پارلامەنت ماجىلىسىنىڭ دەپۋتاتى ساۋىتبەك ابدراحمانوۆ پرەزيدەنت جولداۋى تۋرالى پىكىرىن بىلدىردى.
ء«بىزدىڭ الدىمىزدا جاڭا بيىكتەردى باعىندىرۋ مىندەتى تۇر. جاڭا, قيىن, كۇردەلى مىندەتتەر تۇر. الەم وزگەرىپ بارادى, ورىنسىز ساياسيلانىپ بارادى. ساياسات ەكونوميكاعا ارالاستى. ساياساتتىڭ سالدارىنان ەكونوميكاعا تىكەلەي اسەر ەتەتىن, ىقپال ەتەتىن فاكتورلار كوبەيىپ بارادى. وسىنداي كەزدە ەلباسى قازاقستاننىڭ ەكونوميكاسىن حالىقتىڭ ءال-اۋقاتىن جاڭا ساتىعا كوتەرۋ ءۇشىن ناقتى ۇسىنىستاردى ەنگىزىپ وتىر. اتاپ ايتقاندا, تۇرمىسى تومەن ادامداردىڭ ءال-اۋقاتىن ارتتىرۋ جونىندە ەڭ تومەنگى جالاقىنى 1,5 ەسەگە ءوسىرۋ, بيۋدجەت مەكەمەلەرى قىزمەتكەرلەرىنىڭ جالاقىسىن 35%-كە ءوسىرۋ سياقتى ناقتى قادامدار جاسالعالى وتىر», - دەپ اتاپ ءوتتى دەپۋتات.
ونىڭ ايتۋىنشا, جولداۋدان كەيىن مۇعالىمدەردىڭ مارتەبەسى ارتىپ, ەل الدىندا قۇرمەتى ەسەلەنە تۇسەدى.
ء«بىر كەزدەرى ءبىز راحمەت ايتقاندا, ىرزا بولعاندا, باتا بەرگەندە «مولدا بول, بالام» دەپ ايتاتىن ەل ەدىك. ول زاماندا مولدا بولۋ - مۇعالىم بولۋ دەگەن ءسوز. بۇكىل قازاقتىڭ ساۋاتىن اشقان - مولدالار. وكىنىشكە قاراي, وبەكتيۆتى جانە سۋبەكتيۆتى پىكىرلەرگە بايلانىستى مۇعالىمدەردىڭ مارتەبەسى تومەندەدى. اۋىلدىق جەردە قولبالاعا اينالىپ, كەز كەلگەن شارۋاعا الدىمەن مۇعالىمدى جەگەتىن جاعداي قالىپتاستى. ەندى پەداگوگ مارتەبەسى تۋرالى زاڭ قابىلداعاننان كەيىن بۇل ماسەلەدە ناقتى وزگەرىستەر بولاتىنىنا سەنەمىز جانە پارلامەنت دەپۋتاتتارى رەتىندە ونىڭ ىشىندە الەۋمەتتىك مادەني دامۋ كوميتەتىنىڭ مۇشەسى رەتىندە بۇل سالاعا, بۇل جۇمىسقا مىندەتتى تۇردە ارالاساتىن بولامىز», - دەدى س. ابدراحمانوۆ.
ال, جولداۋدىڭ جاريالانۋ مەرزىمى تۋراسىندا بىلاي دەدى:
«وسىعان دەيىن ءبىز جولداۋ جىلدىڭ باسىندا, كەيدە ءتىپتى ناۋرىز ايىنا بەرىلەتىنىنە ۇيرەنگەنبىز. جىل ىشىندە اتقارىلاتىن جۇمىستى ناۋرىزدان باستاۋ نەمەسە تاپسىرمالاردى قاڭتاردا الۋ ءتيىمدى ەمەس. مىنە قازىر قازان ايىنىڭ باسىندا ايتىلىپ, مەجەلەر بەلگىلەندى. ارناۋلى زاڭدار قاجەت بولسا, ءبىز قازان, قاراشا, جەلتوقسان ايلارىندا ول زاڭداردى قابىلداي الامىز. بيۋدجەتكە دە وزگەرىس ەنگىزە الامىز. بۇل وتە ىڭعايلى»