسەتكىش 984-كە جەتەدى دەپ جوسپارلاپ وتىر. 2019 جىلى مەملەكەتتىك باعدارلاما اياسىندا تاعى 1825 پاتەر ساتىلادى دەپ كۇتىلۋدە.
سۆەتلانا عالىمجانقىزى,
«ەگەمەن قازاقستان»