مەملەكەت باسشىسىنىڭ حالىققا بيىلعى جولداۋى ەلىمىزدىڭ دامۋىنا تىڭ سەرپىن بەرەدى. وسى ماڭىزدى قۇجات اياسىندا اتىراۋ وبلىسىندا دا بىرقاتار يگى ىستەر قولعا الىنادى. وبلىس اكتيۆىنىڭ جينالىسىندا ايماق باسشىسى نۇرلان نوعاەۆ جولداۋدا ايقىندالعان مىندەتتەردى جۇزەگە اسىرۋ جايىن باياندادى.
مۇنايلى وڭىردە حالىقتىڭ جان باسىنا شاققانداعى جالپى وڭىرلىك ءونىم 2 638,5 مىڭ تەڭگە كولەمىندە قالىپتاستى. بۇل – ەلىمىز بويىنشا ەڭ جوعارى كورسەتكىش. اتىراۋ ايماعى الەۋمەتتىك-ەكونوميكالىق تۇرعىدان تابىستى دامىپ كەلەدى.
– مەملەكەت باسشىسى «بيزنەستىڭ جول كارتاسى-2020» باعدارلاماسىن 2025 جىلعا دەيىن ۇزارتۋدى تاپسىردى. بۇل تاعى دا كوپ جوبالاردى جۇزەگە اسىرۋعا, سول ارقىلى كاسىپكەرلىكتى دامىتۋعا مۇمكىندىك بەرەدى. اتالعان باعدارلاما ىسكە اسا باستاعان ۋاقىتتان بەرى, ياعني 2010-2018 جىلدار ارالىعىندا 1158 كاسىپكەر 81,3 ملرد تەڭگە كولەمىندە مەملەكەتتىك قولداۋعا يە بولدى, – دەدى نۇرلان نوعاەۆ. – بۇل 5,7 مىڭنان استام جاڭا جۇمىس ورنىنىڭ اشىلۋىنا سەپتىگىن تيگىزدى.
جىل باسىنان بەرى ايماقتاعى بيزنەس-قۇرىلىمدارمەن جالپى سوماسى 182,6 ملرد تەڭگەنىڭ ءونىمى ءوندىرىلدى. مەملەكەتتىك قولداۋ باعدارلامالارى كاسىپكەرلەرگە جاڭا ءوندىرىس ورىندارىن اشۋعا سەرپىن بەرىپ وتىر. قازىر وڭىردەگى شاعىن جانە ورتا بيزنەس سۋبەكتىلەرىنىڭ سانى 57 مىڭعا جەتتى. بيزنەستى جۇرگىزۋگە قولايلى جاعداي جاساۋ ءۇشىن وبلىس ورتالىعىندا, بارلىق اۋدانداردا كاسىپكەرلەردى قولداۋ ورتالىقتارى اشىلدى.
– ەلباسى حالىقتى الاڭداتاتىن ماسەلەلەرگە جەكە-جەكە توقتالدى. ءبىرىنشى كەزەكتە تۇرعىن ءۇي-كوممۋنالدىق شارۋاشىلىق سالاسىنداعى تاريفتەر ماسەلەسى ماڭىزدى. اتىراۋ وبلىسى بويىنشا كوممۋنالدىق قىزمەت تاريفتەرى, سونىڭ ىشىندە ەلەكتر ەنەرگياسى, سۋ جانە كارىز قىزمەتتەرى بويىنشا بيىل ءوسۋ دەڭگەيى بولعان جوق, – دەپ اتاپ ءوتتى نۇرلان نوعاەۆ. – جولداۋدىڭ تاعى ءبىر باعىتى ەكسپورتقا باعدارلانعان يندۋستريالاندىرۋ ماسەلەلەرى. وبلىستا 44 كاسىپورىن ەكسپورتقا باعىتتالعان ءونىم شىعارادى. جىل باسىنان بەرى 152,4 ملن دوللاردىڭ تاۋارى ءوندىرىلدى. اتالعان كاسىپورىنداردىڭ بەلسەندىلىگىن ارتتىرۋ بويىنشا جۇمىس جۇرگىزىپ جاتىرمىز.
اتىراۋ نەگىزىنەن مۇنايلى ايماق بولعانىمەن, اۋىل شارۋاشىلىعىن دامىتۋعا دا ايرىقشا كوڭىل بولىنەدى. جولداۋدا كورسەتىلگەن اگروونەركاسىپ كەشەنىنىڭ الەۋەتىن ىسكە اسىرۋ بويىنشا ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2022 جىلعا 2,5 ەسە كوبەيتۋ جوسپارى قويىلىپ وتىر. وبلىس اكىمى 7 075 گەكتار ەگىستىك القابى ەلەكتروندى كارتاعا ەنگىزىلگەنىن ايتتى. جولداۋ جۇكتەگەن مىندەتتەر قاتارىندا ءداستۇرلى ەمەس ەنەرگيا كوزدەرىن ەنگىزۋ, حالىق تۇتىناتىن تاۋارلاردى شىعارۋدى دامىتۋ دا بار. وبلىس كولەمىندە جاڭارتىلعان ەنەرگيا كوزدەرىن دامىتۋ ماقساتىندا يساتاي اۋدانىنداعى ماناش ەلدى مەكەنىندە قۋاتى 52,8 مۆت جەل ەلەكتر ستانساسىنىڭ قۇرىلىسى ءجۇرىپ جاتىر.
اتىراۋداعى ءبىلىم بەرۋ سالاسىنىڭ وزەكتى ماسەلەلەرى – اپاتتى جاعدايداعى مەكتەپتەر مەن ءۇش اۋىسىمدى مەكتەپتەر. قازىر بەس اپاتتىق جاعدايداعى مەكتەپ بار. بۇل جاعدايدان شىعۋ ماقساتىندا ءبىر مەكتەپ قۇرىلىسى جۇرۋدە, ەكى مەكتەپ قۇرىلىسىنىڭ جوبالىق-سمەتالىق قۇجاتتارى دايىن, ەكى مەكتەپ قۇرىلىسىنىڭ قۇجاتتارى جاساقتالۋدا. وبلىستا ءۇش اۋىسىمدا وقيتىن 14 مەكتەپ بار. بۇل ماسەلەنى دە شەشۋدىڭ جولدارى قاراستىرىلىپ, جاڭا مەكتەپتەر سالىنىپ جاتىر.
جولداۋدا ءومىر سۇرۋگە جايلى ورتا قالىپتاستىرۋ تۋرالى دا ايتىلعان. ەلباسىنىڭ بەس الەۋمەتتىك باستاماسى اياسىندا باستالعان «7-20-25» باعدارلاماسى وڭىردە ءساتتى ىسكە اسىرىلۋدا. بۇگىنگە دەيىن 1024,9 ملن تەڭگەگە 80 ءوتىنىم ءتۇسىپ, 707 ملن تەڭگەنىڭ 55 ءوتىنىمى ماقۇلدانعان.
اكتيۆ جيىنىندا اۋماقتىق دامۋ, پوليتسيا قىزمەتىن وڭتايلاندىرۋ تۋرالى دا ايتىلدى. ال بيىلعى جولداۋدىڭ ەرەكشەلىگى – ەلباسى حالىقتىڭ تۇرمىس-تىرشىلىگىن ودان ءارى جاقسارتۋعا, تابىس كوزىن مولايتۋعا باعىتتالعان بىرنەشە مىندەتتى العا قويىپ وتىر. ال ولاردى اتقارۋعا مۇنايلى ايماقتا مۇمكىندىك جەتكىلىكتى.
باقىتگۇل باباش,
«ەگەمەن قازاقستان»
اتىراۋ وبلىسى