تارازدىق سانگەر ايدارحان قاليەۆ الەمنىڭ بىرقاتار مەملەكەتتەرىندە ءوزىنىڭ كوللەكتسيالارىن كورسەتۋ ارقىلى حالىقارالىق دەڭگەيدە تانىلدى.
جۋىردا ەلىمىزدىڭ اتىنان العاش رەت قاتىسقان بەلگىلى سانگەردىڭ «كوكتەم-جاز – 2019» اتتى ماۋسىمدىق كوللەكتسياسى يتاليانىڭ ميلان قالاسىندا ءوتىپ جاتقان «Milan Fashion Week» ءسان اپتالىعىنىڭ رەسمي باعدارلاماسىندا كورسەتىلدى.
تاراز قالاسى تۋرالى ايتىلعاندا, اۋەلى ايگىلى شىعىس اقىندارىنىڭ ەجەلگى تاراز ارۋلارىنا ارناعان عازالدارى ويعا ورالادى. شايىرلاردىڭ جۇرەگىن تەربەگەن ارۋلار تۋرالى اڭىز تاراز توپىراعىندا ءالى كۇنگە دەيىن ايتىلادى. سول سەبەپتەن دە ايدارحان قاليەۆ ءوز كورسەتىلىمىن «تاراز پەرىشتەلەرى» دەپ اتاپتى. مۇندا شىعارماشىلىق كورسەتىلىمنىڭ سيمۆولى پەرىشتە بولىپ بەلگىلەنگەن. «شىعىس سۇلۋلارىنىڭ قۇپياعا تولى كەلبەتى مەن بەينەسى پەرىشتەنى ەسكە سالماي قويمايدى», دەيدى سانگەردىڭ ءوزى.
نەگىزىنەن ميلاندا كورسەتىلگەن ءسان ۇلگىلەرى شىعىستىق ستيلدە دايىندالعان. سونىمەن قاتار, سانگەر قولونەر شەبەرلەرى بەزەندىرگەن جىلتىر ماتالاردى پايدالانعان. جالپى, شىعىس ۇعىمىندا قىز بالاسى نازىكتىك پەن پاكتىكتىڭ سيمۆولى رەتىندە بەينەلەنسە, ايەل بەينەسى اسىل جار, اياۋلى انانىڭ سيمۆولى ىسپەتتەس. سوندىقتان دا سانگەر ءسان ۇلگىلەرىنە اق ءتۇستى قولدانعان.
بۇگىندە ۇلكەن جەتىستىككە جەتكەن ايدارحان قاليەۆتىڭ كوللەكتسيالارى بيىلعى جىلعى 8-11 قازان ارالىعىندا تۇڭعىش رەت تاراز قالاسىندا وتەتىن «Taraz – Aspara fashion week» ءسان اپتالىعىنىڭ اشىلۋ سالتاناتىندا كوپشىلىكتىڭ نازارىنا ۇسىنىلادى. كەزىندە ۇلى جىبەك جولىنىڭ ورتالىعى بولعان تاراز قالاسىندا وتەتىن ءسان اپتالىعىنا يتاليا, ءۇندىستان, گوللانديا, رەسەي, قىتاي, فرانتسيا سياقتى 18 مەملەكەتتەن قوناقتار كەلەتىن بولادى. سونىمەن قاتار, قۇرمەتتى قوناقتار قاتارىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىحالىقوۆا مەن وزبەكستان رەسپۋبليكاسى پرەمەر-ءمينيسترىنىڭ ورىنباسارى, ايەلدەر كوميتەتىنىڭ ءتورايىمى تانزيلا نارباەۆا دا بولادى دەپ جوسپارلانۋدا.
ايتا كەتەيىك, ءسان اپتالىعىندا تانىمال سانگەرلەردىڭ كورسەتىلىمدەرىنەن باسقا, 30 حالىقارالىق ديزاينەردىڭ كيىمدەرى ۇسىنىلادى. سونىمەن قاتار, «Aspara Fashion Week» اياسىندا حالىقارالىق ديزاينشىلار كونكۋرسى وتەدى. ءتورت كۇنگە سوزىلاتىن شارانىڭ العاشقى كۇنى تارازدىقتار پاريج جانە يتاليا ديزاينەرلەرىنىڭ كيىمدەرىن تاماشالاي الادى. ال ەكىنشى كۇنى وزبەكستاندىق 6 ديزاينەردىڭ ونەرى كوپشىلىك نازارىنا ۇسىنىلسا, ءۇشىنشى كۇنگى كورسەتىلىمدى يتاليا جانە فرانتسيا ديزاينەرلەرى اياقتايدى دەپ كۇتىلۋدە. جامبىل وبلىستىق تۋريزم باسقارماسىنىڭ مالىمەتىنشە, اتالعان ءسان اپتالىعىنا ءۇش مىڭعا جۋىق تۋريست تارتىلادى. ناتيجەسىندە الەمنىڭ كوپتەگەن ەلىنەن كەلگەن قوناقتار تاراز تاريحىمەن تانىسىپ, تاعىلىمدى وي ءتۇيىپ قايتادى.
حاميت ەسامان,
«ەگەمەن قازاقستان»
جامبىل وبلىسى