مادەنيەت جانە سپورت مينيسترلىگىنىڭ قولداۋىمەن, ەلوردامىز – استانا قالاسىنىڭ 20 جىلدىعىن مەرەكەلەۋ اياسىندا قازاقستان تەاترلار اسسوتسياتسياسى ۇيىمداستىرعان شەت ەلدىك شەبەرلەردىڭ قاتىسۋىمەن تەاتر ونەرى قايراتكەرلەرىنىڭ رەسپۋبليكالىق پراكتيكۋمى ءوز مارەسىنە جەتتى.
1 قازان كۇنى الماتى قالاسىندا, م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا شەت ەلدىك شەبەرلەردىڭ قاتىسۋىمەن تەاتر ونەرى قايراتكەرلەرىنىڭ رەسپۋبليكالىق پراكتيكۋمىنىڭ رەسمي تۇردە جابىلۋ سالتاناتى ءوتتى.
رەسپۋبليكالىق پراكتيكۋمنىڭ جابىلۋ سالتاناتىنا قازاقستاننىڭ ەڭبەك ەرى, كەڭەستەر وداعىنىڭ جانە قازاقستاننىڭ حالىق ءارتيسى, مەملەكەتتىك سىيلىقتاردىڭ لاۋرەاتى, م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى, قازاقستان تەاترلارى اسسوتسياتسياسىنىڭ پرەزيدەنتى – ءاسانالى ءاشىموۆ, م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, PhD دوكتورى اسحات ماكسيم ۇلى ماەميروۆ, قازاقستان تەاترلارى اسسوتسياتسياسىنىڭ ۆيتسە-پرەزيدەنتى, مەملەكەتتىك كورەي مۋزىكالىق كومەديا تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى ني ليۋبوۆ اۆگۋستوۆنا, تەاتر رەجيسسۋراسى بويىنشا شەبەرلىك ساباقتارىن وتكىزۋگە كەلگەن گرۋزيالىق رەجيسسەر, شوتا رۋستاۆەلي اتىنداعى تبيليسي مەملەكەتتىك تەاتر جانە كينو ۋنيۆەرسيتەتىنىڭ رەكتورى, ا.س.گريبوەدوۆ اتىنداعى تبيليسي مەملەكەتتىك اكادەميالىق ورىس دراما تەاترىنىڭ باس رەجيسسەرى – مارگۆەلاشۆيلي گەورگي نوداروۆيچ, حالىقارالىق تەاتر فەستيۆالىنىڭ «ۇزدىك ستسەنوگرافيا» نوميناتسياسىنىڭ جەڭىمپازى, الەمدىك پراگا كۆادريەننالە ستسەنوگرافياسىنىڭ لاۋرەاتى – تامارا وكيحيان قاتىستى.
شارانىڭ اشىلۋ راسىمىندە ا.ءاشىموۆ پەن ا.ماەميروۆ ءسوز باستاپ, رەسپۋبليكالىق پراكتيكۋم قاتىسۋشىلارىنا ا.پ.چەحوۆتىڭ «اپالى ءسىڭىلىلى ۇشەۋ» دراماسىنا تالداۋ جاساۋ جانە قويىلىمىنىڭ ءۇزىندىسى بويىنشا جۇرگىزىلگەن شەبەرلىك ساباقتارىنا قاتىسقاندىعىن راستايتىن ارنايى سەرتيفيكاتتار تابىستادى.
29 قىركۇيەك پەن 1 قازان ارالىعىندا جالعاسقان شارا بارىسىندا قاتىسۋشىلار «اپالى ءسىڭىلىلى ۇشەۋ» پەساسىن نەگىزگە الا وتىرىپ, درامالىق شىعارمانىڭ قاقتىعىسى مەن ەرەكشەلىگىنە, جاڭالىعى مەن ايقىندىق دارەجەسىنە, ايتار ويىنىڭ تەرەڭدىگىنە, تۋىندىداعى ارەكەتتىڭ دامۋى مەن ونىڭ فازاسىنا تالداۋ جاساي كەلە, ا.پ.چەحوۆتىڭ وزگە دە درامالارىنداعى ستسەنوگرافيالىق شەشىمدەر تۋرالى وي قوزعادى. سونداي-اق, جينالعان بارلىق رەجيسسەر مەن اكتەرلار ەرەكشە قيىندىقتار تۋىندايتىن نەگىزگى ماسەلەلەر مەن كۇردەلى ەپيزودتارعا (ساحنالار مەن قۇبىلىستار) جانە دە ساحنالىق كەڭىستىكتىڭ پلاستيكاسى مەن ستسەنوگرافيالىق قاقتىعىستارعا ايرىقشا ءمان بەردى.
رەسپۋبليكالىق پراكتيكۋم – قازاقستان تەاترلار پراكتيكاسىنا تەاتردىڭ زاماناۋي فورمالارىن تانىستىرۋ مەن ەنگىزۋگە, ەلىمىزدەگى بارلىق درامالىق جانە مۋزىكالىق-درامالىق تەاترلاردىڭ دامۋى مەن بايلانىسىن نىعايتۋعا, تالانتتى شىعارماشىل جاستارعا قولداۋ كورسەتۋگە, تەاتر رەجيسسەرلەرى مەن ونەر قايراتكەرلەرىنىڭ كاسىبيلىگىن ارتتىرۋ جانە تاجىريبە الماسۋعا مۇمكىندىك تۋدىرۋ ءۇشىن عانا ەمەس, جالپى العاندا تەاتر ونەرىنىڭ وركەندەۋى ءۇشىن جاسالىنىپ وتىرعان شارا.
پراكتيكۋمعا جينالعان ەلىمىزدىڭ ءار وبلىسىنان كەلگەن رەجيسسەر, اكتەر, سونىمەن قاتار ت.جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرى شەبەرلىك ساعاتتارىنان ءوتىپ, رۋحاني ساباق الىپ, دۇنيەتانىمدارىنىڭ وزگەرىپ, ونەردە وزگەشە جول, باعىت باعدار الارى ءسوزسىز.