ورال قالاسىندا باتىس قازاقستان وبلىسىنىڭ اكتيۆ جينالىسى بولىپ, وندا قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنان تۋىندايتىن مىندەتتەردى جۇزەگە اسىرۋ ماسەلەسى تالقىلاندى.
- بۇل جولداۋ – بۇعان دەيىن جۇزەگە اسىرىلىپ كەلگەن ستراتەگيالىق قۇجاتتاردىڭ زاڭدى جالعاسى. جاڭا جولداۋ ەلىمىزدىڭ, ءوڭىرىمىزدىڭ دامۋىنا تىڭ سەرپىن بەرەتىن بولدى, - دەدى اكتيۆ جينالىسىندا سويلەگەن سوزىندە باتىس قازاقستان وبلىسىنىڭ اكىمى التاي كولگىنوۆ.
ەلباسى تاپسىرماسىنان كەيىن قازاقستاندىقتاردىڭ ەداۋىر بولىگىنىڭ الەۋمەتتىك جاعدايى جاقساراتىن بولدى. بۇل اسىرەسە ءبىلىم سالاسى قىزمەتكەرلەرىنە قاتىستى. ءوڭىر باسشىسىنىڭ ايتۋىنشا, باتىس قازاقستان وبلىسىندا مەكتەپكە دەيىنگى ءبىلىم بەرۋ مەكەمەلەرىندەگى 3 829 تاربيەشى مەن قىزمەتكەردىڭ جالاقىسى وسەدى.
جولداۋدا وتاندىق ءونىمدى ارتتىرىپ, ەكسپورتقا كوڭىل ءبولۋ تاپسىرىلدى. وتكەن جىلى ەت ەكسپورتى بويىنشا رەسپۋبليكالىق كورسەتكىشتىڭ 40 پروتسەنتىن, ياعني جارتىسىنا جۋىعىن اق جايىق ءوڭىرى اتقارعان. 1300 توننا سيىر ەتى شەتەلگە, اتاپ ايتقاندا رەسەي, ارمەنيا, يران جانە اۋعانستان مەملەكەتتەرىنە شىعارىلدى. قوي ەتىن ەكسپورتتاۋ جوسپارى 2,5 ەسەگە ارتىق ورىندالىپ, 500 تونناعا جۋىق ەت شەتەلگە ساتىلدى.
- ءبىز بۇنىمەن شەكتەلمەيمىز. سەبەبى جاڭا جولداۋ قوسىمشا مۇمكىندىكتەر تۋدىرىپ وتىر. ەلباسىنىڭ تاپسىرماسىنا سايكەس وڭىردەگى يرريگاتسيالىق قۇرىلىمدار جۇيەسىن جاڭارتتىق. 4 ءىرى جوبا جۇزەگە اسىرىلىپ, سۋارمالى جەرلەر 70 مىڭ گەكتارعا كەڭەيدى. وسىنىڭ ناتيجەسىندە مالشارۋاشىلىعىمەن اينالىساتىن قوجالىقتار كوبەيە باستادى. شارۋا قوجالىقتارىنىڭ سانى 2017 جىلى 5 مىڭ بولسا, بيىل 6500-دەن استى - دەدى التاي كولگىنوۆ.
ءوڭىر باسشىسى ءوز بايانداماسىندا توقتاپ تۇرعان جوبالارعا ينۆەستور تارتىلىپ, جاڭادان تاعى 10 مىڭ باس مال بورداقىلايتىن الاڭدار سالۋ جوسپارلانعانىن ايتتى. بۇگىندە وڭىردەگى يگەرىلمەي جاتقان 1 ملن.گا جەر مەملەكەت مەنشىگىنە قايتارىلىپ, ونىڭ جارتىسى ىسكەر ازاماتتارعا قايتا بەرىلگەن. قولعا الىنعان 12 ينۆەستيتسيالىق جوبانىڭ تەڭ جارىمى شەتەلدىكتەردىڭ قاتىسۋىمەن جۇزەگە اسۋدا. ءبىلىم سالاسىندا وڭىردەگى جەكە بالاباقشالاردىڭ سانى 24-تەن 52-گە كوبەيىپ, 3 جاستان 6 جاسقا دەيىنگى بالالاردى مەكتەپكە دەيىنگى بىلىممەن قامتۋ – 100 پايىزدى قۇرادى. تسيفرلاندىرۋ اياسىندا قالاداعى بالاباقشا كەزەگى تولىقتاي ەلەكتروندى كەزەك جۇيەسىنە كوشىرىلدى. جىل سوڭىنا دەيىن بارلىق اۋدان ورتالىعى وسى جۇيەگە وتەدى.
باتىس قازاقستان وبلىسى ەلىمىز بويىنشا اۆتوجولدارى ەڭ ناشار ءوڭىر بولىپ ەسەپتەلەتىن. ءوڭىر باسشىسىنىڭ ايتۋىنشا بۇل جاعداي وزگەرەدى. «قازىر جىل سايىن 500 شاقىرىمعا جۋىق جول جوندەلۋدە. رەسپۋبليكالىق ماڭىزى بار ورال-تاسقالا-رف شەكاراسى باعىتىنداعى جول قۇرىلىسى بيىل اياقتالادى. «نۇرلى جول» باعدارلاماسى قارقىندى جۇرۋدە. الداعى ۋاقىتتا ورال-ورىنبور تاس جولى جاسالاتىن بولادى. وڭىرگە مامىر ايىندا كەلگەن پرەزيدەنتتىڭ ساپارى قورىتىندىسى بويىنشا, شالعاي اۋداندارعا جول تارتۋ تاپسىرماسىنا سايكەس قاراجات ءبولىندى, كەلەسى جىلى جۇمىستى باستايتىن بولامىز. جولداۋدا وڭىرىشىلىك جولدارعا اسا ءمان بەرىلدى. سوندىقتان, قالاداعى, اۋداندارداعى جولداردى جوندەۋ قارقىنىن تومەندەتپەيمىز» - دەدى التاي كولگىنوۆ.
باتىس قازاقستان وبلىسىنىڭ اكىمى وبلىس اكتيۆى الدىندا وڭىردە الدا قولعا الىناتىن جوبالار تۋرالى كەڭىنەن ايتىپ بەردى. ماسەلەن, 2019 جىلى 50 ەلدىمەكەندى تازا سۋمەن قامتۋ, ورال قالاسى تۇرعىندارىنىڭ قاۋىپسىزدىگى ءۇشىن ورناتىلاتىن بەينەباقىلاۋ جۇيەسى, بيىل جىل سوڭىنا دەيىن 7-20-25 باعدارلاماسى اياسىندا بەرىلەتىن 3 مىڭ پاتەر, «اتامەكەن» كىشى باعدارلاماسى بويىنشا مەتسەناتتاردىڭ كومەگىمەن اتقارىلعان جالپى قۇنى 200 ملن تەڭگەلىك 122 جوبا – بۇل وڭىردە جۇزەگە اسقان جانە قولعا الىنعان سان ءتۇرلى جوبالاردىڭ ءبىر بولىگى عانا.
وسى جيىندا ءسوز العان «سترويكومبينات» جشس ديرەكتورى باقىتجان نۇرباەۆ 2019 جىلدىڭ قاڭتارىنان باستاپ كومپانيا قىزمەتكەرلەرىنىڭ جالاقىسى وسەتىنىن حابارلادى. «پرەزيدەنت جولداۋىنان كەيىن ءبىزدىڭ ەرتەڭگى كۇنگە دەگەن سەنىمىمىز بەكي ءتۇستى. وندىرىسكە جاڭا تەحنولوگيا, وزىق جابدىقتاردى باتىل ەنگىزىپ, ەڭبەك ونىمدىلىگى مەن تابىسىمىزدى ارتتىرۋعا قول جەتكىزدىك. وتاندىق وندىرۋشىلەر مەملەكەت قولداۋىن انىق سەزىنىپ وتىر. وڭىردەگى تەمىربەتون رەزەرۆۋارلاردىڭ 90 پايىزىن ءبىزدىڭ كومپانيا شىعارادى. جىلىنا 2 ملرد تەڭگەنىڭ ءونىمىن ءوندىرىپ, ەل قازىناسىنا 200 ملن تەڭگە سالىق ءتۇسىمىن قۇيدىق. وڭىردەگى جول قۇرىلىسىنىڭ دامۋى, مەملەكەتتىك 7-20-25 باعدارلاماسى ءبىزدىڭ كومپانيانىڭ جۇيەلى تاپسىرىس الىپ, قالىپتى جۇمىس ىستەۋىنە مۇمكىندىك بەرىپ وتىر» دەيدى باقىتجان نۇرباەۆ.
«مەديتسينالىق ورتالىق» جشس ديرەكتورى رافحات يستاەۆ وڭىردەگى مەديتسينا قىزمەتكەرلەرى اتىنان پرەزيدەنت جولداۋىنان تۋىندايتىن ماقسات-مىندەتتەردى جۇزەگە اسىرۋعا دايىن ەكەندىگىن ءبىلدىردى. ۋچاسكەلىك دارىگەرلەر مەن مەدبيكەلەر جالاقاسىنىڭ ءوسۋى, قاعازباستىلىقتان ارىلۋ – دارىگەرلەردىڭ كوپتەن كۇتكەن جاڭالىعى ەدى. سونىمەن بىرگە وڭىردەگى مەديتسينالىق مەكەمەلەر وسى زامانعى ەڭ وزىق قۇرال-جابدىقتارمەن جاراقتانىپ جاتىر. ەندى بۇعان مەديتسينا قىزمەتكەرلەرىنىڭ كاسىبي بىلىكتىلىگى ساي كەلىپ, حالىق دەنساۋلىعى ءۇشىن ايانباي قىزمەت ەتۋى ءتيىس.
ورال قالاسىنداعى №17 ورتا مەكتەپ ديرەكتورى تامارا رۋديچ پرەزيدەنتتىڭ بيىلعى جولداۋى ءبىلىم سالاسى قىزمەتكەرلەرى ءۇشىن قۋانىشتى جاڭالىققا تولى بولعانىن ايتتى. «ەلباسى ونەركاسىپ, قۇرىلىس, دەنساۋلىق ساقتاۋ, ەكونوميكا سالاسى تۋرالى ايتسا دا ءبىلىم ماسەلەسىنە وقتىن-وقتىن ورالىپ وتىردى. ەكى ساعات بويى تەلەديدار الدىندا ءجىپسىز بايلانىپ قالدىق. پەداگوگتىڭ مارتەبەسى تۋرالى ارنايى زاڭ دۇنيەجۇزىنىڭ ەشبىر ەلىندە جوق ەكەن. ءبىز مەملەكەتتىڭ ەرەكشە قامقورلىعىن سەزىنە وتىرىپ, اسقان جاۋاپكەرشىلىك جۇكتەلگەنىن دە تۇسىندىك» - دەدى تامارا رۋديچ.
بۇدان كەيىن مىنبەگە ء«سابيت» شارۋا قوجالىعىنىڭ جەتەكشىسى ەربولات قۇرمانعاليەۆ, جەكە كاسىپكەر سايان باەتوۆ شىعىپ, وزدەرى ارالاسىپ جۇرگەن اۋىل شارۋاشىلىعى سالاسىنداعى ءىس تاجىريبەسىمەن ءبولىستى. ءسوز الۋشىلاردىڭ ءبارى دە پرەزيدەنتتىڭ جاڭا جولداۋى ەل ەكونوميكاسى مەن الەۋمەتتىك جاعدايىن كوتەرۋگە تىڭ سەرپىن بەرەتىنىن باسا ايتتى. جيىن سوڭىندا وبلىس اكتيۆى جينالىسىنىڭ قارارى قابىلداندى.
- ەلباسى كەلەر جىلدى جاستار جىلى دەپ جاريالاۋدى ۇسىندى. بۇل ۇسىنىستى ءوڭىر جاستارى دا قۋانا قابىلدادى. بۇگىندە وبلىسىمىزدا بىرنەشە كوۆوركينگ ورتالىعى جۇمىس ىستەيدى. جاس وتباسىلارعا ارنالعان اقجايىق باسپانا باعدارلاماسىن پىسىقتاۋ قاجەت. بيزنەس باستاعىسى كەلەتىن جاستارعا ارنايى وقىتۋلار, جەڭىلدىكپەن نەسيە الۋ جاعىن قاراستىرامىز. سونىمەن قاتار جەرگىلىكتى بيۋدجەت ەسەبىنەن ءبىلىم گرانتتارىن ءبولۋدى ودان ءارى جالعاستىراتىن بولامىز. جاستار جىلى ارزان فلەشموبتارمەن كومكەرىلمەي, مازمۇندى دا ماعىنالى جىل رەتىندە اتالىپ ءوتۋ كەرەك, - دەپ تۇيىندەدى ءسوزىن التاي كولگىنوۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى