نيۋ-يوركتەگى ينۆەستيتسيالىق كونفەرەنتسيا اياسىندا قر پرەمەر-ءمينيسترىنىڭ ورىنباسارى اسقار جۇماعاليەۆ پەن بۇۇ-داعى قر تۇراقتى وكىلى قايرات وماروۆ بۇۇ باس حاتشىسى انتونيو گۋتەرريشپەن جانە ونىڭ ورىنباسارى ليۋ چجەنمينمەن كەزدەستى. كەزدەسۋلەردە تۇراقتى دامۋ ماقساتتارىنا قول جەتكىزۋ, بۇۇ-نىڭ رەزيدەنت-ۇيلەستىرۋشى جۇيەسىن رەفورمالاۋ جانە ەلەكتروندىق ۇكىمەتتى دامىتۋ تۋرالى ايتىلدى, دەپ حابارلايدى پرەمەر-ءمينيستردىڭ ءباسپاسوز قىزمەتى.
بۇۇ باسشىلىعىمەن اڭگىمەلەسۋ كەزىندە اسقار جۇماعاليەۆ پرەزيدەنت ن. نازارباەۆتىڭ باستاماسىمەن قابىلدانعان «تسيفرلىق قازاقستان» باعدارلاماسى تۋرالى ايتىپ بەردى. باعدارلاما ينفراقۇرىلىمدى, ادام كاپيتالىن, ەلەكتروندى ۇكىمەتتى, تسيفرلىق ەكونوميكانى جانە يننوۆاتسيالىق ەكوجۇيەنى قۇرۋدى دامىتۋعا باعىتتالعان. ۆيتسە-پرەمەر, سونداي-اق, بۇل باعدارلاما تۇراقتى دامۋ ماقساتتارىنا قول جەتكىزۋگە ىقپال ەتەتىن قۇرالداردىڭ ءبىرى ەكەنىن اتاپ ءوتتى.
ءوز كەزەگىندە, بۇۇ-دا تسيفرلىق تەحنولوگيالاردى ەنگىزۋ سالاسىنداعى قر-نىڭ ماڭىزدى جەتىستىكتەرى اتالىپ ءوتتى. باس حاتشى انتونيو گۋتەرريش قر مەن بۇۇ اراسىنداعى ەلەكتروندىق ۇكىمەتتى دامىتۋ سالاسىنداعى ىنتىماقتاستىق تۋرالى كەلىسىم جاساسۋ مۇمكىندىگىن قاراستىرۋعا نيەت ءبىلدىردى. باس حاتشىنىڭ ورىنباسارى ليۋ چجەنمين بۇۇ-نىڭ ەكونوميكالىق جانە الەۋمەتتىك ماسەلەلەر دەپارتامەنتى (ەامد) قازاقستانمەن ىنتىماقتاستىقتا جاڭا جوبالاردى جۇزەگە اسىرۋعا مۇددەلى ەكەنىن اتاپ ءوتتى.
كەزدەسۋ قورىتىندىسى بويىنشا تاراپتار بارلىق ماسەلەلەر بويىنشا جەمىستى ىنتىماقتاستىقتى جالعاستىرۋعا نيەت ءبىلدىردى.
ەسكە سالا كەتەيىك, بۇۇ رەيتينگىسىندە قازاقستان ەلەكتروندىق ۇكىمەتتى دامىتۋ تۇرعىسىنان الەمنىڭ 193 ەلىنىڭ اراسىندا 39-ورىنعا يە.