قازاق كۇيىنىڭ قۇدىرەتىن الەمگە تانىتقان داۋلەسكەر دومبىراشى, حالىق ءارتىسى ءازيدوللا ەسقاليەۆتىڭ ەسىمى ەلگە ەتەنە تانىس. كۇي ابىزىنىڭ ومىردەن وتكەنىنە دە ءبىر جىلدان استى. ونەرگە دەگەن قۇرمەتتىڭ كورىنىسىندەي بولىپ اتىراۋ حالقى ءاز-اعا اتاپ كەتكەن كۇيشىنى ەسكە الۋ كەشى ءوتتى.
اكەسى ەسقالي بالاسىنىڭ ەرەكشە قابىلەتىن كىشكەنەسىنەن بايقاسا كەرەك, كۇي اناسى دينا نۇرپەيىسوۆانى ۇيىنە شاقىرىپ, ءبىر اپتا قوناق ەتىپ, كۇي تىڭداتادى. وسىلايشا ونەرگە دەگەن تالپىنىسىنا دينانىڭ ءوزى جول اشقان ءازيدوللا كەيىن الماتىعا وقۋعا بارىپ, احمەت جۇبانوۆتان ءدارىس العان. قۇرمانعازى وركەسترىندە ەڭبەك ەتكەن جىلدارى دا جارقىراي كورىندى. تالاي ەلدىڭ ساحناسىندا قوس ىشەكتەن اۋەزدى ءۇن تاراتىپ, حالىقتىڭ قوشەمەتىنە بولەندى. ماسكەۋدە وتكەن بۇكىلوداقتىق جاس ورىنداۋشىلار بايقاۋىندا توپ جارىپ, التىن مەدال يەلەندى. كۇي اناسىنىڭ اق باتاسىمەن ونەر جولىنا اتتانعان جاس ءازيدوللا داڭقتى دومبىراشى رەتىندە قالىپتاسىپ, قىرىق جىلدان سوڭ تۋعان جەرى اتىراۋعا ورالدى. ەسكە الۋ كەشى ماحامبەت اتىنداعى اكادەميالىق قازاق دراما تەاترى ارتىستەرىنىڭ كۇيشى ومىرىنەن سىر شەرتكەن قويىلىمىمەن اشىلدى. وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ, قازاقستاننىڭ ەڭبەك سىڭىرگەن قايراتكەرى, پروفەسسور ايتجان توقتاعان, قازاقستاننىڭ ەڭبەك سىڭىرگەن ءارتىسى ايگۇل ۇلكەنباەۆا, بەلگىلى كۇيشى, «قۇرمەت» وردەنىنىڭ يەگەرى ەرمەك قازيەۆ ءاز-اعا تۋرالى ەستەلىكتەر ايتىپ, كۇيلەرىن ورىندادى. مادەنيەت قايراتكەرى راحيلا قۇلساريەۆانىڭ ديريجەرلىگىمەن د.نۇرپەيىسوۆا اتىنداعى اكادەميالىق قازاق حالىق اسپاپتار وركەسترى دە ءازيدوللا ەسقاليەۆتىڭ رەپەرتۋارىنداعى كۇيلەردى ورىندادى.
– عيبراتتى ءىز قالدىرعان ءازيدوللا ەسقاليەۆتىڭ ەسىمى قاشان دا قۇرمەتپەن اتالادى, – دەپ اتاپ ءوتتى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سالامات سابىر. – داۋلەسكەر دومبىراشىنى ەسكە الۋعا, ونەرىن ناسيحاتتاۋعا ارنالعان شارالار العا قاراي دا جالعاسىن تابادى.
اتىراۋدا ەكى جىلدا ءبىر رەت ءازيدوللا ەسقاليەۆ اتىنداعى رەسپۋبليكالىق «التىن دومبىرا» كۇي بايقاۋى وتەدى. سول بايقاۋدىڭ باس جۇلدەگەرلەرى – حالىقارالىق بايقاۋلاردىڭ لاۋرەاتى نۇرجان تاجىكەنوۆ, قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ باس ديريجەرى ابىلاي تىلەپبەرگەنوۆ, ا.جۇبانوۆ اتىنداعى دارىندى بالالارعا ارنالعان رەسپۋبليكالىق قازاق مامانداندىرىلعان مۋزىكا مەكتەپ-ينتەرناتىنىڭ وقۋشىسى داستان قازكەنوۆتەر شاراعا ارنايى كەلىپ, ونەرلەرىن كورسەتتى.
باقىتگۇل باباش,
«ەگەمەن قازاقستان»
اتىراۋ