قازاقستاننىڭ ەسەپ كوميتەتى ASOSAI اۋديتورلىق كوميتەتىنىڭ مۇشەسى بولدى

ەسەپ كوميتەتىنىڭ وسىنداي جوعارى لاۋازىمعا سايلانۋى ۆەدومستۆو قىزمەتىنىڭ ودان ءارى جاندانۋىنا جانە قازاقستان رەسپۋبليكاسىنىڭ حالىقارالىق اۋديتورلىق قوعامداستىقتاعى ءيميدجىن نىعايتۋعا ىقپال ەتەتىن بولادى.

داۋىس بەرۋ ناتيجەسىندە تۇركيانىڭ ەسەپ سوتى دا اۋديتورلىق كوميتەتتىڭ مۇشەسى بولىپ سايلاندى. ەكى ەلدىڭ جوعارى اۋديت ورگاندارى (جاو) 2018-2021 جىلدار ىشىندە ASOSAI قارجىلىق ەسەپتىلىگىنە اۋديت جۇرگىزۋى ءتيىس.

اۋديتورلىق كوميتەتتىڭ مۇشەلەرىن جانە باسقارۋشى كەڭەستى سايلاۋ ۆەتنامنىڭ حانوي قالاسىندا 14-ءشى ASOSAI اسسامبلەياسى شەڭبەرىندە وتكىزىلدى. وعان ASOSAI-عا مۇشە ەلدەردىڭ جوعارى اۋديت ورگاندارىنىڭ (ASOSAI) 200-دەن استام وكىلدەرى, سونداي-اق حالىقارالىق ۇيىمدار قاتىستى.

قازاقستاندىق دەلەگاتسيانى ەسەپ كوميتەتىنىڭ مۇشەسى تالعات جاقان باسقاردى.

اسسامبلەيا بارىسىندا ۇيىم قىزمەتىنىڭ ءۇش جىلداعى قورىتىندىسى شىعارىلدى. ASOSAI-دىڭ 2015-2017 جىلدارداعى قارجىلىق ەسەپتىلىگى قارالدى, 2019-2021 جىلدارعا ارنالعان بيۋدجەتى بەكىتىلدى, ستراتەگيالىق جۇمىس جوسپارىن ىسكە اسىرۋدىڭ ناتيجەلەرى تالقىلاندى.

مالايزيانىڭ باس اۋديتورىنان ۇيىم توراعاسىنىڭ وكىلەتتىكتەرىن 2018-2021 جىلدارعا ۆەتنامنىڭ باس اۋديتورىنا تاپسىرۋ سالتاناتى ءوتتى. قىتايدىڭ ۇلتتىق اۋديت ءوفيسى وسى كەزەڭگە ASOSAI باس حاتشىسى بولىپ بەلگىلەندى. ASOSAI قۇرامىنا جاڭا مۇشە - پالەستينانىڭ جاو قابىلداندى. كەلەسى اسسامبلەيانى تايلاندتا وتكىزىلەتىن بولدى.

7-ءشى ASOSAI سيمپوزيۋمى بارىسىندا كليماتتىڭ وزگەرۋى, قورشاعان ورتانىڭ لاستانۋى جانە ادامزات ومىرىنە قاۋىپ توندىرەتىن باسقا دا جاھاندىق پروبلەمالار اياسىندا تۇراقتى دامۋ ماقساتىندا قورشاعان ورتا ءاۋديتىن جۇرگىزۋدىڭ وزەكتى ماسەلەلەرى تالقىلاندى.

جۇمىستىڭ قورىتىندىسى بويىنشا حانوي دەكلاراتسياسى قابىلداندى, وعان سايكەس قاتىسۋشىلار ءبىلىم جانە تاجىريبە الماسۋ, ەكولوگيالىق اۋديت ستاندارتتارىن تاراتۋ, قارقىندى وقىتۋ كۋرستارىن ۇيىمداستىرۋ, وسى سالاداعى ماسەلەلەردى شەشۋ ءۇشىن بىرلەسكەن تەكسەرۋلەر جۇرگىزۋ ارقىلى ASOSAI قىزمەتىن جانداندىرۋ تۋرالى ۋاعدالاستى.

ءىس-شارا شەڭبەرىندە ەسەپ كوميتەتىنىڭ مۇشەسى تالعات جاقان ۆەتنام, يران, كۋۆەيت, بىرىككەن اراب امىرلىكتەرى, تايلاند, تۇركيا, وڭتۇستىك كورەيا جانە جاپونيا جاو-لارىنىڭ باسشىلارىمەن جانە وكىلدەرىمەن كەزدەستى.

تاراپتار ءوزارا مۇددەلى ماسەلەلەر بويىنشا ىنتىماقتاستىقتى جانداندىرۋ جانە نىعايتۋ جولدارىن تالقىلادى. ۆەتنام مەن تايلاند جاو-لارىمەن ىنتىماقتاستىق تۋرالى ەكىجاقتى مەموراندۋمدارعا قول قويۋ تۋرالى كەلىسىمگە قول جەتكىزىلدى. تالعات جاقان ارىپتەستەرىنە العىسىن ءبىلدىرىپ, اۋديتورلىق كوميتەتتىڭ مۇشەسى رەتىندە قازاقستاننىڭ ەسەپ كوميتەتى ASOSAI شەڭبەرىندە حالىقارالىق ىنتىماقتاستىقتى ودان ءارى دامىتۋ ءۇشىن الەۋەتىن جانە جيناقتالعان تاجىريبەسىن پايدالانۋ ءۇشىن بار كۇش-جىگەرىن جۇمسايتىنىنا سەندىردى.