دەنيس تەننىڭ ءولىمى بويىنشا جۇرگىزىلگەن تەرگەۋ اياقتالدى. بۇل تۋرالى ىشكى ىستەر ءمينيسترى قالمۇحانبەت قاسىموۆ پارلامەنت سەناتىنىڭ پلەنارلىق وتىرىسىندا ايتتى.
«تەرگەۋدى اياقتادىق. بىراق ءىس ماتەريالدارىمەن تانىسۋ پروتسەسى ءالى ءجۇرىپ جاتىر. ول پروتسەسس اياقتالعان سوڭ ءىس بىردەن سوتقا جولدانادى. ءىس ماتەريالدارىمەن تانىسۋعا قانشا ۋاقىت كەرەك دەسە دە, ول ولاردىڭ قۇقىعى», دەدى ءىىم باسشىسى.
ايتا كەتەيىك, 19 شىلدەدە الماتىدا بەلگىسىز بىرەۋلەر دەنيس تەندى پىشاقتاپ كەتكەن بولاتىن. وقيعا شامامەن 15.00-دە قۇرمانعازى مەن بايسەيىتوۆا كوشەلەرىنىڭ قيىلىسىندا بولعان. كەيىن قالالىق ءىىد وكىلدەرى دەنيس تەنگە اۆتوۇرىلار شابۋىل جاساعانىن مالىمدەدى. سويتسەك, سپورتشى ۇرىلاردىڭ ۇستىنەن تۇسكەن بولىپ شىقتى. جانجال كەزىندە سپورتشىنىڭ اياعىنا پىشاق ءتيىپ, كوپ قان جوعالتقان. ول اۋرۋحانادا كوز جۇمدى.
كەيىنىرەك قۇرمانعازى مەن بايسەيىتوۆا كوشەلەرىنىڭ قيىلىسىندا داڭقتى مانەرلەپ سىرعاناۋشى دەنيس تەننىڭ قۇرمەتىنە ەسكەرتكىش ورناتىلاتىنى حابارلانعان ەدى. سونداي-اق, وعان «حالىق قاhارمانى» اتاعىن بەرۋ ۇسىنىلعان بولاتىن.