شىعىس قازاقستان وبلىسى, تارباعاتاي اۋدانى, قارعىبا اۋىلىنىڭ تۇرعىنى, جالعىزباستى جانە كوپبالالى انا ارداق شاكەنوۆانىڭ باسپانا ماسەلەسىن ايتىپ, بارماعان جەرى جوق. كەيىنگى جىلدارى تۇرىپ جاتقان ءۇيى قۇلايتىن جاعدايعا جەتكەندىكتەن, ونىڭ ۇستىنە شيەتتەي بەس بالاسىن ويلاپ سارىۋايىمعا سالىنىپ ءجۇر ەدى.
ەندى مىنە جاماعاتتىڭ جاردەمىمەن ەسكى ءۇيىنىڭ جانىنان جاڭا ءۇي سالىنىپ جاتىر. «بۇل باستاما قاسيەتتى قۇربان ايت كەزىندە كوتەرىلدى. اقسۋاتتاعى مەشىتىمىزدىڭ جاماعاتى, ىسكەر ازامات جاندوس ورازعاليەۆ جالعىزباستى, كوپبالالى انا ارداق شاكەنوۆاعا باسپانا سالىپ بەرۋ ماسەلەسىن جاماعاتتىڭ الدىنا قويدى. بۇل باستاما قىزۋ قولداۋ تاۋىپ, حالىق بىردەن ىسكە كىرىستى.
قۇربان ايتتا تاعانى قۇيىلعان ءۇيدىڭ بۇگىندە قابىرعاسى كوتەرىلىپ, توبەسى جابىلىپ جانە شاتىرلانىپ, پەشى سالىنىپ قويدى. ەندى ىشكى جوندەۋ جۇمىستارى عانا قالدى. «بۇيىرتسا, قىس تۇسپەي جاڭا ۇيگە كىرگىزەمىز» دەدى جاندوس.
«قارعىبا اۋىلىنىڭ حالقىنا دا العىسىمىز شەكسىز. اركىم قولدان كەلگەن كومەكتەرىن كورسەتۋدە. وسىنداي ۇيىمشىلدىقپەن باستالعان ساۋاپتى ءىس قونىستويىن تويلاۋعا ۇلاسادى دەگەن سەنىمدەمىز», دەيدى اۋداندىق ءماسليحاتتىڭ دەپۋتاتى ەرجان قۇتتىباەۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى