1991 جىلى 2 ساۋىردە قازاقتان شىققان تۇڭعىش عارىشكەر توقتار اۋباكىروۆ كەڭەس وداعى عارىشكەرلەر دايارلاۋ ورتالىعىندا عارىشقا ۇشۋ دايىندىعىنا كىرىسىپ, سول جىلى 2 قازاندا بايقوڭىردان «سويۋز تم-13» كەمەسىمەن عارىشقا ۇشتى.
قازاقتان شىققان تۇڭعىش عارىشكەر, كەڭەس وداعىنىڭ باتىرى, قازاقستان رەسپۋبليكاسىنىڭ حالىق قاھارمانى , تەحنيكا عىلىمىنىڭ دوكتورى, پروفەسسور توقتار اۋباكىروۆ 1946 جىلى ماۋسىمنىڭ 27-ىندە قاراعاندى وبلىسى قارقارالى اۋدانى, «1-ءىنشى ماي» ۇجىمشارىندا دۇنيەگە كەلگەن. 1969 جىلى رەسەي فەدەراتسياسىنداعى ارماۆير جوعارى اسكەري ۇشقىشتار ۋچيليششەسىن, 1979 جىلى اۆياتسيا ينستيتۋتىن بىتىرگەن .
1969 — 75 جىلدارى اسكەري-اۋە كۇشتەرىندە ۇشقىش, زۆەنو كومانديرى, ەسكادريليا كومانديرىنىڭ ورىنباسارى بولعان. 1976 — 1992 جىلدارى ماسكەۋدەگى تاجىريبەلىك كونسترۋكتورلىق بيۋرونىڭ ۇشقىش-سىناقشىسى مىندەتتەرىن اتقارعان.
1988 جىلى كەڭەس وداعىندا العاش رەت اۋەدە ۇشاققا ەكى مارتە جانارماي قۇيدىرۋ ارقىلى سولتۇستىك ەندىككە قونباي ۇشۋدى ەرلىكپەن جۇزەگە اسىردى. رەاكتيۆتى ۇشاقتىڭ ەلۋدەن اسا جاڭا ءتۇرىن سىناقتان وتكىزدى, 1990 جىلى عارىشكەرلەر قۇرامىنا الىندى.
توقتار اۋباكىروۆ 1991 جىلى 2 قازاندا بايقوڭىردان “سويۋز تم-13” كەمەسىمەن عارىشقا ۇشىپ, قازاننىڭ 10-ىندا جەرگە قايتىپ قوندى.