ەلباسى كەشە ءوزىنىڭ جىلداعى حالىققا ارناعان ءداستۇرلى جولداۋىن جاريالادى. بۇعان دەيىنگى جولداۋلارداعىداي بۇل جولداۋدا دا قازاقستان حالقىنىڭ ءومىرىن جاقسارتۋعا, تۇرمىسىن تۇزەۋگە باسا نازار اۋدارىلدى.
ناقتى ماسەلەلەرگە توقتالىپ, جاۋاپتى ادامدارعا تياناقتى نۇسقاۋلار بەرىلدى. بۇرىنعى بەلگىلەنگەن «نۇرلى جول», «نۇرلى جەر», «رۋحاني جاڭعىرۋ» سىندى سۇبەلى, كۇردەلى, ۇلكەن جوبالاردىڭ ءارى قاراي جۇيەلى جالعاسىن تاۋىپ, ساپالى ورىندالۋىنا دا مينيسترلەر مەن وبلىس اكىمدەرىن جۇمىلا جۇمىس ىستەۋگە شاقىردى. بۇل – وتە قۇپتارلىق باستاما. سونىڭ ىشىندە, اسىرەسە, ەلباسىنىڭ حالىقتىڭ باسپانامەن قامتىلۋىنا, اۋىلدى جەرلەردى كوركەيتۋگە, ۇستازدار قاۋىمىنىڭ كاسىبي مارتەبەسىن كوتەرۋ مەن جاستارعا ساپالى ءبىلىم بەرۋ, سونداي-اق مەملەكەت قارجىسىن اقىلمەن جۇمساپ, ۇنەمدى پايدالانۋعا قاتىستى ايتقان ۇسىنىستارى كوپشىلىكتىڭ كوكەيىندە جۇرگەن ارمان-مۇراتىن ءبىر ارنادا توعىستىرعان كورەگەن شەشىم بولدى دەپ ەسەپتەيمىن.
جولداۋدا ايتىلعان ماسەلەنىڭ ارقايسىسى جەكە-جەكە تالداپ, توقتالۋعا جانە سول ايتىلعان ماسەلەلەر بويىنشا جۇيەلى جۇمىستار اتقارۋعا سۇرانىپ تۇر. ودان كەيىن, ارينە, جولداۋدا قازاقستاننىڭ حالىقارالىق دەڭگەيدەگى بەدەلى تۋرالى دا وتە جاقسى ايتىلدى. قازاقستاندى 27 جىلدىڭ ىشىندە جاھان تانىپ, الەم مويىندادى. الەمدىك ارەنادا الپاۋىت مەملەكەتتەرمەن تەڭ دارەجەدە يىق تىرەستىرىپ تۇرارلىق بەدەلدى ورىنعا يە بولدى. جالپى, بۇل جولداۋدا قازاقستان حالقىنىڭ جانىنا, ومىرىنە كەرەك نارسەلەردىڭ بارلىعى ءسوز بولدى دەپ ويلايمىن. ەندى بارشامىزدىڭ الدىمىزدا ەل بولىپ جۇمىلىپ, بۇعان دەيىن جاسالىپ كەلگەن جۇمىستى ودان ءارى جالعاستىرىپ, ايتىلعان ماسەلەلەردىڭ بارىنە ءجىتى ءمان بەرۋ مەن جۇزەگە اسىرۋ مىندەتى كۇتىپ تۇر.
مىرزاتاي جولداسبەكوۆ,
مەملەكەت قايراتكەرى