رەسەيدىڭ كەمەروۆ وبلىستىق حالىق دەپۋتاتتارىنىڭ كەڭەسى «كەمەروۆ وبلىسىنىڭ گۋبەرناتورى امانگەلدى مولداعازى ۇلى تولەەۆكە «حالىق گۋبەرناتورى» قۇرمەتتى اتاعىن بەرۋ تۋرالى» شەشىم قابىلدادى.
فيليپپيندەگى «ۋوشي» تايفۋنىنان قازا تاپقاندار سانى 27 جەلتوقسانداعى مالىمەت بويىنشا 1,5 مىڭ ادامعا جەتتى. اسا كوپ وپات بولعاندار مينداناو ارالىنىڭ سولتۇستىك بولىگىندە ورنالاسقان كاگايان-دە-ورو جانە يليگان قالالارىنىڭ ۇلەسىنە ءتيىپ وتىر.
سولتۇستىك كورەيانى 17 جىل باسقارىپ, 17 جەلتوقساندا كوز جۇمعان 69 جاستاعى كيم چەن ير بۇگىن جەرلەنەتىن بولادى. ونىڭ ءمايىتى سوڭعى 10 كۇن بويى اكەسى كيم ير سەن جاتقان ماۆزولەيگە قويىلعان ەدى.
9 ايدان بەرى بيلىك پەن وپپوزيتسيا اراسىندا كيكىلجىڭ ورىن الىپ كەلە جاتقان سيرياعا العاش رەت اراب مەملەكەتتەرىنىڭ ليگاسىنان بايقاۋشىلار كەلدى. اتالعان ۋاقىت ارالىعىندا ەكى جاقتى تەكەتىرەس سالدارىنان 5 مىڭنان استام ادام كوز جۇمىپتى.
22 جەلتوقساندا يراك استاناسى – باعداد قالاسىندا 14 مارتە جارىلىس جاسالىپ, سولاردىڭ سالدارىنان 70-كە جۋىق ادام قازا تاپقانى تۋرالى بۇعان دەيىن حابارلاعان بولاتىنبىز. لاڭكەستىككە جاۋاپكەرشىلىكتى كەشە «ءال-كايدا» لاڭكەستىك ۇيىمى ءوز موينىنا الدى.
ۇلىبريتانيانىڭ حالىقارالىق دامۋ ءمينيسترى ەندريۋ ميتچەلل الەم بولاشاق كاتاكليزمدەر مەن اپاتتارعا دايىن ەمەس ەكەنىن مالىمدەدى. ونىڭ پىكىرىنشە, باي ەلدەر توتەنشە جاعدايلاردى جويۋ جونىندەگى ورتالىق قورعا جەتكىلىكتى كولەمدە قارجى اۋدارماي كەلەدى.
كەشە ەفيوپيادا لاڭكەستەرگە قولداۋ كورسەتتى جانە شەكارانى زاڭسىز كەسىپ ءوتتى دەپ ايىپتالعان ەكى شۆەد جۋرناليسى – رەپورتەر مارتين شيببيۋە مەن ءفوتوتىلشى يوحان پەرسسون 11 جىلعا باس بوستاندىقتارىنان ايىرىلدى.
تانىلماعان رەسپۋبليكا – پريدنەستروۆەدە وتكەن پرەزيدەنتتىك سايلاۋدا پارلامەنتتىڭ بۇرىنعى سپيكەرى ەۆگەني شەۆچۋك جەڭىسكە جەتتى. پريدنەستروۆەنى 1991 جىلدان بەرى باسقارىپ كەلگەن ءىس باسىنداعى پرەزيدەنت يگور سميرنوۆ جەڭىلىس تاپتى.
«سپراۆەدليۆايا روسسيا» پارتياسىنىڭ سەركەسى سەرگەي ميرونوۆ وسك-ءنىڭ شەشىمىمەن پرەزيدەنتتىككە كانديدات رەتىندە تىركەلگەن رەسەي ۇكىمەتىنىڭ باسشىسى ۆلاديمير پۋتيننەن كەيىنگى ەكىنشى ادام بولدى.
رەسەيدىڭ ينگۋشەتيا اۆتونومياسىندا پوليتسەيلەر جول ءجۇرۋ ەرەجەسىن بۇزىپ, توقتاۋ تۋرالى بۇيرىقتى ورىنداماعان 61 جاستاعى جۇرگىزۋشىنى اتىپ ولتىرگەن. وقيعاعا بايلانىستى قىزمەتتىك تەكسەرۋ ءجۇرگىزىلۋدە.
انگليانىڭ استاناسى – لوندون قالاسىنداعى وكسفورد-ستريت كوشەسىندە ورنالاسقان باستى ساۋدا دۇكەنىنىڭ ماڭىندا بەلگىسىز بىرەۋلەر 18 جاسار بوزبالانى پىشاقتاپ ءولتىرىپ كەتكەن. كۇدىكتى دەگەن 9 ادام قاماۋعا الىنىپتى. وقيعا سەبەبى ازىرشە بەلگىسىز.
اقپارات اگەنتتىكتەرى ماتەريالدارىنىڭ نەگىزىندە ازىرلەندى.