قازاقستاندىق كاسىپقوي بوكسشى مەيىرىم نۇرسۇلتانوۆ (8-0, 7 كو) ءوزىنىڭ كاسىبي شارشى الاڭداعى كەزەكتى جەكپە-جەگىن 13 قازان كۇنى اقش-تىڭ لاس-ۆەگاس قالاسىندا وتكىزەدى.
ايگىلى امەريكالىق BoxRec سايتىنىڭ مالىمەتى بويىنشا 25 جاستاعى وتانداسىمىزدىڭ قارسىلاسى جەرگىلىكتى بوكسشى دجامار فريمان (15-6-2, 8 كو) بولماق. ەكى بوكسشىنىڭ اراسىنداعى جەكپە-جەك سەگىز راۋندقا جوسپارلانىپ, ورتا سالماقتاعى NABF Junior بەلدىگى ساراپقا سالىنادى. بۇل نۇرسۇلتانوۆتىڭ كارەراسىنداعى العاشقى تيتۋلدى ايقاس.
مەيىرىم سوڭعى كەزدەسۋىن 4 تامىز كۇنى وتكىزىپ, دومينيكالىق دجوناتان باتيستا كەزدەسۋدىڭ ەكىنشى راۋندىنان كەيىن جەكپە-جەكتى جالعاستىرۋدان باس تارتقان-دى.
دايىنداعان الي بيتورە,
«ەگەمەن قازاقستان»