بەيجىڭ تۋرنيرىندەگى ىرىكتەۋ سايىسىنىڭ فينالىندا قازاقستاندىق زارينا دياس ۇلىبريتانيالىق حيتەر ۋوتسونمەن كەزدەستى.
زارينا الەمدىك رەيتينگتە 92-ءىنشى ورىندا, قارسىلاسى ودان ءبىر ساتى جوعارى تۇرعانىنا قاراماستان, ويىن قازاقستاندىق تەننيسشىنىڭ ايقىن باسىمدىلىعىمەن ءوتتى.
ز. دياس العاشقى پارتيادا ۋوتسونعا بىردە-ءبىر گەيم بەرمەي, 6:0 ەسەبىمەن جەڭىسكە جەتتى. ەكىنشى سەت تە ونىڭ پايداسىنا شەشىلدى - 6:3. كەزدەسۋ 1 ساعات 1 مينۋتقا سوزىلدى. وسىلايشا زارينا دياس بەيجىڭنىڭ نەگىزگى تۋرنيرىنە جولداما الدى. ونىڭ ەندىگى قارسىلاسى كەيىن انىقتالادى.
ىرىكتەۋ سايىستارىنا سونداي-اق قازاقستاننىڭ ءبىرىنشى, الەمنىڭ 45-ءىنشى راكەتكاسى يۋليا پۋتينتسەۆا دا قاتىسۋدا. ول العاشقى باسەكەسىندە قىتايلىق يفان ءسيۋيدى 6:0, 6:4 ەسەبىمەن وڭاي ۇتتى. قازىرگى ساتتە ول ىرىكتەۋ سايىسىنىڭ فينالىندا الەمنىڭ 111-ءىنشى راكەتكاسى, امەريكالىق كريستينا ماكحەيلمەن نەگىزگى ءتۋرنيردىڭ جولداماسىن ساراپقا سالۋدا.