قر جوعارعى سوتىنىڭ «تاتۋلاستىرۋ: سوتقا دەيىن, سوتتا» جوباسىن جۇزەگە اسىرۋ شەڭبەرىندە وتكەن «دوڭگەلەك ۇستەل» جۇمىسىندا سۋديالار, سوت جۇيەسىنىڭ ارداگەرلەرى, مەدياتورلار, «اتامەكەن» كاسىپكەرلەردىڭ پالاتاسىنىڭ, ۇكىمەتتىك ەمەس ۇيىمداردىڭ وكىلدەرى قاتىستى. شاقىرىلعاندار قاتارىندا زيالى قاۋىم مەن وبلىستىڭ قۇرمەتتى ازاماتتارى بولدى.
كەزدەسۋدە وبلىستىق سوتتىڭ قىلمىستىق ىستەر جونىندەگى سوت القاسىنىڭ توراعاسى مۇراتعالي اكەتاي جوعارعى سوت توراعاسى جاقىپ اسانوۆتىڭ سوت پروتسەسىنىڭ ۇزاقتىعى مەن قىمباتقا تۇسەتىندىگى, سوندىقتان تاتۋلاسۋدىڭ ۇتىمدى ءتاسىل ەكەندىگى, بۇعان ءاربىر سۋديا مۇددەلى بولۋى كەرەكتىگى جونىندە ايتقان ءسوزىن ەسكە سالدى. «ادامداردىڭ سوتتان بولەك داۋلاردى شەشەتىن بالامالى الاڭدارى بولۋى كەرەك. تاتۋلاستىرۋ راسىمدەرىن كەڭىنەن دامىتۋعا حالىقتىڭ بۇل ينستيتۋت جايىندا اقپاراتتى تولىق بىلمەۋى كەدەرگى بولىپ وتىر», - دەدى ول.
م. اكەتايدىڭ ايتۋىنشا, 2018 جىلدىڭ 9 ايىندا سوتقا دەيىنگى تارتىپتە مەدياتورلاردىڭ قاتىسۋىمەن ازاماتتىق ىستەر بويىنشا 951 داۋ مەن جانجال, 1727 قىلمىستىق ءىس سوتقا دەيىنگى تاتۋلاستىرۋ ارقىلى رەتتەلگەن. بەكىتىلگەن مەموراندۋم اياسىندا كاسىپكەرلەر پالاتاسىنىڭ كەڭسەسىندە كاسىپكەرلەر ءۇشىن «مەدياتور بۇرىشى» اشىلعاندىعى ايتىلدى. مۇندا مەدياتورلار كەزەكشىلىك ەتىپ, زاڭدى تۇلعالار اراسىندا تاتۋلاستىرۋدىڭ ارتىقشىلىقتارىن تەگىن تۇسىندىرەدى. 2018 جىلدىڭ ءبىرىنشى جارتىجىلدىعىندا پاۆلوداردا كاسىبي ەمەس مەدياتورلاردىڭ 1-رەسپۋبليكالىق فورۋمى وتكىزىلدى.
«بىرلەسە دامۋ» الەۋمەتتىك كاسىركەرلىكتى دامىتۋ قورىنىڭ پرەزيدەنتى نۇرگۇل قاراعويشينا جانە جوعارعى سوت توراعاسىنىڭ كەڭەسشىسى ساعاتبەك سۇلەيمەن «تاتۋلاستىرۋ: سوتقا دەيىن, سوتتا» جوباسىنىڭ نەگىزگى اسپەكتىلەرى جونىندە حابارلادى.
ءىس-شارا بارىسىندا قاتىسۋشىلار مەدياتسيانىڭ دامۋى جونىندە وڭ پىكىرلەرىن ءبىلدىرىپ, ونى ناسيحاتتاۋعا ءوز ۇلەستەرىن قوسۋعا دايىن ەكەندىكتەرىن ءبىلدىردى.
كەزدەسۋ سوڭىندا قوعامدا داۋلاردىڭ سانىن ازايتۋ بويىنشا ءتيىستى ۇسىنىمدار ازىرلەندى.