سۋرەتشىنىڭ ساياجايىندا سوڭعى كەزدەرى سالعان بىرنەشە كارتينالارى تۇر ەكەن. سولاردىڭ ءبىرى كوزىمە وتتاي باسىلدى. ءيا, ءيا… بۇل وتە تانىس كورىنىس قوي. وڭتۇستىككە قاراي ساپار شەگىپ بارا جاتقاندا تالاي رەت تاماشالاعانمىن.
ءبىر باستالسا, ءبىر اي بويى تولاستامايتىن قوردايدىڭ جەلى سوقسا شىركوبەلەك اينالاتىن الىپ ەلەكتر گەنەراتورلارى – ءبىزدىڭ ەلىمىزگە ءححى عاسىردا كەلگەن ءىرى جاڭالىقتاردىڭ ءبىرى. ولار قازىر ءبىراز وڭىرلەرگە ەلەكتر قۋاتىن بەرەدى. ۇزاقتان قاراساڭ, كادىمگى الەم ادەبيەتىنەن جاقسى تانىس اپەندى كەيىپكەر دون كيحوت مىرزا شايقاساتىن سول باياعى جەل ديىرمەندەرگە ۇقسايدى.
بىراق ولارعا ءالى كۇنگە دەيىن قازاقشا ءبىر ات تاۋىپ قويا الماي كەلە جاتقانىمىز انىق. وسىعان بايلانىستى مەنىڭ ەسىمە ءبىر قىزىق وقيعا ورالادى. ...1998 جىلدىڭ كوكتەمىندە شىمكەنت قالاسىنا قىرعىز ادەبيەتىنىڭ كلاسسيگى, ەسىمى الەمگە ايگىلى جازۋشى شىڭعىس ايتماتوۆ كەلدى. ول كەزدە وڭتۇستىكتە ەلەكتر قۋاتى وتە تاپشى ەدى. جارىق ءبىر ءسونىپ, ءبىر جانىپ تۇراتىن. سوندىقتان دا قول شامنىڭ جارىعىمەن وتكەن اڭگىمە ۇستىندە ۇلى جازۋشى ەۋروپادا جەل قۋاتى ارقىلى ەلەكتر ەنەرگياسىن تاراتاتىن گەنەراتورلاردىڭ كوپ ەكەندىگىن ايتا وتىرىپ: «قۇداي قالاسا, ونداي اپپاراتتار ءبىزدىڭ جاققا دا جەتىپ قالار. سوندىقتان ولاردى قازاقشا قالاي اتاۋ كەرەك ەكەنىن سىزدەر, قالامگەر باۋىرلار, وسى باستان ويلاستىرا بەرگەندەرىڭىز ابزال», دەگەن-ءدى جىميىپ.
بۇل ءسوزدى, ءبىز ارينە, جادىمىزدا ساقتاپ قالدىق. كەيىن, راسىندا دا, قورداي اسۋىنا الگىندەي الىپ گەنەراتورلاردىڭ ءبىر ەمەس, بىرنەشەۋى ورناتىلعان كەزدە ولاردى قالاي اتايتىنىمىزدى بىلمەي ىشتەي قىسىلعانىمىز دا راس.
ال وتكەن جىلى… جو-جوق, الدىڭعى جىلى ەكەن-اۋ, اتىراۋعا ىسساپارمەن بارا قالعانىمىزدا سول گەنەراتورلاردى ورناتۋعا قاتىسقان ءبىر توپ بىلىكتى ماماندارمەن جولىعىپ, اڭگىمەلەسۋدىڭ ءساتى تۇسە كەتكەنى. سوندا ولار: ء«اي, باۋىرلارىم-اي, سەندەر ءبىزدىڭ قاڭعالاقتارعا قازاقشا ات تابا الماي قينالىپ ءجۇر ەكەنسىڭدەر-اۋ!» دەپ ازىلدەپ ەدى.
سول ساتتە, شىنىمدى ايتسام, جەل ەكپىنىن ەلەكتر قۋاتىنا اينالدىراتىن الىپ گەنەراتورلاردى تاپ وسىلايشا قىزىق تا قاراپايىم تىلمەن «قاڭعالاق» دەپ اتاي سالۋ كوڭىلگە قونا كەتكەندەي, قۋانعانىمنان ك ۇلىپ جىبەرگەنمىن.
ەندى مىنە, قوردايداعى قاڭعالاقتاردى سۋرەتشىنىڭ كارتيناسىنان كورىپ, قىزىقتاپ تۇرمىن.
راسىندا دا, ولاردى وسىلاي قاڭعالاق دەپ اتاساق قالاي بولار ەكەن, ءا؟!.
نۇرعالي وراز,
«ەگەمەن قازاقستان»