قازاقستان ءوزىنىڭ 27 جىلدىق دامۋ تاريحىندا ەكى جاڭعىرۋدى جۇزەگە اسىردى. ءبىرىنشىسى جوسپارلى ەكونوميكادان ءوتۋ بولسا, ەكىنشىسى 2030 ستراتەگياسىن ورىنداۋ ناتيجەسىندە تابىستى 50 ەلدىڭ قاتارىنا قوسىلدى. ەلباسىنىڭ 5 قازانداعى جولداۋى ەلىمىزدىڭ ءۇشىنشى جاڭعىرۋىنىڭ جالعاسىنا ارنالىپ وتىر. ەلباسى جولداۋىندا باستى نازار اۋدارتىلعان سالالارى ەل ەكونوميكاسىن تۇراقتى دامىتۋ, ەلىمىزدىڭ ورتا جانە شاعىن بيزنەسىن قولداۋ ءارى وركەندەتۋ, ەلىمىزدىڭ ءبىلىم سالاسىنا كوبىرەك كوڭىل ءبولۋ سىندى وزەكتى ماسەلەلەر قامتىلدى.
جاڭا تەحنولوگيالار, روبوتتاندىرۋ مەن اۆتوماتتاندىرۋ ەڭبەك رەسۋرستارىنا جانە ادام كاپيتالىنىڭ ساپاسىنا قاتىستى تالاپتاردى كۇردەلەندىرۋدە. ەگەر بىزدەر بۇل سالالاردى دۇرىس جولعا قويساق, ەلىمىزدىڭ دامۋى ارتا تۇسپەك. بۇل جولدا پەدوگوگ ماماندارىنىڭ ءرولى ەرەكشە.
جولداۋدا پەدوگوگتاردىڭ ستاتۋسىن قالىپتاستىرۋ ماسەلەسىنە باسا نازار اۋدارىلعان. ەلىمىزدىڭ تىرەگى, بولاشاعىمىز جاستاردى تاربيەلەۋ, ولارعا ءبىلىم بەرۋ جوعارعى بىلىكتى ۇستازدارىمىزدىڭ الدىندا تۇرعان ۇلكەن مىندەت. وسى رەتتە ەلىمىزدىڭ ەرتەڭىن قالىپتاستىرىپ وتىرعان ۇلاعاتتى ۇستازدارىمىزدىڭ قوعامداعى ەرەكشە ورنى مەن ەرەن ەڭبەكتەرىن باعالاۋ كەرەك.
جولداۋدا جوعارى وقۋ ورىندارىنىڭ جۇمىسىن باعالاۋداعى ەڭ نەگىزگى كريتەري رەتىندە تۇلەكتەردى تۇراقتى, جوعارى اقىلى جۇمىسپەن قامتاماسىز ەتۋ ماسەلەسى اتاپ كورسەتىلدى. قازىرگى قوعامىمىزداعى نەگىزگى قيىندىقتاردىڭ ءبىرى – جوعارى وقۋ ورنىن بىتىرگەن جاستاردىڭ جۇمىسسىز قالۋى. ەندى بۇل ماسەلەنى شەشۋگە ەلىمىزدىڭ ءاربىر جوعارى جانە ارناۋلى وقۋ ورىندارى كوبىرەك كوڭىل بولەتىنى بولشاق مامانداردى قۋانتقانى ءسوزسىز.
ەلباسى مەملەكەتىمىزدىڭ تىرەگى جاستار ەكەندىگىن, بولاشاق جاستاردىڭ قولىندا بولاتىندىعىن ءاربىر جولداۋلارى مەن باعدارلاماسىندا ەسكەرىپ كەلەدى. وسى جولى دا ەلىمىزدىڭ جاستارىن نازاردان تىس قالدىرعان جوق. ەلباسى ەرەكشە سەنىم ارتىپ جانە جاڭا مۇمكىندىكتەرمەن قامتاماسىز ەتۋ ماقساتىندا الدىمىزدا كەلە جاتقان 2019 جىلدى «جاستار جىلى» دەپ اتاۋدى ۇسىندى. بۇل بىزگە بەرىلىپ وتىرعان وتە ۇلكەن مۇمكىندىك ەكەندىگىن ءتۇسىنۋىمىز قاجەت. ەلباسىمىزدىڭ ارتقان سەنىمىن اقتاۋ ءۇشىن وقۋ ورنىمىزدىڭ بارشا جاستارىن وسى باعىتقا جۇمىلدىرۋدى ماقسات ەتىپ قويدىق. بارشا بەلسەندى جاستار, جاس عالىمدار مەن تالانتتار جاڭا يدەيالارى مەن جوبالارىنا قولداۋ تابا الادى دەگەن سەنىمدەمىز.
بۇكىل الەم الدىندا باسەكەگە قابىلەتتى ەل بولۋ – ءبىزدىڭ باستى ماقساتىمىز. م.اۋەزوۆ اتىنداعى وقمۋ-دىڭ جاستارى ەلباسىنىڭ جولداۋىن تولىق قۋاتتاي وتىرىپ, ونى ءىس جۇزىندە جۇزەگە اسىرۋ جولىندا وزدەرىنىڭ بار كۇش-جىگەرىن جۇمسايتىن بولادى. ءبىز, جاستار ەلباسى جولداۋىن قولدايمىز, ەل دامۋى جولىندا ايانباي ەڭبەك ەتەمىز.
ءبىز, شۋاقتى ولكەنىڭ ەلجاندى ۇرپاقتارى, ەلباسى, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باسشىلىعىمەن جۇرگىزىلىپ وتىرعان سىندارلى ساياساتتى قولداي وتىرىپ, تاۋەلسىز قازاقستاننىڭ باستى جەتىستىگى – بىرلىك پەن قوعامدىق كەلىسىمدى نىعايتۋعا ءبىر كىسىدەي ۇلەس قوسامىز دەپ سەندىرەمىز.
ماعجان يساحوۆ,
م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى جاستار ورتالىعىنىڭ ديرەكتورى