1992 جىلى 18 قازاندا الماتى قالاسىندا ەلباسىنىڭ توراعالىعىمەن ءبىرىنشى بۇكىلالەمدىك رۋحاني كەلىسىم كونگرەسى ءوتتى. كونگرەسكە قاتىسۋشىلار 18 قازاندى رۋحاني كەلىسىم كۇنى – قاقتىعىستار مەن جانجالدارعا توقتاۋ سالۋ, تاتۋلىق ىزدەۋ, جاقىنعا قايىرىمدىلىق جانە كومەك كۇنى دەپ جاريالاۋ تۋرالى مانيفەست قابىلدادى. 26 جىلدان بەرى قازاقستاندىقتار بۇل كۇندى تاتۋلاسۋ جولىن ىزدەۋ, ادامدار اراسىندا ءوزارا تۇسىنىستىك ورناتۋ كۇنى رەتىندە اتاپ وتەدى.
رۋحاني كەلىسىم كۇنىنە وراي استانا قالاسىندا «قازاقستاندىق جول: سۇحباتتاستىقتان – رۋحاني كەلىسىمگە» اتتى تاقىرىپتا عىلىمي-تاجىريبەلىك كونفەرەنتسيا ءوتتى. جيىنعا مەملەكەتتىك ورگانداردىڭ باسشىلارى, قازاقستان ءدىني بىرلەستىكتەرى مەن مادەنيەت جانە كونفەسسياارالىق ديالوگتى جۇزەگە اسىراتىن ۇكىمەتتىك ەمەس ۇيىم وكىلدەرى قاتىستى. قوعامدىق دامۋ مينيسترلىگى قوعامدىق كەلىسىم كوميتەتى توراعاسىنىڭ مىندەتىن اتقارۋشى قايسار جاناحانوۆ «قازاقستاندىق تاجىريبە – سىندارلى ديالوگ پەن ەتنوستىق الۋاندىلىق ۇلتتىق بايلىق رەتىندە قابىلداناتىن دەموكراتيالىق مەملەكەتتىڭ ناقتى الاڭى بولا الادى», دەدى. ونىڭ ايتۋىنشا, بۇگىنگى تاڭدا ەلىمىزدە 18 كونفەسسيانىڭ وكىلدەرى ءومىر سۇرەدى جانە 3700-دەن اسا ءدىني بىرلەستىك جۇمىس ىستەيدى. سونداي-اق قايسار جاناحانوۆ الەم ەلدەرىنىڭ دىنارالىق كەلىسىمدە قازاقستان مودەلىنە قىزىعۋشىلىق تانىتىپ جاتقانى تۇرعىسىندا ءسوز قوزعادى. «دۇنيەجۇزىندە دىنارالىق قاقتىعىستاردى شەشۋ ءۇشىن ءارتۇرلى جوبالار جولعا قويىلعان. ءار ەلدىڭ ءوز مودەلى بار. كەشە عانا اقش ەلىنەن كەلگەن دەلەگاتسيانى قابىلدادىم. ولار قازاقستان حالقى اسسامبلەياسىنىڭ جۇمىسىنا قىزىعۋشىلىق تانىتتى», دەدى.
كونفەرەنتسيادا ءسوز العان مادەنيەتتەر جانە دىندەردىڭ حالىقارالىق ورتالىعىنىڭ ديرەكتورى ايدار ءابۋوۆ: «قازاقستاننىڭ تاجىريبەسى سىندارلى ديالوگ پەن ءوزارا تۇسىنىستىك, ادامداردىڭ رۋحاني بىرلىگىن نىعايتۋعا ارنالعان الاڭ بولا الاتىنىن دالەلدەيدى. بۇگىندە رۋحاني كەلىسىم كۇنى قازاقستاندىقتاردى ءداستۇرلى مورالدىق قۇندىلىقتار ارقىلى بىرىكتىرىپ, قوعامداعى بەيبىتشىلىك پەن تۇراقتىلىق ءۇشىن تولەرانتتىلىق پەن رۋحاني كەلىسىم يدەيالارىن ناسيحاتتايدى», دەدى.
كونفەرەنتسيادا قازاقستان مۇسىلماندارى ءدىني باسقارماسى توراعاسىنىڭ ورىنباسارى, نايب ءمۇفتي باۋىرجان ەسماحان بايانداماسىندا «بۇگىنگى تاڭدا قازاقستاننىڭ ەتنوسارالىق جانە كونفەسسياارالىق كەلىسىمدى نىعايتۋعا قول جەتكىزگەن بىرەگەي تاجىريبەسى الەمدىك قوعامداستىقتىڭ سۇرانىسىنا كۇن وتكەن سايىن يە بولۋدا. الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋ ارقىلى جاھاندىق دەڭگەيدەگى رۋحاني كەلىسىمدى قامتاماسىز ەتۋدە قازاقستان جانە ونىڭ ەلباسىنىڭ ءرولىن ءۇندىستاننىڭ اسا كورنەكتى جازۋشىسى جانە قوعام قايراتكەرى رابيندرانات تاگور ء«اربىر ۇلت وزىندە بار جاقسىلىقتى جالپىنىڭ يگىلىگىنە جۇمساۋى ءتيىس» دەگەن سوزدەرىمەن بىلدىرۋگە بولادى», دەپ ايتتى. نايب ءمۇفتيدىڭ ايتۋىنشا, ۇلت بايلىعىنىڭ جەتىستىگى – بىرجاقتى جەكە مۇددەلەردى جەڭە وتىرىپ, الەم ەلدەرىن رۋحاني كەلىسىمدى اسقاقتاتۋعا شاقىرۋ.
كۇندەلىكتى تۇرمىس جاعدايىندا ءارتۇرلى ۇلت وكىلىنىڭ اراسىندا كيكىلجىڭ بولاتىنى شىندىق. وسىعان وراي ساياساتتانۋشى كەنجەبولات جولدىباي «باق جانە رۋحانيات» اتتى بايانداماسىندا وسكەلەڭ ۇرپاقتىڭ تاربيەسىنە تىكەلەي ىقپال ەتەتىن باعدارلاما مەن اقپاراتتىڭ باق بەتتەرىندە تالقىلانۋى كۇن ءتارتىبىنىڭ باستى ماسەلەسى ەكەنىن ايتتى. «الەۋمەتتىك جەلىلەردە ماسەلەنى ۋشىقتىرا تۇسەتىن جاعدايلارعا كۋا بوپ ءجۇرمىز. سوندىقتان قالىڭ بۇقارا اراسىندا ءتۇسىندىرۋ جۇمىستارىن كۇشەيتۋ كەرەك», دەي كەلە جاڭا پورتال اشۋ تۋرالى ۇسىنىسىن ءبىلدىردى. كونفەرەنتسيا سوڭىندا قاتىسۋشىلار ءبىر اۋىزدان بەيبىتشىلىك پەن كەلىسىم كوزدىڭ قاراشىعىنداي ساقتايتىن باستى قۇندىلىق ەكەنىن اتاپ ءوتتى.