بۇگىنگى جولداۋ بۇعان دەيىنگى حالىققا ارنالعان جولداۋلاردىڭ زاڭدى جالعاسى دەپ بىلەمىن. وندا حالىقتىڭ تۇرمىسىن جاقسارتۋعا, ەلىمىزدىڭ ودان ءارى ءوسىپ-وركەندەۋىنە قاتىستى ايتىلعان ماڭىزدى ماسەلەلەر قامتىلدى.
پرەزيدەنتتىڭ وسى جولعى جولداۋى بۇعان دەيىنگى الەۋمەتتىك جوبالاردىڭ جيىنتىعىنداي بولدى. ەلدىڭ تىنىس-تىرشىلىگىنە قاتىستى بىردە-ءبىر ماسەلە نازاردان تىس قالعان جوق. توپتاستىرىپ ايتار بولساق, الەۋمەتتىك احۋال, حالىقتىڭ تۇرمىسى, زەيناتاقىسى, ەڭبەكاقىسى, جالپى كۇنكورىسى, قاۋىپسىزدىگى, وعان قوسا ينفراقۇرىلىمدى دامىتۋ سىندى ماڭىزدى دۇنيەلەردىڭ بارلىعى ءسوز بولدى. مىسال رەتىندە ايتا كەتەر بولسام, بالاباقشا مەن مەكتەپتەردەگى بالالاردىڭ تاربيەسىنە, قاۋىپسىزدىگىنە جۇيەلى تۇردە كوڭىل بولۋگە ەرەكشە ەكپىن بەرىلىپ وتىر. جالپى, وسى جولداۋدا ءبىلىم بەرۋ ساپاسى, جوعارى وقۋ ورىندارى تۇلەكتەرىنىڭ باسەكەگە قابىلەتتىلىگى, ولاردىڭ قوعامدا سۇرانىسقا يە بولۋى تۋرالى كوپ دۇنيەلەر ايتىلدى. قازىر جاستار ءۇشىن وقۋ ءبىتىرىپ, ديپلوم الىپ شىعۋ ازدىق ەتەدى, ولاردىڭ ءبىلىمى مەن قارىم-قابىلەتى ەلىمىزدە جانە حالىقارالىق دەڭگەيدە سۇرانىسقا يە بولۋعا ءتيىس. بۇل زاماننىڭ العا قويىپ وتىرعان تالابى.
مەملەكەتتىك اپپاراتتاردىڭ جاۋاپكەرشىلىگى, ماسەلەن قۇقىق قورعاۋ ورگاندارىنىڭ تازا جۇمىس ىستەۋى, سوتتار مەن پروكۋراتۋرانىڭ زاڭدى قاتاڭ ساقتاۋى دا وتە ماڭىزدى دەپ سانايمىن. سوت سالاسىن مۇلدە تازارتۋ كەرەك, سۋديالارعا قاتىستى ايتىلىپ جۇرگەن ءتۇرلى اڭگىمەلەردىڭ بارىنەن بۇل سالانى ارىلتۋ قاجەت. وسى ايتىلعانداردىڭ بارلىعى ءبىر-بىرىمەن تىعىز بايلانىستى.
مەملەكەت باسشىسى ءاربىر مەملەكەتتىك قىزمەتكەر, ءاربىر ۋچاسكەلىك پوليتسەي پرەزيدەنتتىڭ ەلدىڭ اراسىنداعى وكىلى ەكەنىن ايتتى. شىنىندا دا ءدال سولاي. ەگەر ادامداردىڭ ءبىر نارسەگە كوڭىلى تولماسا, جەرگىلىكتى مەملەكەتتىك قىزمەتكەرلەر ونىڭ ايتقان شارۋاسىن شەشىپ بەرە الماسا, وندا جۇرت اراسىندا مەملەكەتتىك دەڭگەيدە جۇمىس دۇرىس جاسالماعان دەگەن پىكىر تۋىنداۋى مۇمكىن. بۇگىن ەلباسى ەكى ساعاتقا جۋىق سوزىندە وسى ايتىلعان ماسەلەلەردىڭ ءبارىن قامتىدى. ساليقالى, مازمۇندى اڭگىمە بولدى, ءبىز كۇتكەن دۇنيەلەر ايتىلدى. كوكەيدە جۇرگەن ساۋالداردىڭ بارلىعىنا قاناعاتتانارلىق جاۋاپ الدىق.
قۋانىش سۇلتانوۆ,
پارلامەنت ءماجىلىسىنىڭ دەپۋتاتى