كەنشىلەر استاناسىندا «اۋەندى سارىارقا» حالىقارالىق فەستيۆالىنىڭ شىمىلدىعى سالتاناتتى تۇردە اشىلدى. وسىمەن جيىرماسىنشى رەت ۇيىمداستىرىلىپ وتىرعان ونەر بايقاۋى 15 قازانعا دەيىن جالعاسادى. فەستيۆال باستالماس بۇرىن قاراعاندىداعى «جۇلدىزدار اللەيادا» بەلگىلى ديريجەر, قازاقستاننىڭ ەڭبەك سىڭىرگەن قايراتكەرى, مەملەكەتتىك ۇرلەمەلى اسپاپتار وركەسترىنىڭ كوركەمدىك جەتەكشىسى قانات احمەتوۆتىڭ قۇرمەتىنە اتاۋلى جۇلدىز قويىلدى.
– مەن وتە باقىتتىمىن. وسىنداي نيەتتەرىڭىز ءۇشىن, مەنىڭ ەڭبەگىمدى باعالاعاندارىڭىز ءۇشىن باسىمدى ءيىپ العىس ايتامىن. فەستيۆالىمىز بولاشاقتا دا جاندانىپ, ءاردايىم كورەرمەنىن قۋانتا بەرسىن, دەدى اتاقتى ديريجەر.
«جۇلدىزدار اللەياسى» قاراعاندىنىڭ ورتالىق ساياباعىنا كىرەبەرىستە, «كەنشى داڭقى» ەسكەرتكىشىنىڭ جانىندا ورنالاسقان. ول 2007 جىلى «قاراعاندى – جاستىعىمنىڭ قالاسى» اتتى ءبىرىنشى رەترو-فەستيۆال كەزىندە اشىلعان بولاتىن.
«جۇلدىزدار اللەياسى» ەل مادەنيەتىنىڭ دامۋىنا سۇبەلى ۇلەس قوسقان, شىعارماشىلىعىمەن قازاقستاندى الەمگە تانىمال ەتكەن تۇلعالارعا ارنالعان. اللەياداعى العاشقى جۇلدىز حالىق ءارتىسى بيبىگۇل تولەگەنوۆاعا ورناتىلدى. سونداي-اق, بۇل جەردە روزا رىمباەۆا, «دوس-مۇقاسان» ءانسامبلى, قايرات بايبوسىنوۆ, ەسكەندىر حاسانعاليەۆ, ماقپال ءجۇنىسوۆا, بولات سىزدىقوۆ سىندى ونەر مايتالماندارىنىڭ اتاۋلى جۇلدىزدارى بار.
قايرات ءابىلدا,
«ەگەمەن قازاقستان»
قاراعاندى