بەلگىلى مەملەكەت جانە قوعام قايراتكەرى تەمىربەك جۇرگەنوۆتىڭ تۋعانىنا 120 جىل تولدى. وسىعان وراي 25 قازان كۇنى قىزىلوردا قالاسىندا ن.بەكەجانوۆ اتىنداعى قازاق مۋزىكالىق دراما تەاترىندا ونەر اكادەمياسىندا ءبىلىم الىپ جانە جۇمىس جاساپ جۇرگەن قىزىلوردالىق ونەرپازداردىڭ قولونەر, زەرگەرلىك بۇيىمدارىنان جانە بەلگىلى ديزاينەر ساۋلە باپانوۆانىڭ كوللەكتسياسىنان كورمە - دەفيلە ۇيىمداستىرىلدى.
كورمەگە رەسپۋبليكامىزعا بەلگىلى قىلقالام شەبەرلەرى سارسەنبەك ابىلقاسىم, تولەگەن سۇلەيمەنوۆ جانە اعىمسالى دۇزەنوۆتەردىڭ ەڭبەكتەرى قويىلدى. ءسوز العان ازاماتتار تەمىربەك جۇرگەنوۆتىڭ قازاق حالقىنا, مادەنيەتىنە سىڭىرگەن ولشەۋسىز ەڭبەگى جونىندە سىر شەرتتى. الاشتىڭ ايتۋلى تۇلعاسى ستاليندىك زۇلماتتان امان قالعان جوق. ول تۋرالى تەمىربەك جۇرگەنوۆ قوعامدىق قورىنىڭ توراعاسى, قىزىلوردا وبلىستىق قوعامدىق كەڭەس مۇشەسى ءسابي ابدىقادىر ۇلى اڭسات بىلاي دەيدى:
«ول وزبەكستانداعى اتالعان دەڭگەيدەگى لاۋازىمدى قىزمەتىن قالدىرىپ, 1933 جىلى ەلگە كەلىپ قازاق دەگەن ۇلتتىڭ تىلىنە, ءبىلىمى مەن مادەنيەتىنە, مەملەكەت بولىپ قالىپتاسۋىنا ۇشان-تەڭىز ەڭبەك ءسىڭىردى. الاش ارداقتىلارى تۇتقىندالىپ, اتىلىپ جاتقان كەزەڭدە ءوزىنىڭ دە امان قالمايتىنىن بىلە تۇرا, «وتانىڭمەن سالىستىرعاندا ەڭ قىمباتىڭنىڭ ءوزى ارزان», دەپ قادىر اقىن ايتقانداي, ءبىر شىبىنداي جانىنىڭ اماندىعىنان ۇلتىنا قىزمەت ەتۋدى ارتىق كورىپ, وسىنداي قادامعا باردى. وزىنە دە, وزگەگە دە قاتاڭ تالاپ قويىپ, كۇندىز-ءتۇنى, جارعاق قۇلاعى جاستىققا تيمەي, ولشەۋلى ۋاقىتقا بەرىلگەن مۇمكىندىكتى ۇلت مۇددەسىنە بارىنشا پايدالانۋعا ۇمتىلدى. قىرۋار شارۋا تىندىردى. كوزى تىرىسىندە-اق, حالىق اراسىندا ۇلكەن قۇرمەتكە, زور بەدەلگە يە بولعان ازامات ۇلت زيالىلىرىنا قارسى ۇيىمداستىرىلعان زۇلماتتىڭ قۇربانىنا اينالدى.
تەمىربەك جۇرگەنوۆ سىندى مەملەكەت جانە قوعام قايراتكەرلەرىنىڭ اقتالعانىنا 60 جىلدان اسسا دا, قازىرگى عىلىم مەن تەحنولوگيا دامىعان زاماندا ارقايسىسىنىڭ سۇيەكتەرى جەكە دارا ساراپتالىپ, جەر قوينىنا يسلام شارتىمەن ءالى تاپسىرىلعان جوق. الاش ارىستارىنىڭ رەسمي بەيىتىنىڭ بولماۋى ءبىزدىڭ مەملەكەتتىگىمىزگە, قالا بەردى تاۋەلسىزدىگىمىزگە وزگە مەملەكەتتەر مەن ۇلتتار الدىندا ۇلكەن سىن», دەيدى.
كورمەدەن سوڭ قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن اكادەميانىڭ شىعارماشىلىق ۇجىمى قىزىلوردا قالاسىندا مەملەكەت جانە قوعام قايراتكەرى تەمىربەك جۇرگەنوۆتىڭ 120 جىلدىعىنا ارنالعان جانە ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا «رۋحقا تاعزىم» اتتى مەرەكەلىك كونتسەرت وتكىزدى.
الاش ارداقتىسىنىڭ ءوز تۋعان جەرىندە مەرەيتويىنىڭ لايىقتى اتالىپ وتۋىنە وبلىس اكىمىدىگى ۇلكەن قولداۋ كورسەتتى. قازاق حالقىنىڭ ۇلكەن بولاشاعى ءۇشىن قاسىقتاي قانىڭ قيعان ازامات ەشقاشان ۇمىتىلماق ەمەس. ونى حالىقتىڭ ۇلى تۇلعاعا دەگەن سۇيىسپەنشىلىگىنەن بايقادىق.
باقتيار تايجان,
«ەگەمەن قازاقستان»
قىزىلوردا وبلىسى