مەملەكەت باسشىسى نۇرسۇلتان نازارباەۆتىڭ حالىققا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ايقىندالعان ماقساتتاردىڭ جۇزەگە اسىرىلۋىنا قاتىستى جۇمىستارمەن تانىسۋ ءۇشىن پرەمەر-مينيستر باقىتجان ساعىنتاەۆ الماتى وبلىسىنا جۇمىس ساپارىمەن كەلدى.
ۇكىمەت باسشىسى الدىمەن تالدىقورعان اۋەجايىنىڭ جاڭادان پايدالانۋعا بەرىلگەن تەرمينالىنىڭ جۇمىسىمەن تانىستى. تولىق جاڭعىرتۋدان وتكەن اۋەجاي تەرمينالى ەل ءىشى مەن حالىقارالىق اۋە قاتىناسىنا قىزمەت كورسەتۋگە لايىقتالىپ جابدىقتالعان. تۇرعىندار سانى 2 ملن ادامنان اسقان جەتىسۋ وڭىرىندە اۋە جولىن تۇتىنۋشىلار قاتارى جىل سايىن ارتىپ كەلەدى. وڭىردەگى ءتۋريزمنىڭ دامۋى حالىقارالىق اۋە باعىتى بويىنشا قىزمەت كورسەتۋگە دە سۇرانىس تۋدىرىپ وتىر. وسى جەردە ب.ساعىنتاەۆقا ءۇشارال قالاسىنداعى كۇردەلى جوندەۋدەن وتكەن اۋەجايدىڭ قىزمەتى تانىستىرىلدى. بيىلعى كوكتەمدە الاكول اۋدانىندا وتاندىق ءتۋريزمدى دامىتۋعا ارنالعان جيىن بارىسىندا مەملەكەت باسشىسى نۇرسۇلتان نازارباەۆ تۋريستەردىڭ اۋە قاتىناسىنا دەگەن سۇرانىسىن ەسكەرۋدى, سوندىقتان ءۇشارال اۋەجايىن تالاپقا ساي جوندەۋدى تاپسىرعان بولاتىن. قىسقا مەرزىمدە تولىقتاي جوندەلگەن اۋەجاي ماۋسىم كەزىندە ەل اۋماعىنان بولەك رەسەيدىڭ بىرنەشە قالاسىنان تىكەلەي اۋە رەيستەرىن قابىلدادى.
ۇكىمەت باسشىسى مۇنان كەيىن پانفيلوۆ اۋدانىنداعى «نۇر جولى» اۆتوكولىك وتكىزۋ بەكەتىنە باردى. تاۋلىگىنە 2200 جۇك كولىگى مەن 300-دەن استام جولاۋشىلار كولىگىنە قىزمەت كورسەتەتىن كەدەن وتكەلى جاقىندا پايدالانۋعا بەرىلگەن بولاتىن. ساپار «قورعاس» شەكارا ماڭى حالىقارالىق ىنتىماقتاستىق ورتالىعىندا جالعاسىپ, شەكارانىڭ قازاقستاندىق بولىگىندە ورىن تەپكەن «سامۇرىق» الاڭىن ارالاۋعا ۇلاستى. جالپى بۇل ورتالىق كۇنىنە 5 مىڭ ادامعا قىزمەت كورسەتەدى. سونداي-اق ب.ساعىنتاەۆ وسى اۋداندا جاڭادان بوي كوتەرگەن «نۇركەنت» قالاشىعىنىڭ تىنىس-تىرشىلىگىمەن دە تانىستى. قۇرىلىسى 2013 جىلى باستالعان نۇركەنت قالاسىنىڭ جالپى اۋماعى 1460 گا. بولاشاقتا قالا حالقىنىڭ سانى 100 مىڭ ادامعا جەتەدى دەپ كۇتىلۋدە. 2022 جىلعا دەيىن نۇركەنتتە اۋماعى 1 ملن شارشى مەتردى قۇرايتىن تۇرعىن ءۇي پايدالۋعا بەرىلمەكشى. قازىر قۇرىلىس قىزۋ ءجۇرىپ جاتىر. بۇل 50 مىڭ ادامنىڭ باسپانالى بولۋىنا جول اشپاق.
تالدىقورعان قالاسىندا قايتا جالعاسقان جۇمىس ساپارى «سالتانات سارايىمەن» تانىستىقتان كەيىن وبلىستىڭ دەنساۋلىق ساقتاۋ سالاسى قىزمەتكەرلەرىمەن كەزدەسۋگە ۇلاستى. جيىندا ۇكىمەت باسشىسى مەملەكەت باسشىسى نۇرسۇلتان نازارباەۆتىڭ جۋىرداعى جولداۋىندا ايتىلعان الەۋمەتتىك باعىتتاردىڭ باسىمدىعىنا ءمان بەرىپ, مەديتسينا قىزمەتكەرلەرىنىڭ الدىندا تۇرعان جاۋاپتى مىندەتتەر جايىنا توقتالدى. ۇكىمەت باسشىسى جولداۋ جۇكتەگەن مىندەت بويىنشا 2019-2020 جىلدار ارالىعىندا دەنساۋلىق ساقتاۋ قىزمەتكەرلەرى, ونىڭ ىشىندە ۋچاسكەلىك دارىگەرلەر مەن مەدبيكەلەردىڭ ەڭبەكاقىسى 20 پايىزعا وسەتىنىن ايتتى. بۇل ەلىمىز بويىنشا 10 مىڭ ۋچاسكەلىك دارىگەر مەن 30 مىڭ مەدبيكەنىڭ ايلىق تابىسىن ەسەلەپ ارتتىرۋعا مۇمكىندىك بەرمەك. كەزدەسۋدە وبلىستاعى مەديتسينالىق ۇيىمداردىڭ وكىلدەرى دەنساۋلىق ساقتاۋ جۇيەسىن دامىتۋعا قاتىستى ءوز كوزقاراستارىن ءبىلدىردى, سونىڭ ىشىندە مەملەكەت باسشىسىنىڭ جولداۋىن ىسكە اسىرۋ اياسىنداعى پىكىرلەرىن ورتاعا سالدى. مىسالى, تالدىقورعان قالالىق كوپسالالى اۋرۋحاناسىنىڭ ديرەكتورى ساۋلە قۇسمولدانوۆا جالاقىنىڭ 20 پايىزعا كوتەرىلۋى قىزمەتكەرلەردىڭ جۇمىسقا ىنتاسىن ارتتىرىپ, وبلىستاعى دەنساۋلىق ساقتاۋ مەكەمەلەرىنە بىلىكتى كادرلاردىڭ كەلۋىنە جول اشاتىنىن ايتتى. جالپى, مەملەكەت قولداۋىنىڭ ارقاسىندا وڭىردەگى ەمحانالاردىڭ تەحنيكامەن جابدىقتالۋى 94 پايىزعا جەتكەن. بۇل ءۇردىس نەگىزىنەن اۋىلدىق ايماقتاردا جۇزەگە اسىرىلۋدا.
ب.ساعىنتاەۆ كەلەسى كەزەكتە كورمە ورتالىعىندا الماتى وبلىسىنىڭ الەۋمەتتىك-ەكونوميكالىق دامۋ بارىسىمەن تانىستى. وبلىستىڭ ەكونوميكالىق الەۋەتى جايلى اڭگىمەلەگەن ايماق باسشىسى اماندىق باتالوۆ پرەمەر-مينيسترگە سوڭعى ءتورت جىلدا ءوڭىر ەكونوميكاسىنىڭ ءوسىمى 4,2 پايىزعا جەتكەنىن ايتتى. ال بيىلعى جارتىجىلدىڭ قورىتىندىسى بويىنشا الماتى وبلىسىنىڭ جالپى وڭىرلىك ءونىمى ءبىرىنشى جارتىجىلدىقتا 1,09 ترلن تەڭگەنى قۇرادى. جالپى رەسپۋبليكاعا شاققانداعى شارۋاشىلىق ءونىمىنىڭ 17 پايىزىن جەتىسۋ ءوڭىرى بەرىپ وتىر. مەملەكەت باسشىسى بيىلعى جولداۋىن جاريا ەتكەن جيىندا الماتى وبلىسىنداعى سەرپىندى جۇمىستى اتاپ ايتىپ, لايىقتى باعا بەرگەن بولاتىن. وسى جەردە پرەمەر-مينيستر وڭىردەگى كاسىپكەرلەرمەن كەزدەسۋ وتكىزدى. كەزدەسۋدە ەل ەكونوميكاسىن دامىتۋداعى كاسىپكەرلەردىڭ ۇلەسى مەن جاۋاپكەرشىلىگىنە ماڭىز بەرگەن ۇكىمەت باسشىسى مەملەكەت-جەكەمەنشىك ارىپتەستىگى اياسىندا جاسالىپ جاتقان جۇمىستارعا وراي كاسىپكەرلەردىڭ پىكىرىنە قۇلاق استى. ءوز كەزەگىندە ءسوز العان وڭىردەگى قۋاتتى كاسىپورىندار مەن بيزنەس-قاۋىمداستىق باسشىلارى ەلباسى جولداۋىندا ايتىلعان جالاقىنىڭ ەڭ تومەنگى مولشەرىن كوتەرۋ تۋرالى شەشىمدى قۋاتتايتىنىن جەتكىزدى.
– قازىر بىزدە 160 ادام جۇمىس ىستەيدى. ءبىز ءوز جۇمىسكەرلەرىمىزدىڭ جالاقىسىن ۇنەمى كوتەرىپ وتىرۋعا تىرىسامىز. بۇعان دەيىن بارلىق جۇمىسكەردىڭ جالاقىسىن 50 پايىزعا كوتەردىك. ەلباسى جولداۋىنان كەيىن ەڭبەكاقىنى تاعى كوتەرۋ كەرەك دەگەن شەشىمگە كەلدىك. ويتكەنى حالىقتىڭ ءال-اۋقاتىن شىنىمەن دە ارتتىرۋ كەرەك. وسى جولى ءبىز جالاقىنى تاعى دا 15 پايىزعا وسىرەمىز, – دەيدى «الماتى بوياۋلارى» جشس ديرەكتورلار كەڭەسىنىڭ ءتورايىمى ريمما سالىقوۆا.
سونداي-اق پرەمەر-مينيستر تالدىقورعاندا بيىل ىسكە قوسىلعان №28 مەكتەپ-ليتسەيدەگى زاماناۋي اقپاراتتىق تەحنولوگيالاردىڭ وقىتىلۋ بارىسىمەن تانىسىپ, ءوڭىر ۇستازدارى مەن اتا-انالار قاۋىمداستىعى وكىلدەرىمەن جۇزدەستى. كەزدەسۋدە الداعى ءۇش جىلدا جولداۋدى ىسكە اسىرۋعا 1,75 ترلن تەڭگە جۇمسالاتىنىن ايتقان پرەمەر-مينيستر ۇكىمەت ەڭ تومەنگى جالاقىنى 1,5 ەسەگە, ياعني 28 مىڭنان 42 مىڭ تەڭگەگە دەيىن ارتتىرۋعا دايىن ەكەنىن جەتكىزدى. ونىڭ ىشىندە پەداگوگيكالىق قىزمەتكەرلەردىڭ ەڭبەكاقىسى 35 پايىزعا كوبەيمەك. ال ءبىلىم سالاسىن قارجىلاندىرۋ 2,4 ترلن تەڭگەگە دەيىن ارتادى.
كۇن تارتىبىندەگى مىندەتتەرگە وراي وبلىستا تسيفرلاندىرۋ باعدارلاماسىن جۇزەگە اسىرۋ ماقساتىندا 21 روبوتتى تەحنيكا كابينەتى, 11 IT-سىنىبى جانە 2 IT-ورتالىق اشىلعان. ال ەلباسى جولداۋىندا ناقتىلانعان 3 اۋىسىمدى مەكتەپتەردىڭ سانىن ازايتۋ جونىندەگى جۇمىستار بويىنشا ايماقتا 22 ءبىلىم بەرۋ نىسانى سالىنىپ جاتىر. جىل سوڭىنا دەيىن 2 مەكتەپتىڭ, 1 بالاباقشا مەن 1 مۋزىكا مەكتەبىنىڭ قۇرىلىسى اياقتالادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى