سوڭعى كەزدەرى وكىلدى ورگاندار سىبايلاس جەمقورلىققا قارسى ءتيىمدى شارالار جاساپ كەلەدى. بىراق وسى قاتاردا كەيبىر ولقىلىقتاردىڭ ءالى دە ورىن الىپ, بۇل باعىتتاعى شارالار قوعامدى تولىق قاناعاتتاندىرماي كەلە جاتقانىن ايتۋعا ءتيىسپىز.
بىزگە استانا قالاسىنداعى بىرقاتار ۇلەسكەرلەردەن حات كەلدى. وندا ۇلەسكەرلەر وزدەرىنە جاۋاپ بەرۋگە ءتيىستى «نوماد ستروي ەك» جشس لاۋازىمدى ادامدارىنىڭ جاۋاپكەرشىلىكتەن قاشىپ وتىرعانىن ايتادى. ولار «ەسىل ەك» تقك جانە «Future home» تۇرعىن ۇيلەرىنە سالىنعان اقشالارىن جىمقىردى دەپ ايىپتالۋدا. وسى ىستە ۇلەسكەرلەر بىرنەشە جىلدان بەرى ادىلدىككە قول جەتكىزە الماي كەلەدى ەكەن. جابىرلەنۋشىلەر مۇنداي كەلەڭسىزدىككە مەملەكەتتىك ورگانداردىڭ جانە قالىڭ كوپشىلىكتىڭ كوز الدىندا جول بەرىلىپ جاتقانىنا قىنجىلادى.
ۇلەسكەرلەر وزدەرىنىڭ قۇرىلىسقا ارناعان قاراجاتتارىن «استانا فينانس حولدينگ» ميكروقارجىلىق ۇيىمى ارقىلى قولما-قول اقشامەن جانە نەسيە رەتىندە سالعانىن ايتادى. ال وسى قارجىلىق ۇيىمدى «نوماد ستروي ەك» جشس باسشىلارى اشقان ەكەن.
اقشالارىن قايتارا الماي, ۇيلەرىن دە الا الماي پۇشايمان بولعان تۇرعىندار وزدەرىنىڭ حاتىندا سوتتىڭ شەشىمدەرىنە, سوت ورىنداۋشىلارى مەن سالىق ورگاندارىنىڭ كوپتەگەن تىيىمدارىنا, بانكتەگى شوتتاردىڭ 20 رەتتەن ارتىق تۇتقىندالعانىنا قاراماستان, استانانىڭ قۇرىلىس باسقارماسى اتالمىش جشس باسشىلارىن مەملەكەتتىك باعدارلاماعا سايكەس سالىناتىن الەۋمەتتىك نىساندار تۇرعىزۋ قۇرىلىسىنىڭ مەملەكەتتىك ساتىپ الۋلارىنا قاتىستىرىپ, جەڭىمپاز دەپ تانىعانىن ايتادى. ونىڭ ۇستىنە سوت 2015 جىلدىڭ ءساۋىر ايىنداعى شەشىمىمەن بۇل ۇيىمدى سەنىمسىز قاتىسۋشى دەپ تە شەشىم شىعارعان ەكەن. ال ولاردىڭ قاعاناعى قارق, ساعاناعى سارق. مەملەكەتتىك ساتىپ الۋ بويىنشا جەڭىپ العان ءبىر قۇرىلىس شارتى بويىنشا عانا مەملەكەتتىك بيۋدجەتتەن قارجىلاندىرۋدى 1,8 ملرد تەڭگەگە ارتتىرىپ, قۇرىلىس مەرزىمىن جالعاستىرىپ العان. الايدا كوپپاتەرلى ۇيلەردىڭ قۇرىلىسىن اياقتاماعان. ءتىپتى باسشىلارى سوتتالعاننان كەيىن دە تەندەرگە قاتىسىپ, 1 ملرد تەڭگەنىڭ قۇرىلىسىن سالۋ تاپسىرماسىن جەڭىپ العان...
قورىتا ايتقاندا, «نوماد ستروي ەك» جشس مەملەكەتكە جانە جەكە ازاماتتارعا 7 ملرد تەڭگەدەن ارتىق زيان كەلتىرگەن. مۇنىڭ ىشىندە تولەنبەگەن ەڭبەكاقى جانە كرەديتورلىق قارىزدار جوق. ولاردى قوسساق بۇل فيرمانىڭ زيانكەستىگى شەكتەن شىعىپ كەتەدى. وسىنىڭ ءوزى استانا قالاسىندا انىقتالعان فاكتىلەر. ال بۇلار باسقا ايماقتاردا دا جۇمىس ىستەپ, حالىقتى قان قاقساتۋى مۇمكىن. ۇلەسكەرلەر ءوز حاتىندا استانا قالاسىنىڭ سارىارقا اۋداندىق پروكۋراتۋراسىنا قايىرىلعاندارىمەن ەشقانداي ناتيجە بولماعانىن ايتادى.
مىنە, وسىنداي زاڭسىزدىقتاردى كورگەن سوڭ ءبىز ءتيىستى ورگاندارعا قايىرىلىپ, تەكسەرۋدى تالاپ ەتكەن حاتتار جىبەردىك.
تۇرعىن سىزدىقوۆ,
ءماجىلىس دەپۋتاتى