«ۇلتتىق عىلىمي كارديوحيرۋرگيالىق ورتالىعى» اق-تا تمد ەلدەرىندە العاشقى رەت جاڭا ستاندارتتاردى بەلگىلەيتىن Azurion ساراپتامالىق كلاسىنىڭ انگيوگرافيالىق جۇيەسىندەگى بىرەگەي وپەراتسيالىق بولمە جۇمىسىن باستادى.
قازىرگى كەزدە مەديتسيناعا جاڭا تەحنولوگيالاردىڭ ەنۋى وپەراتسيالاردىڭ بۇرىنعىداي ەمەس, از ءينۆازيۆتى وتۋىنە, ءسويتىپ پاتسيەنتتەر ورنىنان تەز تۇرىپ كەتۋىنە جول اشقان. ۋاقىت وتكەن سايىن وسى باعىتتاعى جۇمىستاردى ورىستەتۋدەگى ىزدەنىستەردىڭ جەمىسى دە مولايا تۇسۋدە. سونىڭ ءبىرى – تمد ەلدەرىندە ءبىرىنشى بولىپ Azurion وزىق مودەلىن پايدالانۋ. ول وتانىمىزدا كارديوحيرۋرگيا سالاسىندا ۇزدىك جەتىستىكتەرىمەن كورىنىپ جۇرگەن ۇلتتىق عىلىمي كارديوحيرۋرگيا ورتالىعىندا العاش رەت جۇزەگە استى. دەنساۋلىق ساقتاۋ ۆيتسە-ءمينيسترى الەكسەي تسويدىڭ ايتۋىنا قاراعاندا, جىلىنا ەلىمىزدە جۇرەك-قان تامىرى اۋرۋلارىنا 16 مىڭ وپەراتسيا جاسالادى ەكەن. ال ورتالىقتاعى جاڭا تەحنولوگيا بىرىكتىرىلگەن وپەراتسيا جاساۋعا مۇمكىندىك تۋدىرادى. جاڭا قۇرىلعىنىڭ بۇدان دا وزگە ارتىقشىلىعى كوپ. ماسەلەن, ول ارقىلى پاتسيەنتكە وپەراتسياعا دەيىن جاسالعان بارلىق زەرتتەۋلەر, وپەراتسيا ۋاقىتىنداعى اعزاداعى وزگەرىستەر, دەرتتىڭ قاي جەردە, قانداي دارەجەدە ەكەنى بارلىعى ايناداي كورىنىپ, وڭاي باسقارىلاتىن سەنسور ارقىلى دارىگەردىڭ باقىلاۋىندا بولادى. جانە ءبىر ارتىقشىلىعى, قانداي ءبىر اۋرۋدى انىقتاۋدا, دياگنوستيكادا قاجەتتىلىك تۋاتىن راديويزوتوپتى سۇيىقتىقتى پايدالانۋدى دا جاڭا وزىق مودەل ءبىرشاما ىعىستىرادى ەكەن. ياعني, اعزاعا رادياتسيانىڭ تەرىس اسەرىن بولدىرمايدى. ۆيتسە-مينيستر جاڭا قوندىرعىنىڭ تانىستىرىلىمىندا «جۇرەككە جاسالاتىن وپەراتسيا اشىق جانە جابىق بولىپ بولىنەدى, وكىنىشكە قاراي, قازاقستاندا اشىق ءتۇرىن جاساۋ كوبەيىپ بارا جاتىر, وسى تۇرعىدا جاڭا تەحنولوگيانىڭ كومەگىمەن بىرىكتىرىلگەن وپەراتسيا جاساۋ اشىق وپەراتسيالاردى ازايتادى. بۇل الەمدىك مەديتسينادا دالەلدەنگەن ءادىس. سەبەبى اشىق ءتۇرىن جاساۋ اناعۇرلىم قاۋىپتى», دەي كەلە, پاتسيەنتتەر دەنساۋلىعىن جاقسارتۋدا, جوعارى دەڭگەيدە مەديتسينالىق كومەك كورسەتۋدە كارديوحيرۋرگيادا ۇزدىك الەمدىك ستاندارتتاردى قولدانۋدى جۇرەك-قان تامىرلارى اۋرۋلارىمەن كۇرەستەگى ءسوزسىز ارتىقشىلىق دەگەن پىكىرىمەن تۇجىرىمدادى.
اتالعان قۇرىلعى ارقىلى جاڭا تۋعان سابيدەن, قارتتارعا دەيىن وپەراتسيا جاساۋعا بولادى. اق-تىڭ باسقارما توراعاسى يۋري پيانىڭ ايتۋىنشا, جاڭا بولمە تانىستىرىلىمىنا دەيىن Azurion اپروباتسيادان ءوتىپ 50-گە جۋىق وپەراتسيا جاسالىپ ۇلگەرگەن. ياعني, جاڭا تەحنولوگيا تولىق پراكتيكالىق تەكسەرۋدەن ءوتتى دەپ ايتا الامىز. بىرىكتىرىلگەن وپەراتسيا جاساۋ كابينەتىندە ءبىر ۋاقىتتا 8-10 قىزمەتكەر ارەكەت ەتەدى. تەحنولوگيانىڭ تاعى ءبىر ارتىقشىلىعى, بۇعان دەيىن جاسالىپ جۇرگەن وپەراتسيالارعا قاراعاندا ۋاقىتتى 20%-عا قىسقارتادى.
ورتالىقتىڭ ينتەرۆەنتسيالىق كارديولوگيا جانە راديولوگيا ءبولىمىنىڭ جەتەكشىسى سەرىك الىمباەۆ جۇرەكتى توقتاتپاستان, كەسپەي جاساۋ ءادىسىنىڭ ناۋقاستار ءۇشىن وتە جەڭىل, ءارى دارىگەرگە دە قولايلى ەكەنىنە توقتالعان. مۇنىڭ ەڭ جاقسى جەرى ناۋقاستار وپەراتسيادان سوڭ ءبىر-ەكى كۇن عانا جاتادى. ناركوز بەرىلمەيدى. رەابيليتاتسيالىق كەزەڭ دە وتە قىسقا. مۇنداي وپەراتسيالاردى ءبىز كىشكەنتايلارعا دا, ۇلكەن كىسىلەرگە دە جاسايمىز, ءتىپتى تۋعانىنا 2 ساعات قانا بولعان ءسابي مەن 93 جاستاعى قارياعا دا ءدال وسى جاڭا تەحنولوگيا كومەگىمەن ءساتتى وپەراتسيا جاسالدى, دەگەن سەرىك الماز ۇلىنىڭ ايتقاندارىن قوندىرعىنى قولىندا ويناتىپ تۇرعان ينتەرۆەنتسيالىق كارديولوگ ءابدۋراشيد مۇساەۆ تا قۇپتادى. «79 جاستاعى كىسىگە جاسالعان وپەراتسيادان بايقاعانىمىزداي, كومپيۋتەرلىك توموگرافيا بىزگە اۆتوماتتى تۇردە قاي جەرگە كلاپان قويۋ كەرەكتىگىن كورسەتتى. قازىر كونتراست, ياعني راديويزوتوپتاردى قولدانۋ ازايدى, بىراق وپەراتسيانىڭ ساپاسى جوعارىلادى. ول وسى قۇرىلعىنىڭ ناقتى ءارى تەز ارەكەت ەتۋىنىڭ ناتيجەسىندە مۇمكىن بولدى. سونداي-اق رەنتگەن ساۋلەلەرىنىڭ كەرى اسەرى دە ازايادى», دەيدى كارديولوگ ءا.مۇساەۆ.
ورتالىق باسشىسى يۋري پيا بۇعان دەيىن جىلىنا 6 مىڭ وپەراتسيا جاسالسا, ەندى ونىڭ قاتارى 8 مىڭعا دەيىن جەتكىزۋگە بولاتىنىن ايتا كەلە, ول ادامداردىڭ دەنساۋلىعىن جاقسارتۋدا دا, سالانى جەتىلدىرۋدە دە ۇلكەن قادام ەكەنىن جەتكىزدى.
Azurion يننوۆاتسيالىق انگيوگرافيالىق جۇيەسىن ەلىمىزگە الىپ كەلگەن كومپانيا Philips-ءتىڭ قازاقستان جانە ورتالىق ازياداعى باس ديرەكتورى گۇلنارا سەبەستەن ء«بىز, Philips-ءتىڭ ءومىردى جاقسى جاعىنا وزگەرتە الاتىنىنا, اسىرەسە دەنساۋلىق ساقتاۋ جانە دەنساۋلىق قورعاۋ سالاسىنا ناتيجەلى جۇمىس اتقارا الاتىنىنا سەنىمدىمىز. قازاقستاننىڭ ەمدەۋ مەكەمەلەرىمەن ىنتىماقتاستىق – ءبىزدىڭ ستراتەگيالىق باسىمدىقتارىمىزدىڭ ءبىرى بولىپ تابىلادى. ورتالىق ازياداعى ەڭ ۇزدىك كارديوورتالىقتاردىڭ ءبىرى بولىپ سانالاتىن ۇلتتىق عىلىمي كارديوحيرۋرگيالىق ورتالىعىندا Azurion ورناتۋ تۇرعىندارعا مەديتسينالىق كومەكتى كورسەتۋدىڭ ساپاسىن جاقسارتادى دەپ سەنەمىز», دەيدى.
انار تولەۋحانقىزى,
«ەگەمەن قازاقستان»