بيىلعى تامىز ايىندا بولىپ وتكەن كاسپي سامميتىندە پرەزيدەنت ن.نازارباەۆ ەلىمىزدىڭ ءتۋريزمىن دامىتاتىن تەڭىزىمىز بار, ول تۇركيانىڭ انتالياسىنان كەم ەمەس دەي كەلە, وسى سالانى بىرلەسىپ وركەندەتۋدى ۇسىندى.
ايتىلعان تاپسىرما كاسپي تەڭىزىن تۋريستىك ماقساتتا قولدانۋعا كوپ كۇش سالىپ, ينفراقۇرىلىم مەن قىزمەت كورسەتۋ ساپاسىن جاقسارتۋدى قاجەت ەتەدى.
بۇگىنگى تاڭدا ماڭعىستاۋ وبلىسىنىڭ جاعالاۋ ايماعى – 900 شاقىرىم. ونىڭ باسىم بولىگىن تۋريستىك ايماق, ياعني سۋعا ءتۇسۋ, قايىقتارمەن سەرۋەندەۋ, اۋەسقويلىقپەن بالىق اۋلاۋ ءۇشىن پايدالانۋعا بولاتىن جەر قۇرايدى. قولدانىستاعى زاڭعا سايكەس شەكارا قىزمەتى جەرگىلىكتى اتقارۋشى ورگاندار مەن ۇيىمداردىڭ كەلىسىلگەن ۇسىنىمدارىنا ساي, جىل سايىن ەكى ميلگە دەيىنگى اراقاشىقتىقتا تۇلعالاردىڭ دەمالىس, تۋريزم جانە سپورت ماقساتىندا پايدالاناتىن شاعىن كولەمدى كەمەلەرىنىڭ ءجۇزۋى ءۇشىن كاسپي تەڭىزىنىڭ جاعالاۋ ۋچاسكەلەرىنىڭ تىزبەسىن بەلگىلەپ, رەجىمدىك شەكتەۋلەردىڭ قولدانىسىن توقتاتادى.
2018 جىلعى شىلدە ايىندا دەپۋتاتتاردىڭ ماڭعىستاۋ وڭىرىنە ساپارى كەزىندە سايلاۋشىلار اتالعان سالانى دامىتۋعا كەدەرگى كەلتىرىپ وتىرعان بىرقاتار ماسەلەلەردى كوتەردى. سونىڭ قاتارىندا تەڭىزگە سەرۋەندەۋگە شىعاتىن تۋريستەر ءتىزىمىن مەملەكەتتىك ورگانمەن كەلىسۋ پروتسەدۋراسى ءبىرشاما ۇزاققا سوزىلىپ كەتەتىنى ايتىلدى. وسىعان بايلانىستى ءبىز شاعىن كولەمدى كەمەلەرى بار ازاماتتارعا بەلگىلەنگەن ۋچاسكەلەردە مىندەتتى رۇقساتتامالار الۋ راسىمدەرىنىڭ ساتىلارىن قىسقارتىپ, جەڭىلدەتۋ ءۇشىن ونى حالىققا قىزمەت كورسەتۋ ورتالىقتارى ارقىلى بەرۋدى ۇسىنامىز.
سونداي-اق تەڭىزدەگى فاۋنانىڭ دامۋىنا كەدەرگى كەلتىرەتىن قۇقىق بۇزۋشىلىقتاردىڭ الدىن الۋ ءۇشىن نورماتيۆتىك-قۇقىقتىق اكتىلەردى جەتىلدىرۋ كەرەك. ماسەلەن, تۋريست اتىن جامىلىپ, زاڭسىز براكونەرلىكپەن اينالىساتىن ازاماتتاردىڭ دەرەكتەر بازاسىن جاساۋ ارقىلى ولاردىڭ تەڭىزگە قايتادان شىعۋىنا رۇقسات بەرمەگەن دۇرىس. بۇعان قوسا «بايدا» تيپىندەگى كىشىگىرىم كەمەلەردى تىركەۋگە, كوممەرتسيالىق شاعىن كەمە قوزعالتقىشتارىنىڭ جالپى قۋاتىن شەكتەۋگە تىيىم سالۋدى قولعا الۋ كەرەك.
«قازاقستان رەسپۋبليكاسىنىڭ مەملەكەتتىك شەكاراسى تۋرالى» زاڭعا سايكەس قازاقستاندىق شاعىن كولەمدى كەمەلەردىڭ تەڭىزگە شىعۋى مەن قايتا ورالۋىن ەسەپكە الۋدى رەتتەۋ ءۇشىن پريستاندار مەن ايلاقتاردى كەرەكتى جابدىقتارمەن جاراقتاندىرعان ءجون.
كاسپي تەڭىزىنىڭ قازاقستاندىق اكۆاتورياسىندا توتەنشە جاعدايلاردىڭ جاپپاي الدىن الۋ ءۇشىن ءتيىستى ۋاكىلەتتى ورگاندارعا بارلىق سۋدا جۇزە الاتىن تەحنيكالاردى تىركەپ, ولاردىڭ سيپاتتاماسىن ەسكەرىپ, ءجۇزۋ شاماسىن تەكسەرۋدى ۇسىنعان دۇرىس.
الدىڭعى قاتارلى شەتەلدىك تاجىريبەنى زەرتتەي كەلە, كاسپيدىڭ جاعاسىن اباتتاندىرۋمەن تۋريستىك ينفراقۇرىلىمدى جاقسارتۋ جونىندە ارنايى باعدارلاما جاسالعانى دا دۇرىس بولار ەدى.
اسىلبەك سماعۇلوۆ,
ءماجىلىس دەپۋتاتى