«تاتۋلاسۋ: سوتقا دەيىن, سوتتا» پيلوتتىق جوباسى اياسىندا سولتۇستىك قازاقستانعا جۇمىس ساپارمەن كەلگەن جوعارعى سوتتىڭ جۇمىس توبى كەزدەسۋ وتكىزدى.
القالى جيىنعا اكىمدىك, «اتامەكەن» ۇكپ-نىڭ وكىلدەرى, سۋديالار, سوت جۇيەسىنىڭ ارداگەرلەرى, مەدياتورلار, كاسىپكەرلەر قاتىستى.
مودەراتور, «بىرلەسە دامۋ» الەۋمەتتىك كاسىپكەرلىكتى دامىتۋ قورى» قوعامدىق ۇيىمىنىڭ پرەزيدەنتى نۇرگۇل قاراعويشينا پيلوتتىق جوبانىڭ قۇرىلىمدىق ەرەكشەلىگىنە باسا توقتالدى. ول ءوز سوزىندە وتباسىلىق, جەكەباستىق, قوعامدىق داۋ-دامايلاردىڭ كوبەيىپ كەتكەنىن, بۇرىن مۇنداي جانجالدار اقساقالداردىڭ, بيلەردىڭ ارالاسۋىمەن, تورەلىك ايتۋىمەن شەشىلىپ كەلسە, قازىر قيت ەتسە سوتقا جۇگىرەتىن بولدى. ءتىپتى ەكىتاراپتىڭ كەلىسىمىەن شەشىلەتىن ۇساق-تۇيەك ماسەلەلەر ءۇشىن جان-جاققا ارىزدانىپ, ۋاقىتتارىنبوسقا جوعالتىپ جاتادى. ءتۇرلى سەبەپتەرمەن سوت پروتسەسى ۇزاققا سوزىلىپ كەتەتىن جايتتار از كەزدەسپەيدى.
جىلىنا تۇرعىنداردان ورتا ەسەپپەن 1 ميلليون 300 مىڭداي ارىز-شاعىم تۇسەدى. بارىنەن بۇرىن جاقىن اعايىندار, تۋعان-تۋىسقاندار اراسىندا ونبەس داۋ-دامايلاردىڭ كوبەيىپ بارا جاتقانى الاڭداتادى. سوندىقتان جەر-جەرلەردە «رۋحاني جاڭعىرۋ» باعدارلاماسى باعىتىندا اتقارىلىپ جاتقان سان-سالالى جۇمىستاردىڭ ىشىندە تاتۋلاستىرۋ ينستيتۋتتارىن ورنىقتىرۋ, ولاردىڭ قىزمەتىن جانداندىرۋ, كۇشەيتۋ اسا ماڭىزدى, دەدى ول.
جوعارعى سوت توراعاسىنىڭ كەڭەسشىسى ساعاتبەك سۇلەيمەن ءوز بايانداماسىندا قوعامداعى داۋ-داماي دەڭگەيىنىن ءورشۋىن اتاپ كورسەتىپ, كەزدەسۋگە قاتىسۋشىلاردى پيلوتتىق جوبانى جۇزەگە اسىرۋدىڭ وڭتايلى جولدارىمەن تانىستىردى.
«2013-2017 جىلدارداعى ستاتيستيكالىق مالىمەتتەر بويىنشا سوتقا كەلىپ تۇسكەن ارىزدار مەن ىستەردىڭ سانى ەكى ەسە وسكەن.ەلىمىزدە ادام باسىنا شاققاندا ءاربىر ءتورتىنشى ازامات داۋعا تارتىلىپ, سوتتاسىپ ءجۇر. دامىعان ەلدەردە داۋلاردىڭ 80-90 پروتسەنتى بىتىمگەرشىلىكپەن اياقتالادى. حالقىمىز بولماشى نارسەگە بولا بەت جىرتىسىپ, ءبىر-ءبىرىن ەندىگارى كورمەستەي بولىپ, ونىڭ اقىرى اۋرە-سارساڭعا ءتۇسىپ, شىعىنعا ۇشىراتىپ جاتادى. مەملەكەتىمىز, سۋديالار ءۇشىن دە قىمباتقا تۇسەدى», دەي كەلىپ, توراعانىڭ كەڭەسشىسى رەسپۋبليكادا قۇرىلىپ جاتقان تاتۋلاسۋ ورتالىقتارىنىڭ داۋلاردى شەشۋدىڭ قولايلى الاڭى ەكەنىنە ناقتى مىسالدار كەلتىردى. مەدياتسيا ينستيتۋتىن كەڭىنەن ناسيحاتتاۋعا شاقىردى.
وبلىستىق ازاماتتىق ىستەر جونىندەگى سوت القاسىنىڭ توراعاسى ايدار سماعۇلوۆ وڭىردە جوبانىڭ جۇزەگە اسىرىلۋ بارىسى تۋرالى بايانداي كەلىپ, سوتتارعا مەدياتسيا ءادىسى ەنگىزىلگەنىن جەتكىزدى. بيىل 9 ايدا 9 530 ازاماتتىق ءىس قارالسا, وننان بىرىنە تاتۋلاستىرۋ راسىمدەرى قولدانىلعان. 62 514 556 تەڭگە مەملەكەتتىك باج سالىعى قايتارىلعان.
قازاقستاننىڭ ەڭبەك سىڭىرگەن قايراتكەرى, زاڭ عىلىمدارىنىڭ دوكتورى, پروفەسسور ەسبەرگەن الاۋحانوۆ تاتۋلاستىرۋ راسىمدەرىن جۇزەگە اسىرۋ فورمالارىن جان-جاقتى باياندادى. بەلگىلى اكادەميك سالىق زيمانوۆتىڭ بيلەر ينستيتۋتىن جاڭعىرتۋ جونىندەگى يدەيالارىنىڭ ماڭىزىنا توقتالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى