بۇگىن ساكەن سەيفۋلليننىڭ تۋعان كۇنى

ساكەن سەيفۋللين 1894 جىلى15 قازاندا جەزقازعان وبلىسى, اقادىر اۋدانى, قاراشىلىك قىستاعىندا دۇنيەگە كەلگەن. نىلدىدەگى ورىس-قازاق, اقمولاداعى باستاۋىش پريحود مەكتەبىندە (1905–1908), قالالىق ءۇش كلاستى ۋچيليششەدە (1913–1916) وقىدى. 1914 جىلى قازان قالاسىندا «وتكەن كۇندەر» اتتى تۇڭعىش ولەڭدەر جيناعىن باستىردى. ومبىدا قازاق جاستارىنىڭ «بىرلىك» قاۋىمى باسشىلارىنىڭ ءبىرى بولدى. 1917 جىلى بۇعىلىدا مەكتەپ اشىپ, ورىس تىلىنەن ساباق بەردى. 1917 جىلى 9 ناۋرىزدا «اسىعىپ تەز اتتاندىق» اتتى ولەڭىن جازدى. كەشىكپەي اقمولا قالاسىنا اۋىسىپ, «جاس قازاق» ۇيىمىن اشتى, «تىرشىلىك» گازەتىن شىعارىستى, 3 ايلىق پەدكۋرستا وقىتۋشى بولدى. 1918 جىلعى ساۋىردە «جاس قازاق مارسەلەزاسىن» جازىپ, 1 مامىردا «باقىت جولىندا» اتتى پەساسىنىڭ پرەمەراسىن كورسەتتى.

1918 جىلعى 4 ماۋسىمدا اقتاردىڭ كوتەرىلىسى بولىپ, اقمولا سوۆدەپشىلەرى تۇتقىندالدى. اتاماننىڭ «ازاپ ۆاگونىندا» 47 كۇن اجالمەن ارپالىسىپ, 1919 جىلعى 3 ساۋىردە كولچاكتىڭ ومبىداعى تۇرمەسىنەن قاشىپ شىقتى. 1920 جىلى 7 مامىردا اقمولاعا قايتىپ ورالىپ, اتقارۋ كوميتەتى توراعاسىنىڭ ورىنباسارى جانە اكىمشىلىك ءبولىمىنىڭ مەڭگەرۋشىسى بولادى. 1920 جىلعى 4 قازاندا قازاق كەڭەس اۆتونوميالىق رەسپۋبليكاسىن جاريالاعان كەڭەستەردىڭ 1-قۇرىلتاي سەزىنە دەلەگات بولىپ قاتىسىپ, ورتالىق اتقارۋ كوميتەتىنىڭ مۇشەسى بولىپ سايلاندى. جەر-سۋ كوميسسياسىنىڭ جۇمىسىنا جانە ءباسپاسوز ىسىنە باسشىلىق ەتتى. 1922 جىلى «ەڭبەكشى قازاق» گازەتىنىڭ رەداكتورى, حالىق اعارتۋ كوميسسارىنىڭ ورىنباسارى بولدى.

قازاق اسسر كەڭەسىنىڭ 3 سەزىندە حالىق كوميسسارلارى كەڭەسىنىڭ توراعاسى بولىپ سايلاندى (1922–1925). 1925 جىلى 7 ساۋىردە حالىق اعارتۋ كوميسسارياتى جانىنداعى عىلىم ورتالىعىنىڭ توراعاسى, 12 ماۋسىمدا قازاقستان پرولەتار جازۋشىلارى اسسوتسياتسياسىنىڭ (قازاپپ) باسشىسى بولىپ تاعايىندالدى. 1926 جىلى بك(ب)پ ولكەلىك كوميتەتىنىڭ پارتيا تاريحى ءبولىمىنىڭ مەڭگەرۋشىسى, 1927 جىلى قىزىلورداداعى حالىق اعارتۋ ينستيتۋتىنىڭ, تاشكەنتتەگى قازاق پەداگوگيكالىق ينستيتۋتىنىڭ ديرەكتورى بولىپ جۇمىس ىستەدى. 1927 جىلى شىققان «جىل قۇسى» الماناحىنا باسشىلىق ەتتى, «جاڭا ادەبيەت» جۋرنالىن اشۋعا (1928) اتسالىستى. 1922 جىلدان باستاپ «قىزىل قازاقستان» جۋرنالىندا جاريالانا باستاعان «تار جول, تايعاق كەشۋ» اتتى مەمۋارلىق شىعارماسىن جەكە كىتاپ ەتىپ (1927) شىعاردى. 1929 جىلى قازاقتىڭ زيالى ازاماتتارىنا ارناپ اۋىز ادەبيەتى ۇلگىسىن جيناۋ جونىندە جازعان «اشىق حاتىن» جاريالادى. قازاقتىڭ مەملەكەتتىك پەداگوگيكا ينستيتۋتىنىڭ دوتسەنتى بولدى.

1932 جىلى «ادەبيەت مايدانى» جۋرنالىنىڭ رەداكتورى, 1934 جىلى قازاقتىڭ كوممۋنيستىك جۋرناليستيكا ينستيتۋتىنىڭ پروفەسسورى قىزمەتىن اتقاردى. 1936 جىلى قازاق ادەبيەتى مەن ونەرىنىڭ ماسكەۋدە وتكەن ءبىرىنشى ونكۇندىگىنە قاتىستى. 1917 جىلى «جۇباتۋ» اتتى تۇڭعىش اڭگىمەسىن جازدى. 1922 جىلى «اساۋ تۇلپار» اتتى ولەڭدەر جيناعىن», «باقىت جولىندا», «قىزىل سۇڭقارلار» پەسالارىن جازدى. «دومبىرا» (1924), «ەكسپرەسس» (1926), «تۇرمىس تولقىنىندا» (1928), «كوكشەتاۋ» (1929) ولەڭ-پوەمالار جيناقتارىن, «تار جول, تايعاق كەشۋ» اتتى تاريحي مەمۋارلىق رومانىن (1927), «جەر قازعاندار» پوۆەسىن (1927) جارىققا شىعاردى.

30-شى جىلدارى «الباتروس» (1932), «قىزىل ات» (1934), «سوتسياليستان» (1935) اتتى پوەمالارىن, «ايشا» (1930), «جەمىستەر» (1935) اتتى پوۆەستەرىن جاريالادى. قازاقستان ەسكى ادەبيەت نۇسقالارىن جيناۋ, زەرتتەۋ, باستىرۋ ىسىمەن شۇعىلداندى. قازاق فولكلورىنىڭ تاريحىنا ارنالعان «قازاق ادەبيەتى» (1932) كىتابىن جازدى. قازاق ادەبيەتىنىڭ وقۋلىقتارىن جاساۋعا قاتىستى. باستى شىعارمالارى ورىس تىلىنە اۋدارىلىپ, كەڭەستەر وداعى حالىقتارىنىڭ بىرقاتار تىلدەرىندە باسىلدى. قازاق جازۋشىلارىنىڭ ىشىنەن تۇڭعىش رەت ەڭبەك قىزىل تۋ وردەنىمەن ماراپاتتالىپ, شىعارماشىلىق ەڭبەگىنە 20 جىل تولۋى مەرەكەلەندى. قازاقستان جازۋشىلار وداعى تاڭداۋلى دەرەكتى پروزا مەن پۋبليتسيستيكالىق شىعارمالارعا جىل سايىن بەرىلىپ تۇراتىن س.سەيفۋللين اتىنداعى ادەبي سىيلىق تاعايىندادى (1985). الماتى, استانا سياقتى كوپتەگەن قالالار مەن ەلدى مەكەندەرگە, تەاترلار مەن مەكتەپتەرگە, كىتاپحانالار مەن كوشەلەرگە ساكەن سەيفۋلليننىڭ اتى بەرىلگەن.