ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جارىققا شىققان «وتىرار جادىگەرلەرى» البوم-كىتابى وتىرار وركەنيەتى قالىپتاستىرعان ماتەريالدىق جانە رۋحاني مادەنيەت جايلى سىر شەرتەدى.
كىتاپتا ءابۋ ناسىر ءال-فارابي جانە ونىڭ ارعى-بەرگى ءىزباسارلارى مەن مۇرالارى, ولاردىڭ ءوزى جانە وتباسى تۇتىنعان قولونەر بۇيىمدارى مەن تۇرمىستىق زاتتارى, شارۋاشىلىق قۇرال-سايماندارى, وتىراردىڭ قۇپيا كومبەلەرى, سونداي-اق 1930 جىلعا دەيىن ارىستانباب كەسەنە-مەشىتى جانىندا رۋحاني اعارتۋ وشاعى بولعان شاعىن مۇسىلمان كىتاپحاناسى, ەلباسىنىڭ كيەلى وڭىرگە ساپارلارى مەن زيالى قاۋىممەن كەزدەسۋى, ۇلىلاردىڭ ۇلاعاتتى ءىزىن جالعاپ كەلە جاتقان بۋىننىڭ دا وتكەنگە ءىز قالدىرار ىستەرى تۋرالى ءسوز بولادى. دەرەكتەر قازىناسىن قۇندى كىتاپ ەتىپ, كوپشىلىككە ۇسىنعان مەملەكەت جانە قوعام قايراتكەرى قۋانىش ايتاحانوۆ جانە ادەبيەت زەرتتەۋشىسى, مادەنيەت قايراتكەرى ابدۋللا جۇماشەۆ.
ەجەلگى وتىرار قالاسىنىڭ دۇنيەجۇزىلىك وركەنيەتكە قوسقان ۇلەسى, ونداعى الار ورنى بۇكىل الەمگە ايان. «عالىمداردىڭ ايتۋىنشا, جازبا دەرەگى از, بىراق ەسكەرتكىشتەرگە ەڭ باي ەلمىز. جازبا دەرەگىمىز جيىرما پروتسەنت دەسەك, 80 پروتسەنت تاريحىمىز ەسكەرتكىشتەردە تۇر. ەلىمىزدىڭ قايسى ءبىر توبەسى مەن جادىگەرلەرىنىڭ سىرىنا ۇڭىلسەڭىز تۇنىپ تۇرعان تاريحى بار. ال وتىرار جايلى از ايتىلىپ, جازىلىپ جاتقان جوق. بىراق سول دەرەكتەردىڭ ءبارىنىڭ باسىن قوسىپ, كەلەر ۇرپاقتىڭ ەنشىسىنە قالدىرۋ جۇمىسى وتىرار اۋدانىنىڭ تۋماسى, قوعام قايراتكەرى قۋانىش ايتاحانوۆتىڭ باستاماسىمەن جۇزەگە استى. «وتىرار جادىگەرلەرى» بيىل دەرەكتەرمەن, تاريحي قۇندىلىقتار جايلى اقپاراتتارمەن تولىقتىرىلىپ, ۇلكەن ەنتسيكلوپەديا تۇرىندە جارىققا شىقتى», دەيدى «رۋحانيات ءابۋ ناسىر ءال-فارابي» مۋزەيىنىڭ نەگىزىن قالاۋشى ابدۋللا جۇماشەۆ.
1000 دانا تارالىممەن جارىق كورگەن «وتىرار جادىگەرلەرى» كىتاپ-البومىنا قىزىعۋشىلىق تانىتىپ, وڭ پىكىرلەرىن بىلدىرۋشىلەر كوپ.
عالىمجان ەلشىباي,
«ەگەمەن قازاقستان»
تۇركىستان وبلىسى