ەلباسىنىڭ جولداۋلارى ەلىمىزدىڭ كەمەلدىلىگى مەن ازاماتتارىنىڭ يگىلىگى ءۇشىن قىزمەت ەتەتىنىنە كوز جەتكىزىپ تە كەلەمىز. كۇنى كەشەگى جولداۋدى ۇجىم بولىپ تىڭدادىق. جولداۋدا ايتىلعان بارلىق ماسەلە – ەلدىڭ كوكەيىندە جۇرگەن, شەشىمى مەن ىسكە اسىرۋ جولدارى ناقتىلانعان ماسەلەلەر. اسىرەسە وزىمىزگە ەتەنە تانىس كاسىپكەرلىككە, اۋىل شارۋاشىلىعى تاۋارىن وندىرۋشىلەردى قولداۋعا قاتىستى ايتىلعان باستامالار مەن جۇكتەلگەن مىندەتتەر ءبىز ءۇشىن وتە ماڭىزدى.
مەملەكەت باسشىسى القالى جيىندا مىسال رەتىندە كەلتىرگەن «بورتە-ميلكا» كەشەندى ءسۇت فەرماسى بۇگىندە قاناتىن كەڭگە جايىپ, ساپالى ونىمدەرى سۇرانىسقا يە بولۋدا. وسى ءسۇت ونىمدەرىن وڭدەۋ كەشەنىن ەلباسىنىڭ 2015 جىلعى جولداۋىنان كەيىن اشقان بولاتىنبىز. سول جولداۋدا كوتەرىلگەن باستامالارعا سۇيەنىپ, ايقىن ماقساتتاردى نەگىزگە الا وتىرىپ ىسكە كىرىستىك. مىنە, ارادا ءۇش جىل ءوتتى, بۇگىندە جەمىسىن حالىق كورىپ جاتىر. ءبىزدىڭ كەشەندى فەرما جولداۋ جۇكتەگەن مىندەتتەردىڭ جۇزەگە اسىرىلىپ جاتقانىن بىلدىرەتىن ناتيجەلى ءبىر عانا مىسالى دەر ەدىم. ەلباسىنىڭ اقوردادا وتىرىپ, اۋىلداعى ءبىزدىڭ جاعدايىمىزدى, جۇمىسىمىزدىڭ ناتيجەسىن جاقسى بىلەتىنى حالىققا ەتەنە جاقىن ەكەندىگىن تاعى ءبىر دالەلدەپ وتىر. تەلەارنا الدىندا جولداۋدى تىڭداپ وتىرعان ۇجىمىمىزدىڭ قۋانىشىندا شەك جوق. بىزگە بۇل جايت قوسىمشا كۇش-قۋات بەردى. بۇگىندە ءسۇت وڭدەۋ بويىنشا كورسەتكىشتەرىمىز دە, ساپا دا جوعارى. سوعان سايكەس جۇمىسشىلاردىڭ ايلىعى دا كوبەيگەن. سەرىكتەستىكتە 70 ادام جۇمىس ىستەيدى, ورتاشا ايلىق 100-200 مىڭ تەڭگە ارالىعىندا. ءونىم كولەمىنىڭ, ساپاسىنىڭ ارتۋى سوڭعى تەحنولوگيالارمەن جابدىقتالۋعا تىكەلەي بايلانىستى. اقىلدى تەحنولوگيالاردى وندىرىسكە ەنگىزۋدىڭ ناتيجەسىندە سيىرلاردى ساۋىنشى ەمەس, روبوت ساۋادى. ماماندارىمىزعا جاڭا تەحنولوگيالاردى مەڭگەرتۋ, ەلباسى جولداۋىندا ايتىلعان روبوتتاندىرىلعان جۇيەلەر مەن وزگە دە يننوۆاتسيالاردى ەنگىزۋ ارقىلى ءسۇت ءوندىرىسىن 2 ەسەگە كوبەيتتىك. ەكى جىل بۇرىن گولشتين تۇقىمداس 400-دەن استام زەڭگى بابا ءتولىن ساتىپ العان بولاتىنبىز. قازىر مال باسى 900-دەن استى. قايتا تەرەڭ وڭدەلگەن ءونىم ەلىمىزدىڭ تۇكپىر-تۇكپىرىنە تاسىمالدانۋدا.
ەلباسى جولداۋىندا 2022 جىلعا قاراي ەڭبەك ونىمدىلىگىن ۇلعايتىپ, وڭدەلگەن اۋىل شارۋاشىلىعى ونىمدەرىنىڭ ەكسپورتىن 2,5 ەسەگە ارتتىرۋ كەرەكتىگى ايتىلدى. ءبىز ونىمدەرىمىزدى ەكسپورتقا شىعارۋعا بىرتىندەپ جاقىنداپ كەلەمىز. قازىر الدىمەن ءوز تۇتىنۋشىلارىمىزدىڭ سۇرانىسىن تولىق قامتاماسىز ەتۋ ماقساتىندا جۇمىس ىستەۋدەمىز. ەشقانداي قوسپاسىز تازا تابيعي بولعاندىقتان, ونىمدەرىمىزدىڭ ساقتالۋ مەرزىمى – 7 كۇن. سۇرانىستىڭ بولۋى وسىعان دا بايلانىستى شىعار. الداعى ۋاقىتتا دا سەرىكتەستىك جاڭا جوبالاردى جۇزەگە اسىرىپ, تۇتىنۋشىلاردى وتاندىق ونىممەن قامتاماسىز ەتۋگە قوماقتى ۇلەسىن قوساتىن بولادى.
نۇرالى ابىشەۆ,
«بورتە-ميلكا» جشس قۇرىلتايشىسى, ديرەكتورى
تۇركىستان وبلىسى