قازاقستان حالقى اسسامبلەياسى كەشە جاريالانعان ەلباسىنىڭ جولداۋىن قولداۋ تۋرالى ۇندەۋ جاريالادى.
«قۇرمەتتى وتانداستار! قازاقستان پرەزيدەنتى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى قوعامنىڭ وزەكتى الەۋمەتتىك ساۋالدارىنا ناقتى جاۋاپ بولدى. بۇل - مەملەكەتتىك ورگاندار, بيزنەس پەن قوعام ءۇشىن ءىس-قيمىلدىڭ تۇتاس ستراتەگياسىن ايقىندايتىن, ءوزىنىڭ ءمانى مەن مازمۇنى جاعىنان ەرەكشە قۇجات.
ەڭ تومەنگى جالاقىنى ءوسىرۋ, بيزنەستىڭ جول كارتاسىن جالعاستىرۋ, تۇرعىن-ءۇي كوممۋنالدىق شارۋاشىلىق قىزمەتتەرىنە ارنالعان تاريفتەردە ءتارتىپ ورناتۋ جونىندەگى شارالار جانە باسقا دا قادامدار - تابىستىڭ ءوسۋىنىڭ تۇراقتىلىعىنا ىقپال ەتەدى. ءبىلىم بەرۋ, عىلىم جانە دەنساۋلىق ساقتاۋ سالاسىنا جۇمسالاتىن قاراجاتتى ارتتىرۋ, ۋچاسكەلىك مەديتسينا قىزمەتكەرلەرىنىڭ جەكەلەگەن ساناتتارىنا ەڭبەكاقىنى كوتەرۋ, سالاۋاتتى ءومىر سالتىن دامىتۋ, حالىقتى ساپاسىز تاۋارلار مەن قىزمەتتەردەن قورعاۋ - بۇل تۇرمىس ساپاسىن جاقسارتۋ جونىندەگى سەنىمدى قادامدار», - دەپ جازىلعان ۇندەۋدە.
«قۇرمەتتى قازاقستاندىقتار! مەملەكەت باسشىسى حالىقتىڭ الەۋمەتتىك كوڭىل-كۇيى مەن ءومىر ءسۇرۋ ساپاسىن جاقسارتۋ جونىندەگى تەڭدەسسىز شارالاردى بەلگىلەدى. پرەزيدەنت بۇل ماقساتتارعا ءبىزدىڭ قوعامىمىزدى كەلىسىم مەن بىرلىكتى ساقتاۋ ارقىلى عانا قول جەتكىزۋ مۇمكىن ەكەندىگىن اتاپ ءوتتى. قازاقستان حالقى اسسامبلەياسى جاڭا جولداۋدىڭ مىندەتتەرىن تولىق قولدايدى جانە ولاردى جۇزەگە اسىرۋ مەن تۇسىندىرۋگە بەلسەندى قاتىسادى. ءبىز بارلىق قازاقستاندىقتاردى ۇلتتىق ءال-اۋقاتتى مەملەكەت قۇرىلىسىنىڭ ماقساتتارىنا قول جەتكىزۋ ءۇشىن بىرىگۋگە شاقىرامىز. وسىنىڭ ءبارى قازاقستانداعى بەيبىتشىلىك پەن كەلىسىمنىڭ نەگىزگى تۇعىرى. ءبىز, جولداۋدىڭ جۇزەگە اسىرىلۋى قوعامدىق كەلىسىم مەن جالپىۇلتتىق بىرلىكتىڭ, ازاماتتاردىڭ ءال-اۋقاتىن ارتتىرۋدىڭ, وتانىمىزدىڭ گۇلدەنۋىنىڭ بەرىك كەپىلى بولاتىنىنا سەنىمدىمىز», -ماتىنىندە ۇندەۋ جاريالادى قازاقستان حالقى اسسامبلەياسىنىڭ وكىلدەرى.