استاناداعى EXPO كونگرەسس-ورتالىعىندا قازاقستان ماشينا جاساۋشىلارىنىڭ VI فورۋمى ءوتىپ جاتىر. شارا بارىسىندا قر ۇكىمەت باسشىسىنىڭ ءبىرىنشى ورىنباسارى اسقار مامين ەلباسى نۇرسۇلتان نازارباەۆتىڭ فورۋم قاتىسۋشىلارىنا ارنالعان قۇتتىقتاۋ ءسوزىن وقىپ بەردى.
«ماشينا جاساۋ ەكونوميكانىڭ نەگىزگى سالالارىنىڭ ءبىرى. مەملەكەت بۇل باعىتتىڭ ورنىقتى دامۋى ءۇشىن بارىنشا قولداۋ كورسەتىپ كەلەدى. 2017 جىلى ماشينا جاساۋ ءونىمىنىڭ كولەمى 1 ترلن تەڭگەگە جۋىق بولدى. بيىلعى فورۋمنىڭ نەگىزگى يدەياسى ماشينا جاساۋ سالاسىنداعى ءتورتىنشى ونەركاسىپتىك رەۆوليۋتسيا, جاھاندىق تەحنولوگيالىق پروگرەستىڭ قازىرگى بولمىسىنا سايكەس كەلەدى. ماشينا جاساۋ ءىسى قارقىندى دامىپ, جۇرگىزۋشىسى جوق اۆتوكولىكتەر, روبوتتاندىرىلعان زاۋىتتار جانە سۋتەگى وتىنىمەن جۇرەتىن ماشينالار بۇگىندە وزىق ەلدەر ءۇشىن ۇيرەنشىكتى قۇبىلىسقا اينالدى», - دەلىنگەن ەلباسىنىڭ سوزىندە.
سونداي-اق, ەلباسى ءوز سوزىندە بۇكىل الەم جاڭا ساندىق فورماتقا كوشىپ جاتقانىن, بۇل ۇردىستەن قازاقستان دا قالىس قالماۋ كەرەك ەكەنىن ايتتى.
«ماشينا جاساۋ سالاسىن دامىتۋدىڭ 2019-2030 جىلدارعا ارنالعان كەشەندى جوسپارى فورۋمدا تالقىلاناتىن ماڭىزدى تاقىرىپتاردىڭ ءبىرى بولماق. جاھاندىق تەحنولوگيالىق ۇدەرىستەرگە ساي وندىرىستە جاڭعىرتۋدى كوزدەيتىن اتالعان باعدارلامالىق قۇجات سالانى دامىتۋدىڭ ستراتەگيالىق باعدارىن ايقىندايدى. ءىس-شارا اياسىندا ناتيجەلى پىكىرتالاس بولىپ, وسى سالادا وزەكتى ماسەلەلەرگە قاتىستى ناقتى ۇسىنىستار ازىرلەنەدى دەپ سەنەمىن», - دەدى ن. نازارباەۆ.
يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ ءبىرىنشى بەس جىلدىعىن ىسكە اسىرۋ جىلدارىندا ماشينا جاساۋ سالاسى ەلىمىزدەگى ەڭ قارقىندى دامىعان سالالاردىڭ ءبىرى بولدى. ءوندىرىس كولەمى 2010 جىلعى 376 ملرد تەڭگەدەن 2014 جىلى 870 ملرد تەڭگەگە دەيىن, ياعني 2,3 ەسەگە ۇلعايدى. وڭدەۋ ونەركاسىبى كولەمىندەگى وتاندىق ماشينا جاساۋدىڭ ۇلەسى 9,7 پايىزدان 14,8 پايىزعا دەيىن ءوستى. 2018 جىلدىڭ 8 ايىنىڭ قورىتىندىسى بويىنشا ماشينا جاساۋ ءوندىرىسىنىڭ كولەمى 638,1 ملرد تەڭگەدەن اسىپ, ءوسىم 13,8 پايىزدى قۇرادى.