سىرتقى ىستەر ءمينيسترى قايرات ءابدىراحمانوۆ قىرعىزستاننىڭ سىرتقى ىستەر ءمينيسترى چينگيز ايداربەكوۆپەن كەلىسسوزدەر وتكىزدى. چ. ايداربەكوۆ قىرعىزستاننىڭ ءسىم باسشىسى رەتىندە استاناعا ءوزىنىڭ العاشقى جۇمىس ساپارىمەن كەلدى, دەپ حابارلايدى ءسىم ءباسپاسوز قىزمەتى.
ء«بىز باۋىرلاس قىرعىزستانمەن قارىم-قاتىناسقا ەرەكشە ءمان بەرىپ, ونى ستراتەگيالىق سەرىكتەس ءارى جاقسى كورشى رەتىندە سانايمىز», - دەدى كەزدەسۋدە ق. ءابدىراحمانوۆ.
تاراپتار وڭىرلىك كووپەراتسيا, شەكارالىق سەرىكتەستىك, سۋ-ەنەرگەتيكا سالاسى, ساۋدا-ەكونوميكالىق ىنتىماقتاستىق ماسەلەلەردىڭ كەڭ اۋقىمى بويىنشا پىكىر الماستى.
ء«بىزدىڭ باستى ماقساتىمىز - قازاقستان پرەزيدەنتى نۇرسۇلتان نازارباەۆ پەن قىرعىزستان پرەزيدەنتى سوورونباي جەەنبەكوۆ اراسىنداعى استانا جانە چولپان-اتادا قول جەتكىزىلگەن ۋاعدالاستىقتاردى جۇزەگە اسىرۋ. ءبىز پرەزيدەنتتەردىڭ كوپتەگەن تاپسىرمالارى ورىندالعانىنا جانە الداعى جوسپارلاردى جۇزەگە اسىرۋدا تاراپتاردىڭ بەلسەندى ءوزارا ءىس-قيمىلى جالعاساتىندىعىن قاناعاتتانۋشىلىقپەن اتاپ وتەمىز», - دەدى قازاقستاندىق مينيستر. كەزدەسۋ بارىسىندا ءوزارا ساۋدا-ساتتىق كولەمىن ۇلعايتۋعا جانە ونىڭ قۇرىلىمىن ارتاراپتاندىرۋعا, ەكونوميكانىڭ جاڭا سەكتورلارىندا بىرلەسكەن ينۆەستيتسيالىق جوبالاردى ىسكە اسىرۋعا, سونىڭ ىشىندە «استانا» حالىقارالىق قارجى ورتالىعىن تارتۋعا باعىتتالعان پراكتيكالىق شارالاردى جۇزەگە اسىرۋعا ءوزارا تىلەك ءبىلدىرىلدى. ەكى ەلدىڭ بيزنەس-قۇرىلىمدارى ءۇشىن ەلەكتروندىق ساۋدا, قارجى قىزمەتتەرى, وڭدەۋ جانە ازىق-ت ۇلىك ونەركاسىبى, سونداي-اق تسيفرلىق يندۋستريا سياقتى سالالاردا ءوزارا ءتيىمدى ىنتىماقتاستىقتى اشۋ بويىنشا جاڭا مۇمكىندىكتەر اشىلۋدا.
ەۋرازيالىق كەڭىستىكتە بەيبىتشىلىك پەن تۇراقتىلىقتى نىعايتۋعا جاردەمدەسۋگە دەگەن ورتاق نيەت ايتىلدى. حالىقارالىق ساياساتتىڭ وزەكتى ماسەلەلەرى بويىنشا ۇقساس ۇستانىمداردى انىقتاي وتىرىپ, تاراپتار بۇۇ, شانحاي ىنتىماقتاستىق ۇيىمى, ۇجىمدىق قاۋىپسىزدىك تۋرالى شارت ۇيىمى, ەۋرازيالىق ەكونوميكالىق وداق, ازياداعى ءوزارا ىقپالداستىق جانە سەنىم شارالارى جونىندەگى كەڭەسى, تۇركىتىلدەس مەملەكەتتەردىڭ ىنتىماقتاستىق كەڭەسى, ەۋروپاداعى قاۋىپسىزدىك جانە ىنتىماقتاستىق ۇيىمى جانە باسقا دا كوپجاقتى قۇرىلىمدار شەڭبەرىندەگى ىنتىماقتاستىقتى جانداندىرۋ نيەتىن راستادى.
«ەكى حالىقتىڭ مادەني-تاريحي جانە تىلدىك ورتاقتىعى مادەنيەت, ونەر, عىلىم, تۋريزم جانە باسقا دا سالالارداعى ىنتىماقتاستىقتى ودان ءارى كەڭەيتۋ ءۇشىن جاقسى نەگىز بولىپ تابىلادى. ءبىز مادەني الماسۋعا جان-جاقتى كومەك كورسەتىپ, وسى سالالاردا بايلانىستاردى قولدايمىز», - دەدى قازاقستان سىرتقى ساياسي ۆەدومستۆوسىنىڭ باسشىسى.
قازاقستاندىق ستاتيستيكالىق مالىمەتكە سايكەس, 2018 جىلدىڭ العاشقى جەتى ايىندا قازاقستان مەن قىرعىزستان اراسىنداعى ءوزارا ساۋدا كولەمى 18 پايىزعا ءوسىپ, 486 ملن. اقش دوللارىن قۇرادى.