«باستاۋ» جوباسىنا قاتىسۋشىلاردىڭ بيزنەس-يدەيالارىن جارىققا شىعارۋ ءۇشىن تاعى ءبىر مۇمكىندىك بەرىلمەك. اقتوبە وبلىسىنىڭ كاسىپكەرلەر پالاتاسىندا اتالعان باعدارلاما بويىنشا كاسىپكەرلىك نەگىزدەرىن وقىعان ازاماتتاردىڭ بيزنەس-جوبالارىن جۇزەگە اسىرۋ ءۇشىن ءبىر رەتتىك گرانت ءبولۋ جۇمىستارى باستالدى.
جوباعا, سونداي-اق, كتب جانە قىسقا مەرزىمدى قايتا دايارلاۋ كۋرسىنان وتكەن بۇرىن مەملەكەتتەن قارجىلىق قولداۋ شارالارى ارقىلى جەڭىلدەتىلگەن نەسيە الماعان جۇمىسسىزدار مەن وزگە ەلدەن كوشىپ كەلگەن ورالمان وتانداستارىمىز قاتىسا الادى. گرانت جاڭا يدەيالاردى جۇزەگە اسىرۋمەن قاتار بۇرىن جۇرگىزىلىپ وتىرعان كاسىپ ءتۇرىن قايتا جانداندىرۋ مەن جەتىلدىرۋگە قاجەتتى قۇرال-سايماندار الۋ ءۇشىن بەرىلەدى. تولەم بيۋدجەتتىك قاراجات ەسەبىنەن بولىنەدى جانە ونىڭ كولەمى 100 اەك قۇرايدى.
جاڭا بيزنەس-يدەيالاردى جۇزەگە اسىرۋعا ارنالعان مەملەكەتتىك گرانتتار ايماقتىق وتىنىشتەردى قاراۋ تۋرالى كوميسسيانىڭ شەشىمىنە ساي بەلگىلەنەدى. كوميسسيا قۇرامىن ءار وبلىستاعى وڭىرلىك كاسىپكەرلەر پالاتاسى جاساقتايدى. وعان كاسىپكەرلەر پالاتاسىنڭ ساراپشىلارى, مەملەكەتتىك ورگاندار, جەرگىلىكتى ەڭبەك ينسپەكتسياسىنىڭ ماماندارى, ءارتۇرلى بيزنەس قاۋىمداستىقتار مەن قوعامدىق بىرلەستىكتەردىڭ وكىلدەرى ەنگەن.
– ەرەجەلەرگە ساي ءبىر رەتتىك ماتەريالدىق كومەك «باستاۋ» جوباسى بويىنشا سەرتيفيكات العان نەمەسە قىسقا مەرزىمدى كۋرستاردان وتكەن, جۇمىسسىز جۇرگەن جانە كاسىپكەرلىك باستامالارى بار ادامدارعا تاعايىندالادى. سونداي-اق, مۇنداي تولەم قانداي دا ءبىر مەملەكەتتىك قارجىلاندىرۋ ارقىلى كومەك الماعان جۇمىسسىز جاندارعا دا بەرىلەدى. كوميسسيا جوبالاردىڭ تيىمدىلىگىنە, كۇندەلىكتى ومىردە قولدانىس تابۋىنا باسا نازار اۋدارادى جانە ولاردىڭ جۇزەگە اسىرىلۋىن باقىلاۋدا ۇستايتىن بولادى - دەپ ناقتىلادى اقتوبە وبلىسى كاسىپكەرلەر پالاتاسى ديرەكتورىنىڭ ورىنباسارى جانايىم كەلباتىروۆا.
بۇگىنگى كۇنى كوميسسياعا ءوز جوبالارىن اقتوبە قالاسى مەن ايتەكە بي, العا, بايعانين, مۇعالجار, مارتوك, قارعالى اۋداندارىنان 57 ادام ۇسىنىپ, ونىڭ 39-ى ءوڭ باعا الىپ ۇلگەردى. كوميسسيا ولاردىڭ جوبالارىن ومىرشەڭدىگى, تيىمدىلىگى جانە جىلدام جۇزەگە اسىرىلۋى تۇرعىسىنان باعا بەردى. جوبا «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان «ەڭبەك» باعدارلاماسىنىڭ» ءبىرىنشى جانە ەكىنشى باعىتتارى بويىنشا «اتامەكەن» ۇلتتىق كاسىپكەرلەر پالاتاسىنىڭ قولداۋىمەن جۇزەگە اسىرىلۋدا.
ءبىر رەتتىك گرانت الۋعا قاتىسۋ ءۇشىن ءۇشىن جەرگىلىكتى جەرلەردەگى اۋداندىق, قالالىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ بولىمدەرىنە بارىپ, تىركەلۋ كەرەك. گرانت الۋعا كەلەسى وتىنىشتەردى قورعاۋ قاراشا ايىنىڭ باسىندا وتەدى.
تەمىر قۇسايىن,
«ەگەمەن قازاقستان»