پارلامەنت سەناتىنىڭ دەپۋتاتتارى دينار نوكەتاەۆا, تولەۋبەك مۇقاشەۆ جانە دۋلات قۇسداۋلەتوۆ الماتى قالاسىندا جۇمىس ساپارىمەن بولىپ, ەلباسىنىڭ جولداۋىن ءتۇسىندىرۋ ماقساتىندا الماتى اۋىر ماشينا جاساۋ زاۋىتىنىڭ ەڭبەك ۇجىمىمەن كەزدەستى.
سەناتورلار زاۋىت ءىشىن ارالاپ, جۇرگىزىلىپ جاتقان جۇمىستاردى كورىپ, شەشىمىن تاپپاي جاتقان كەيبىر ماسەلەلەردى ۇكىمەتتىك دەڭگەيدە كوتەرەتىندەرىن جەتكىزدى. – ءبىزدىڭ مۇندا كەلۋدەگى نەگىزگى ماقساتىمىز – وتاندىق ءوندىرىستى قولداۋ, سونداي-اق كاسىپورىن باسشىلارىمەن تىلدەسىپ, قانداي وزەكتى ماسەلەلەرى بارىن ءبىلۋ. كەيبىر شەنەۋنىكتەر مۇنداي ءوندىرىس ورىندارىنا كەلمەيدى. ال ءبىزدىڭ كاسىپكەرلەر كافە-بار, مەيرامحانا, قوناقۇيلەر سالۋعا اۋەس. جاستارىمىز از اقشاعا داياشى, كۇزەتشى, كولىك جۋشى بولىپ جۇمىس ىستەپ ءجۇر. ودان دا ءبىز وتاندىق ءوندىرىسىمىزدى قولداپ, قولدان كەلگەنشە كومەكتەسىپ, جاستاردى وسىندا جۇمىسقا تارتۋعا ۇگىتتەۋىمىز كەرەك, – دەدى سەنات دەپۋتاتى تولەۋبەك مۇقاشەۆ. قۇيۋ تسەحىندا ىستەيتىن جۇمىسشىلاردىڭ ورتاشا جالاقىسى 364 000 تەڭگەنى قۇرايدى ەكەن. زاۋىتتا 870 ادام جۇمىس ىستەيدى. سەناتورلار اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە جانە وتاندىق ۇلتتىق كيىم ۇلگىلەرىن شىعاراتىن «ەركە-نۇر» كاسىپورنىندا دا بولدى.
تالعات ءسۇيىنباي,
«ەگەمەن قازاقستان»
الماتى